Атӑл леш енче ҫӗтсе кайнӑ хӗрарӑма ҫӗрӗпе шыранӑ. Ҫакӑн пирки Чӑваш Ен Шалти ӗҫсен министерстви пӗлтернӗ. Хӗрарӑм «Заволжье» пахча юлташлӑхӗ тӗлӗнче ҫӗтсе кайнӑ. Дачӑран таврӑнакан арӑмӗ ҫухални ҫинчен унӑн упӑшки йӗрке хуралҫисене пӗлтернӗ.

Йӑлӑмри вӑрмана Шалти ӗҫсен министерствин ӗҫченӗсем, вӗсен йышӗнче виҫӗ кинолог пулнӑ, тухса кайнӑ. Инкеклӗ ӗҫсен министерствинче тӑрӑшакансем, ҫавӑн пекех «Лиза Алерт» шырав организацийӗн хастарӗсем те хӗрарӑма шыранӑ.

Дачӑран таврӑнакан хӗрарӑм карас телефонӗсӗр пулнӑ. Ӑна, ҫӗтсе кайнӑскерне, ҫӗрӗпе шыранӑ. Вӑрманта, Атӑл ҫыранӗ хӗрринче. Ирхи пиллӗкре ӑна волонтерсем тупнӑ. ЧР Шалти ӗҫсен министерствин пресс-службинче пӗлтернӗ тӑрӑх, пенси ҫулӗнчи хӗрарӑм таса сывах пулнӑ.

https://21.xn--b1aew.xn--p1ai/news/item/18745476/

Юпа уйӑхӗн 26-мӗшӗнче 19 сехет те 40 минутра «Атӑл» М-7 федераци ҫулӗ ҫинче пилӗк машина инкеке лекнӗ.

Чӑваш Енӗн Шалти ӗҫсен министерстви пӗлтернӗ тӑрӑх, ГАЗ-3009А1 автофургон водителӗ ҫула май каякан ГАЗ-2705 машинӑпа ҫапӑннӑ. Лешӗ «Лада-111730» маркӑллӑ автомобиле пырса тӑрӑннӑ. Унтан микроавтобус хирӗҫ ҫул ҫине тухса кайнӑ, унта «Шевроле-Круз» машинӑпа ҫапӑннӑ. «Калина» «Ман» фура ҫине пырса тӑрӑннӑ.

Малтанласа шухӑшланӑ тӑрӑх,

автофургон рулӗ умӗнчи 61 ҫулти Шупашкар арҫынни пӗр машинӑпа тепӗр машина хушшинчи инҫӗше тытса пыман. Сурана пула вӑл вырӑнтах вилнӗ. Микроавтобусӑн суранланнӑ водительне васкавлӑ пулӑшу машини пульницӑна илсе кайнӑ. Инкек сӑлтавне специалистсем тӗплӗн тишкерсе палӑртӗҫ.

Чӳк уйӑхӗн 11–20-мӗшӗсенче Шупашкарти театр форумӗ иртӗ. Вӑл Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче пулӗ.

2019 ҫулти форум вӑхӑтӗнче ҫамрӑк куракансен наци театрӗсен «Атӑл юмахӗ» пӗтӗм Раҫҫейри фестивалӗ (Волжская сказка) тата ачӑ-пӑча наци драматургийӗн «От чистого истока в прекрасное далёко» (чӑв. Таса ҫӑлкуҫран хӳхӗм инҫете) пӗтӗм тӗнчери лабораторийӗ ӗҫлӗ.

Фестивале Раҫҫейри тата ют ҫӗршыври 10 театр хутшӑнӗ. Ҫав шутра — Казахстанри Акмолинскри облаҫри драма театрӗ Кокшетау хулинчен килсе ҫитӗ. Казах халӑх юмахӗсем тӑрӑх лартнӑ «Канбак-шал» ӗҫпе паллаштарӗ ушкӑн. Пушкӑртстанран тӑватӑ театр килӗ. Тулӑри, Мордвари, Мари Элти театрсем те Шупашкарта хӑйсен пултарулӑхӗпе паллаштарӗҫ.

Ҫӗмӗрле хулинче юпа уйӑхӗн 26-мӗш каҫхине полицейскисем лӑпкӑ ыйхӑпа ҫывӑракан ҫынна ҫӗр хута вӑратса лартнӑ. Куншӑн арҫын питех те савӑннӑ, пакунлисене тав тунӑ.

Ҫав каҫхине, ҫурҫӗр иртни икӗ сехет тӗлӗнче, ШӖМӗн ҫул-йӗр инспекцийӗн ятарлӑ батальонӗн ӗҫченӗсем: полицин аслӑ лейтенанчӗ Василий Григорьев тата полицин лейтенанчӗ Сергей Ядранский — Ҫӗмӗрле хули тӑрӑх патрульпе ҫӳренӗ. Джержинский урамӗнче вӗсем пӗр ҫуртран тӗтӗм тухнине асӑрханӑ. Полицейскисем алӑкран тата чӳречесенчен шаккама тытӑннӑ. Вӗсем унта шалта ҫын пур пуль тесе шухӑшланӑ. Чӑн та, йӑнӑшман. 59 ҫулти арҫын пулнӑ. Часах ҫулӑм пурӑнмалли пӳрте ярса илнӗ. Полицейскисем кӳршӗсене те вӑратнӑ. Пушарпа кӗрешекенсене те вырӑна чӗнсе илнӗ. Вӗсем «хӗрлӗ автана» алхасма паман.

Кил хуҫи мунча хутнӑ иккен, хӑй ҫывӑрса кайнӑ.

Ҫак эрнере Шупашкарта тепӗр ача пахчи уҫӑлнӑ. Хӗрлӗ хӑйӑва касма Чӑваш Ен Элтеперӗ Михаил Игнатьев, Шупашкар хула администрацийӗн пуҫлӑхӗ Алексей Ладыков, РФ Патшалӑх Канашӗн депутачӗ Леонид Черкесов тата ытти тӳре-шара хутшӑннӑ.

«Планета детства» (чӑв. Ачалӑх планети) ят панӑ 207-мӗш номерлӗ ача пахчине. Вӑл Шупашкарти Сад микрорайонӗнче вырнаҫнӑ. Тата тӗрӗсрех каласан, унти Чаломей академик урамӗнче. Ҫӗнӗ микрорайонта пурӑнакансем ку учреждение тахҫанах кӗтнӗ. Кӑҫал, сӑмах май, пирӗн республикӑра тӑватӑ ҫӗнӗ ача пахчи уҫӑлнӑ. 2013 ҫултанпа вара 44 ача пахчи хута янӑ.

«Ачалӑх планетине» тума 148 миллион тенкӗ тӑкакланнӑ. Ку учреждение пурӗ 240 ача ҫӳрӗ. Унта пӗтӗмпе 12 ушкӑн пулӗ.

cap.ru сайтри сӑн

Канаш районӗнчи Шӑхасан ялӗнче Ҫӗнтерӳ паркне ҫӗнетеҫҫӗ. Ӑна ҫитес ҫул, Аслӑ Ҫӗнтерӳ пулнӑранпа 75 ҫул ҫитнӗ чух, уҫма палӑртаҫҫӗ.

Шӑхасанти парка «Хулана хӑтлӑх кӗртесси» патшалӑх программипе килӗшӳллӗн тӑваҫҫӗ. Ку тӗллевпе хыснаран 8 миллион тенкӗ уйӑрнӑ.

Палӑкпа юнашар Тӑван ҫӗршывӑн Аслӑ вӑрҫинче пуҫ хунӑ паттӑрсен ячӗсене ҫырна стена лартасшӑн. Ҫуркунне парка чечексем лартса илемлетесшӗн.

Палӑртмалла: Чӑваш Енре пӗтӗмпе 1382 асӑну объекчӗ шутланать.

НТВ тунӑ видео скринӗ

НТВ федераци телеканалӗпе Чӑваш Енре пурӑнакан хӗрарӑм пирки сюжет кӑтартнӑ. Вӑл Чернобыльти аварие пӗтернӗ ҫӗрте ӗҫленӗ арҫыннӑн мӑшӑрӗ, халӗ тӑлӑх арӑм.

Хайхискер пурӑнмалли ҫурт-йӗре лайӑхлатмашкӑн 2016 ҫулта регионти влаҫран пулӑшӑва, укҫа-тенке, тивӗҫнӗ. Каярахпа, 2 ҫултан, тӳре-шара унӑн мӑшӑрӗ аварие пӗтернӗ ҫӗрте ӗҫлемен тесе укҫана, 1,5 миллион тенке, каялла илме шутланӑ. Следстви комитечӗ халӗ ҫакӑ саккунпа килӗшсе тӑнипе тӑманнине тӗрӗслет. НТВ телеканалпа шӑпах ҫакӑн пирки каласа кӑтартнӑ.

Сюжет ӗнер, юпа уйӑхӗн 25-мӗшӗнче, эфира тухнӑ.

cap.ru сайтри сӑн

Юпа уйӑхӗн 26-мӗшӗнче Канаш районӗнчи Ҫеҫпӗл ялӗнче пӗлтерӗшлӗ мероприяти иртнӗ. Ӑна Ҫеҫпӗл Мишши ҫуралнӑранпа 120 ҫитнине халалланӑ.

Кризис вӑхӑтӗнче Ҫеҫпӗл кӑвайчӗсем сӳннӗ, халӗ вӗсене ҫӗнӗрен чӗртме вӑхӑт ҫитнӗ. «Ҫеҫпӗл кӑвайчӗсем» поэзи фестивалӗ Валери Туркай пуҫарнипе йӗркеленнӗ. Пӗрремӗш хутчен вӑл 1996 ҫулта иртнӗ. Фестиваль пулас поэтсен шкулӗ пулса тӑнӑ.

Кӑҫал фестивале сӑвӑ вулама тӗрлӗ районтан килнӗ. Хӑнасене Ҫеҫпӗл Мишши музейӗ умӗнче ҫӑкӑр-тӑварпа кӗтсе илнӗ. Унтан пурте шала кӗнӗ, поэт пултарулӑхӗпе тата пурнӑҫӗпе паллашма та ӗлкӗрнӗ.

Никита Тӗнче Настя мӑшӑрӗпе тата ҫулталӑкри Айя хӗрӗпе велосипедпа черетлӗ ҫулҫӳреве тухса кайнине Чӑваш халӑх сайчӗ пӗлтернӗччӗ. Европӑра виҫӗ уйӑх пулма виза илнӗскерсем ҫав вӑхӑтра тӗрлӗ ҫӗршывра: Финляндинче, Данинче, Германинче, Голландире, Бельгире, Францинче, Испанире... пулнӑ хыҫҫӑн Барселонӑран паромпа Мароккӑна каҫнӑ. Халӗ ҫемье Америкӑна ҫитме ӗмӗтленет.

«Ултӑ уйӑхра велосипедпа 6000 километр ҫӗнтӗмӗр, 10 ҫӗршывра пултӑмӑр. Халӗ урӑх континента вӗҫсе кайма вӑхӑт ҫитрӗ. Умра — Ҫурҫӗр Америка. Унта кайма 90 пине яхӑн тенкӗ укҫа кирлӗ. Чӑваш Енре пурӑнакан кашни ҫын ҫичшер пус пухсан пухӑнӗ вӑл», — ҫапларах ҫырнӑ Никита Тӗнче.

Хӑйсен реквизичӗсене те кӑтартнӑ:

Перекет банкӗн картти: 4274 3200 2242 6921, карта счӗчӗ 408 17 810 5 75006116980.

ЯндексУкҫа: 410012061366155 е money.yandex.ru/to/410012061366155.

QIWI: +79083061044.

WebMoney: WMR - R690833511024 (тенкӗ валли), WMZ - Z538280066903 (доллар валли).

PayPal: nikita@tenche-travel.ru.

forum.na-svyazi.ru сайтран илнӗ сӑнӳкерчӗк

Шупашкарти «Университет» микрорайонти стройкӑра рабочи сарӑмсӑр вилнӗ.

Инкек юпа уйӑхӗн 24-мӗшӗнче, ӗнер, Миначев урамӗнчи нумай хваттерлӗ ҫуртӑн строительстви лапамӗнче пулнӑ. Керамика плиткин упаковкине 12-мӗш хута хӑпартнӑ чухне пӗри аялалла ӳкнӗ. Вӑл шӑпах субподряд организацийӗнче ӗҫлекен рабочи пуҫӗ ҫине персе аннӑ.

1964 ҫулта ҫуралнӑ арҫын йывӑр сурансене пула ҫавӑнтах сывлама пӑрахнӑ. Халӗ РФ Следстви комитечӗ следстви умӗнхи тӗрӗслев ирттерет.