Виҫҫӗмӗш ҫул ӗнтӗ Чӑваш чӗлхи кунне халалласа Трак-Красноармейски тӑрӑхӗнче тӑван чӗлхепе литература вӗрентекенсен творчествӑлла ушкӑнӗ йӗркеленипе (ертӳҫи – Михайлова З.П.) чӑваш чӗлхипе грамматикине лайӑх пӗлекен ачасем хушшинче «Ҫамрӑк ӑсчах» вӑйӑ-конкурс иртет. Проект авторӗ – Красноармейски иккӗмӗш шкулӗнче чӑваш сӑмахлӑхне вӑрентекен Михайлов Виталий Михайлович.

Кӑҫал та вӑйӑ-конкурс виҫӗ турпа иртрӗ. Пӗрремӗш тур районти шкулсенче 10-мӗш класс вӗренекенӗсем хушшинче иртрӗ. Унта кашни шкулта чӑваш чӗлхине чи лайӑх пӗлекене палӑртрӗҫ. Шкулта ҫӗнтернисем (вӗсем пурӗ вуннӑн) иккӗмӗш турта хӑйсен пӗлӳ шайне кӑтартрӗҫ.. Вӗсем чӗлхе наукин лексика, фразеологи, лексикографи, фонетика, морфологи, сӑмах пулӑвӗ, синтаксис, пунктуаци пайӗсене тишкерчӗҫ. Вунӑ ачаран пиллӗкӗшӗ чи матуррисем пулчӗҫ. Вӗсем вара финалта, 3-мӗш турта, тупӑшрӗҫ. Ачасем аналитикӑлла тата тӗпчев ӗҫне ҫывӑх ӑнлавсене тишкерчӗҫ. «Ҫамрӑк ӑсчах – 2009» вӑйӑ-конкурс ҫӗнтерӳҫин ятне Пикшик шкулӗнче 10-мӗш класра вӗренекен Анисимова Ольга ҫӗнсе илчӗ (учителӗ – Тихонова Л.А.). Ӑна «Ҫамрӑк ӑсчах – 2009» медаль тата I степеньлӗ Диплом парса чысларӗҫ. II степеньлӑ Диплома тата «Ҫамрӑк чӗлхеҫӗ – 2009» ята Упи шкулӗнче вӗренекен Егорова Наталия, Карай шкулӗнче вӗренекен Порфирьев Руслан, Алманч шкулӗнче вӗренекен Николаева Анастасия тата Трак чӑвашла-нимӗҫле гимназире вӗренекен Андреева Анастасия тивӗҫрӗ. III степенльӗ Диплома тата «Ҫамрӑк пӗлӳҫӗ – 2009» ята тепӗр пилӗк ача тивӗҫрӗ.

Ачасем тӑван чӗлхене юратни, ӑна вӗренме, пӗлме тӑрӑшни чуна савӑнтарать. Ку пулӑм чӑваш чӗлхи аталанасса, унӑн ӗмӗрӗ вӑрӑм пуласса шантарать.

Вӑйӑ-конкурс материалӗсемпе ҫакӑнта паллашма пулать: http://mixailov.21426s06.edusite.ru/p21aa1.html

#чӑваш чӗлхи, #Красноармейски районӗ, #шкулсем, #Упи, #Алманч, #Красноармейски