Егоров Пётр Егорович

Ҫапларах пӗлтерет гуманитари ӑслӑлӑхӗсен институчӗ. Чӑвашла энциклопеди пурри пирки пӗлетӗр пулӗ? Темиҫе ҫул каялла унӑн 4-мӗш томӗ пичетленсе тухнӑччӗ. Каярах институтра ҫав энцилопедийӗн электронлӑ вариантне йӗркеленӗ. Енчен те хут ҫинчи информацие ҫӗнетме тата улӑштарма хӗнтерех пулсан — электронлине институтра ҫӗнетсех тӑраҫҫӗ. Тӗрӗс информаци те пухма тӑрӑшаҫҫӗ.

Ҫак кунсенче Егоров Пётр Егоровичран ҫыру килнӗ иккен. Ватӑ генерал-майор — вӑл 102 ҫула кайнӑ — хӑй аллипе ҫырса хуравланӑ. Ҫырӑвӗнче вӑл хӑйӗн пирки ҫирӗплетекен фактсене илсе панӑ, кун-ҫулӗнчи паллӑ саманчӗсене уҫса панӑ. Ҫырупа институт сайтӗнче паллашма пулать.

Егоров Пётр Егорович 1913 ҫулхи утӑн 12-мӗшӗнче Шупашкар районӗнчи Тутаркасси ялӗнче ҫуралнӑ. 1933 ҫулта Балашовори авиаци шкулне вӗренсе пӗтернӗ. 1937–1941 ҫулсенче Амур облаҫӗнчи Свободный, Тында, ҫавӑн пекех Ҫӗнҫӗпӗрпе (выр. Новосибирск) Хабаровск хулисенчи аэропорчӗсенче вӗҫевҫӗ пулнӑ. Тӑван ҫӗршывӑн Аслӑ вӑрҫи вӑхӑтенче Инҫет хӗвелтухӑҫри граждан авиацийӗн управленийӗнче тӑрӑшнӑ. 1945 ҫултанпа авиаци ушкӑнӗсен штаб начальникӗ пулнӑ. 1973–1988 ҫулсенче Мускавра пурӑннӑ, Внуково аэропортӗнче ӗҫленӗ, ҫав вӑхӑтрах ҫар академийӗнче ҫамрӑксене вӗрентнӗ. 1988 ҫулта Хабаровска таврӑннӑ. Халӗ те унтах пурӑнать. Хӑй вӑхӑтӗнче вӑл ЧНК Хабаровск енӗнчи элчи пулнӑ. Пётр Егорович темиҫе кӗнеке авторӗ пулнине те манмалла мар.

#ЧПГӐИ, #энциклопедисем, #Хабаровск, #Хабаровск енӗ, #ҫырусем, #хуравсем, #Шупашкар районӗ, #Тутаркасси