ҪҪХПИ инспекторӗсем Мари Эл арҫыннине шыраҫҫӗ. Следстви комитечӗн Чӑваш Енри управленийӗ пӗлтернӗ тӑрӑх, вӑл полицейские вӗлерме тӑнӑ.

Следстви версийӗ тӑрӑх, утӑ уйӑхӗн 27-мӗшӗнче Муркаш районӗнчи Токшик ялӗнче ҫул-йӗрпе патруль тата полици ӗҫченӗсем ВАЗ-2114 машинӑна чарнӑ. Руль умӗнче ӳсӗр 29 ҫулти арҫын ларнӑ. Вӑл - Мари Эл ҫынни.

Хайхискер чарнӑшӑн кӑмӑлсӑрланнӑ, багажникрен канистр кӑларнӑ та йӗрке хуралҫисене бензинпа сапнӑ, унтан шӑрпӑк ҫутнӑ. Пӗр полицейскин ӳчӗн 50 проценчӗ пиҫсе кайнӑ. Унӑн ӗҫтешӗ аманман.

ҪҪХПИ тунӑ сӑн

Паян 10 сехет те 50 минутра Элӗк-Ишек ҫул ҫинче, Элӗк районӗнчи Чӑваш Сурӑмӗ ялӗ ҫывӑхӗнче, тракторпа микроавтобус ҫапӑннӑ.

Малтанлӑха пӗлтернӗ тӑрӑх, «Форд Транзит» микроавтобус рейсра пулман, вӑл яла кайма тухнӑ. Микроавтобус транспорт хирӗҫ килекен ҫул ҫине тухнӑ та МТЗ 82 тракторпа ҫапӑннӑ. Ҫав самантра трактор сулахай еннелле пӑрӑннӑ.

ҪҪХПИ пӗлтернӗ тӑрӑх, аварире микроавтобус водителӗ аманнӑ.

mobillegends.net сӑнӳкерчӗкӗ

ИНН свидетельствине хальхи вӑхӑтрал онлайн мелпе илме пулать. Тепӗр майлӑ каласан, асӑннӑ хут кирлисен Налук инспекцине кайса ҫӳремесен те.

Шупашкар хулинче пурӑнакансем ҫӗнӗлӗхпе хастар усӑ кураҫҫӗ. Кӑҫалхи ҫур ҫулта ҫеҫ хулари 4,5 пин ытла ҫын ИНН свидетельствине илме кӑмӑл тунӑ, вӗсенчен 598-шӗ — налук органне каймасӑр.

Онлайн-пулӑшупа усӑ курас тесен Раҫҫейӗн Налук службин сайтне кӗмелле те «Личный кабинет налогоплательщика для физических лиц» (чӑв. Уйрӑм ҫынсем валли налук тӳлекенсен уйрӑм пӳлӗмӗ) сервиса суйламалла. Унта ИНН тӳлевсӗр уҫласа илме май пур. ИНН илес тесен заявление ҫырма «Жизненные ситуации» (чӑв. Пурнӑҫри лару-тӑру) ярӑма кӗмелле.

Яндекс.дзен сайтри сӑн

Шупашкарта «Садовый» тата «Байконур» микрорайонсен хушшинче хир сысни ҫӳренине асӑрханӑ. Вӑл пӗчченех пулнӑ.

Специалистсем ӑнлантарнӑ тӑрӑх, ӑна апат-ҫимӗҫ юлашкийӗсем илӗртме пултарнӑ. Тепӗр тесен, ҫав вӑрманлӑ ҫырма тискер чӗрчунсемшӗн лайӑх вырӑн. Унта вӗсем пурӑнаяҫҫӗ. Анчах ҫынсемшӗн хӑрушлӑх кӑларса тӑратмаҫҫӗ.

Сӑмах май, нумаях пулмасть Шупашкарта хир качаки Мускав проспектне тухнӑ. Шел, ӑна машина ҫапса хӑварнӑ, чӗрчун вилнӗ. Хир качакисем унашкал вырӑна тухсан ҫухалса каяҫҫӗ, унталла-кунталла чупма пуҫлаҫҫӗ, стреса пула та вилме пултараҫҫӗ.

realtagil.ru сайтри сӑн

Чӑвашстат пӗлтернӗ тӑрӑх, кӑҫалхи ҫу уйӑхӗнче республикӑри ӗҫлекен ҫын вӑтамран 39 пин те 999 тенкӗ шалу илнӗ. Пӗлтӗрхипе танлаштарсан, вӑтам ӗҫ укҫи 14,3 процент ӳснӗ. Ку инфляцирен 6,2 процент нумайрах. Ҫапла пӗлтерет ведомство.

Камсен шалӑвӗ пысӑкрах-ха? Финансистсем - 58 пин, страхлав агенчӗсем - 56 пин, ӑсчахсемпе айтишниксем 54 пин тенкӗ илеҫҫӗ.

Лесниксен, ҫӗвӗҫсен, сӗтел-пукан тӑвакансен шалӑвӗ - чи пӗчӗкки.

medicin.cap.ru сӑнӳкерчӗкӗ

Ҫу пуҫланнӑранпа Республикӑн ача-пӑча клиника больницине 7 ачана ҫӗлен сӑхнӑран илсе пынӑ. Вӗсене хура ҫӗлен сӑхнӑ. Шар курнисенчен чылайӑшӗ — 10 ҫула ҫитичченхи ачасем. Вӗсене пурне те тухтӑрсем тивӗҫлӗ пулӑшу кӳнӗ.

«Хура ҫӗлен сӑхнӑ пациентсене пурне те наркӑмӑшран ятарлӑ сывортка янӑ. Ачана больницӑра мӗн чухлӗ вӑхӑт тытасси унӑн сывлӑхӗнчен килет», — ӑнлантарса панӑ йышӑну уйрӑмӗн заведующийӗ Надежда Жукова.

Сӑмах май каласан, ҫӗлене курсан ӑна пырса тӗкӗнмелле мар, шӑппӑн кӑна айккинелле пӑрӑнмалла.

Инкелӗ лару-тӑру министерстви тунӑ сӑн

Ӗнер каҫхи 6 сехетре Шупашкар районӗнчи Чӑрӑшкассинче чутах ҫурт ҫунса кайман.

Инкеклӗ лару-тӑру министерстви пӗлтернӗ тӑрӑх, пушар 53 ҫулти хӗрарӑмӑн килӗнче тухнӑ. Ҫулӑм маччана сиенлетнӗ, япаласен, сӗтел-пуканӑн пӗр пайне тӗп тунӑ.

Пушарнӑйсем ҫулӑма ҫур сехетрен сӳнтернӗ, кил-ҫурта сыхласа хӑварма пултарнӑ. Кил хуҫи хӗрарӑмӗ, ҫемьери ытти ҫынсем шар курман.

Ҫулталӑк пуҫланнӑранпа республикӑра 878 пушар пулнӑ, вӗсенче 39 ҫын вилнӗ.

goodfon.ru сайтри сӑн

Юлашки вӑхӑтра Шупашкарти лавккара мӗнле ҫимӗҫсем, япаласем йӳнелнӗ? Тӳре-шара хаксене кашни эрнерех тишкерсе тӑрать.

Утӑ уйӑхӗн 19-26-мӗшӗсенче лавккасенче хӑш-пӗр ҫимӗҫсем самай йӳнелнӗ. Тӗслӗхрен, аш-какай консервӗн хакӗ - 150 тенкӗ, ҫӑратнӑ сӗт - 50 тенкӗ, услам ҫу - 25 тенкӗ, шурӑ ҫӑнӑх 12 тенкӗ чакнӑ. Ҫавӑн пекех купӑста, пулӑ консервӗ, сахӑр, кишӗр, сухан кӑштах йӳнелнӗ.

Хальхи вӑхӑтра сахӑра 64-89 тенкӗпе сутаҫҫӗ. Ҫӗрулмипе 27-75 тенкӗпе сутаҫҫӗ.

punkt-a.info сайтри сӑн

Чӑваш халӑх сайтӗнче тин кӑна Канаш районӗнче пӗвере арҫын путса вилни пирки пӗлтернӗччӗ. Паян республикӑра каллех инкек пулнӑ. Ҫӗмӗрлере пӗвере 37 ҫулти арҫын виллине тупнӑ.

Малтанлӑха пӗлтернӗ тӑрӑх, арҫын юраман вырӑнта шыва кӗнӗ.

Инкеклӗ лару-тӑру министерстви пӗлтернӗ тӑрӑх, республикӑра юлашки талӑкра икӗ ҫын шыва путса вилнӗ.

Ҫак кунсенче ҫаннталӑк шӑрӑх тӑрать. Ӑшӑ кунсенче ватти-вӗтти тенӗ пек шыва кӗме юратать. Анчах, шел те, ҫак киленӗҫ хш чухне инкекпе вӗҫленет.

Утӑ уйӑхӗн 28-мӗшӗнче Канаш районӗнчи Асхва ялӗнче пӗр арҫын шар курнӑ. Вӑл ялти пӗвене путса вилнӗ.

Республикӑн Шыравпа ҫӑлав службинче пӗлтернӗ тӑрӑх, инкек вырӑннӗ ҫӑлавҫӑсем пырса ҫитнӗ. Путса вилнӗ ҫынна шыраса тупма вӗсем эхолотпа усӑ курнӑ. Вилене полицейскисене панӑ.