ШӖМ тунӑ сӑн

Паян ирхине Шупашкарта 65-мӗш маршрутпа ҫӳрекен микроавтобус юпа ҫине пырса тӑрӑннӑ. Ку Сӗнтӗрвӑрри ҫулӗ ҫинче пулнӑ.

Маршрутка ҫул ҫинчен тухса кайса юпана пырса тӑрӑннӑ. Юрать-ха, айккинчен кӑна. Авари вӑхӑтӗнче салонра 8 пассажир тата водитель пулнӑ.

Водитель каланӑ тӑрӑх, маршруткӑн тормоз ӗҫлеме пӑрахнӑ. Вӑл манипулятора пырса тӑрӑнас мар тесе сылтӑмалла пӑрӑннӑ, автобуса сӳнтернӗ. 27-ри тата 37ри хӗрарӑмсем, 59 ҫулти водитель аманнӑ.

ЧР прокуратури халӗ ку ӗҫ-пуҫа тӗрӗслет.

Литература музейӗн страницинчен илнӗ сӑнӳкерчӗк

Ака уйӑхӗн 17-мӗшӗнче чӑваш халӑх поэчӗ Ҫемен Элкер (1894-1966) ҫуралнӑранпа 130 ҫул ҫитнине халалласа литература каҫӗ иртӗ. Ӑна Шупашкарти К.В. Иванов ячӗллӗ Литература музейӗ йӗркелет. Литература каҫӗ 14 сехетре пуҫланӗ. Ҫав кунах музей «Ушкӑн ҫӑлтӑрӑн асли» курав уҫма палӑртать. Вӑл поэтӑн кӗнекисемпе тата сӑнӳкерчӗкӗсемпе паллаштарӗ.

Ҫемен Элкер 1894 ҫулхи ҫу уйӑхӗн 1-мӗшӗнче хальхи Йӗпреҫ муниципаллӑ округне кӗрекен Апакасси ялӗнче ҫуралнӑ. Вырӑнти пуҫламӑш шкулта учительте, каярах «Канаш» хаҫатра тата «Сунтал» журнлата, Чӑваш кӗнеке издательствинче илемлӗ литература енӗпе аслӑ редакторта тӑрӑшнӑ.

Ҫемен Элкер — поэт, прозаик, драматург, публицист.

forum.na-svyazi.ru порталтан илнӗ сӑнӳкерчӗк

Паян Шупашкарта пӗр арҫын хӗрарӑма ҫӳҫрен тытса сӗтӗрнӗ. Пӑтӑрмах Бзаа проездӗнче пулса иртнӗ.

«Land Cruiser М407МК 21рус» машина водителӗ ҫамрӑк хӗрарӑма машинӑран тӗксе кӑларса янӑ, унтан ӑна ҫапнӑ, кайран ҫӳҫӗнчен тытса ҫӗр тӑрӑх сӗтӗрнӗ, унтан вӑйпа машинӑна кӗртсе лартнӑ.

Cheb.ru пӗлтернӗ тӑрӑх, право хуралӗн тытӑмӗнче ӗҫлекенсем малтан машинӑна тупнӑ. «Лэнд Крузер» авомобиль коопераци институчӗ ҫывӑхӗнчи ҫӗр айӗнчи паркингра ларнӑ. Кӗҫех арҫынна та тытса чарнӑ. Вӑл ҫав вӑхӑтра урама ачапа уҫӑлма тухнӑ.

«Ҫыхӑнура» форума малтанласа пӗлтернӗ тӑрӑх, шар курнӑ хӗрарӑм — арҫыннӑн гражданла арӑмӗ. Арҫын унччен Чӑваш Енӗн Патшалӑх Канашӗн депутачӗн пулӑшуҫи пулнӑ.

https://vk.com/wall111960967_1601 постран илнӗ сӑнӳкерчӗк

Леонид Антонов поэт-агроном 85 ҫул тултарнине халалласа «Улӑп-2024: Эпир Улӑп йӑхӗнчен» вӑйӑ-конкурс ирттерме йышӑннӑ. Кун пирки «Контактра» халӑх тетелӗнче пӗлтернӗ.

Унта хутшӑнакансен Леонид Антонов поэт-агроном ӑҫта тата хӑҫан ҫуралнине, пулас поэт ӑҫта-ӑҫта вӗреннине, вӑл мӗншӗн агроном профессине суйланине, сӑвӑ ҫырасси унӑн хӑҫан пуҫланнине, ун пирки: «Кунтан Есенин пулать», — тесе кам каланине, сӑвӑ ҫырма ӑна мӗн хавхалантарнине тата ыттине пӗлмелле.

Антон Кротовӑн страницинчен илнӗ сӑнӳкерчӗк

Чӑваш Енӗн наци вулавӑшӗнче ака уйӑхӗн 9-мӗшӗнче Мускаври Антон Кротов ҫулҫӳревҫӗпе тӗлпулу иртессине эпир унччен пӗлтернӗччӗ.

Унта ҫак йӗркесен авторӗ те пулса курчӗ, ҫулҫӳревҫӗ каласа кӑтартнине ҫӑвара шыв сыпнӑн итлесе ларчӗ. Пӗр сехет ҫурӑна пынӑ тӗлпулу пӗр самантӑн туйӑнчӗ.

Антон тӗнче тӑрӑх курса ҫӳреме тытӑннӑранпа 33 ҫул иртн. Ҫв хушӑра вӑл тӗрлӗ материк ҫинчи 146 ҫӗршывра пулнӑ. Афикӑна 9 хутчен ҫитнӗ. Унтан черетлӗ хутчен вӑл кӑҫалхи пуш уйӑхӗнче таврӑннӑ.

48 ҫулти Антон Кротов — ирӗклӗ ҫулҫӳревҫӗ. Вӑл автостоп меслечӗпе е йӳнӗ транспортпа усӑ курать. Африкӑна илсен унти хӑш-пӗр вырӑнта питех те чухӑн пурӑнакансем ырӑ кӑмӑллине палӑртса хӑварчӗ ҫулҫуревҫӗ.

afisha.cheb.ru порталтан илнӗ сӑнӳкерчӗк

Ӗнер, ака уйӑхӗн 9-мӗшӗнче, Шупашкарти трактор тӑвакансен культура керменӗнче «Время первых» (чӑв. Пӗрремӗшсен вӑхӑчӗ) концерт иртнӗ. Ӑна пирӗн мухтавлӑ ентешӗмӗр Андриян Николаев лётчик-космонавт ҫуралнӑранпа 95 ҫул ҫитнине халалланӑ.

Ентешӗмӗр — тӗнчери виҫҫӗмӗш космонавт. Унӑн ячӗпе эпир тивӗҫлипе мӑнаҫланма пултаратпӑр. Вӑл орбитӑра скафандрсӑр пӗрремӗш хут ӗҫлесе пӑхнӑ, космосри ҫар сӑнавне хутшӑннӑ.

Концерта культура ҫуртӗнчи пултарулӑх коллективӗсем хутшӑннӑ. Вӗсем космос, авиаци тата паттӑрлӑх ҫинчен юрланӑ. Илемлӗ ташӑ тата хореографи номерӗсем хатӗрленӗ. Программа хӑнисем те пулнӑ. Вӗсем — «Каприс» халӑх вокал ансамблӗ тата «Мадригал» халӑх академи камера хорӗ.

yaplakal.com сайтри сӑн

Мускаври ВДНХра иртекен «Раҫҫей» курав-форумра кӗҫех республикӑри муниципалитетсем ӗҫӗ-хӗлӗпе, культурипе, туризм илӗртӳлӗхӗпе, инвестици потенциалӗпе паллаштарӗҫ. Чи малтан, ака уйӑхӗн вӗҫӗнче, Патӑрьел муниципаллӑ округӗ хӑйӗн экспозицине кӑтартӗ.

Хальхи вӑхӑтра куравра ЧР Цифра тата Спорт министерствисем ӗҫлеҫҫӗ. 75-мӗш павильонра регионти МИХсемпе паллашма, фиртуаллӑ форматпа усӑ курса наци чӗлхине вӗренме пулать.

Спорта юратакансем вара хӑйсен вӑйне силомерпа тӗрӗслеме пултараҫҫӗ. Ҫавӑн пекех виртуаллӑ ринга тухса кӗрешӳ енӗпе ӑмӑртӑва хутшӑнма май пур.

ШӖМ тунӑ сӑн

Ӗнер, ака уйӑхӗн 9-мӗшӗнче, Шупашкарта 35-мӗш маршрутпа ҫӳрекен водитель тӑрук чарӑннӑ та 23 ҫулти хӗрарӑм шар курнӑ. Вӑл ача кӗтет.

Ку Мускав проспектӗнче пулнӑ. Кӑкӑрӗ тӗлӗнчен суранланнӑскере пульницӑна илсе кайнӑ. Медпулӑшу панӑ хыҫҫӑн ӑна киле янӑ.

Автобус рулӗ умӗнче ларнӑ 49 ҫулти водитель тӗлӗшпе вара Патшалӑх автоинспекцийӗн инспекторӗсем административлӑ материал ҫырнӑ.

gbu-ubutovo.ru сайтри сӑн

Паянтан республикӑра пушарпа кӗрешмелли ятарлӑ режим вӑя кӗнӗ. Ӑна ятарлӑ йышӑну кӑларсан кӑна пӑрахӑҫлӗҫ.

Ҫак тапхӑрта вӑрманта кӑвайт чӗртме, какай ӑшалама, вӑрман ҫывӑхӗнче, ял хуҫалӑх пӗлтерӗшлӗ уй-хирте ҫӳп-ҫап, типӗ курӑк ҫунтарма юрамасть. Пушар тухас хӑрушлӑх 4-мӗш тата 5-мӗш шая ҫитсен ҫынсене вӑрмана кӗртме пӑрахӗҫ. Пушар тухас хӑрушлӑх пысӑк вырӑнсенче патруль кӑларма палӑртнӑ.

Йӗркене пӑснӑшӑн ахаль ҫынсен – 20 пин таран, должноҫри ҫынсен – 60 пин таран, организацисен 800 пин тенкӗ таран штраф тӳлеме тивӗ.

Ҫу уйӑхӗнчен пуҫласа санавиаци вертолечӗ пациентсене илсе ҫӳреме пуҫлӗ. Контрактпа килӗшӳллӗн, вӑл ҫу уйӑхӗн 1-мӗшӗнчен вӗҫме тытӑнӗ.

Санавиаци раштав уйӑхӗн 1-мӗшӗччен ӗҫлӗ. Контракта 35 миллион та 943 пин те 131,1 тенкӗлӗх алӑ пуснӑ. Организаци пӗр ҫуллахи сехете 223,1 пин тенкӗпе вӗҫме килӗшнӗ. Пӗлтӗр пӗр сехет 219 пин тенкӗ тӑнӑ.

Палӑртмалла: 2020 ҫултанпа санавиаци вертолечӗпе 325 пациента пульницӑна илсе ҫитернӗ. Хальхи вӑхӑтра республикӑра вертолет анса лармалли ултӑ лапам пур.