Россельхознадзор сивӗтнӗ краб патакки валли чӗртавра сахаллине асӑрханӑ-мӗн. Ҫакна ведомство Америкӑри Пӗрлешӳллӗ Штатсенчен ҫак ҫимӗҫе кӳрсе килме чарнипе сӑлтавлать имӗш.

«Пирӗн ку чӗртаварпа тивӗҫтерме пултаракан урӑх ҫӗршыври предприятисен майӗсене хакламалла. Ун пек ҫӗршывсенче йӗркеллӗ ӗҫлекен ветеринари служби пулсан унпа тивӗҫтерме эпир ҫул уҫма хатӗр. Иккӗленсен хамӑр инспекторсене те ярӑпӑр», — тенӗ Россельхознадзор пуҫлӑхӗн пулӑшаканӗ Алексей Алексеенко.

Ведомство Пулӑ пӗрлешӗвӗнчен Азипе Лӑпкӑ океан регионӗнчи предприятисен майӗсем пирки пӗлтерме ыйтнӑ.

АПШран япала кӳрсе килме чариччен минтай суримипе (краб патаккине унран тӑваҫҫӗ) тивӗҫтерекен тӗп ҫӗршыв пулнӑ. Унран паха краб патакки хатӗрлеме май килнӗ иккен.

Ҫав вӑхӑтрах Инҫет Хӗвелтухӑҫ хӑвачӗ — 8–9 пин тоннӑна яхӑн. Шалти пасарта туянакансем ҫуккине кура асӑннӑ тӑрӑхра 35% кӑна усӑ кураҫҫӗ. Кӑнтӑр-Хӗвелтухӑҫ Азирен сурими кӳрсе килме тытӑнсан Америка минтайӗн фаршне вӑрттӑн майпа пирӗн пата кӳрсе килес хӑрушлӑх пур тесе Минтай кӑларакансен ассоциацийӗн президенчӗ Герман Зверев.

#Раҫҫейре, #апат-ҫимӗҫ, #краб патакки, #чарусем, #АПШ