Хусан патшалӑх университечӗн профессорӗ Х.Ю.Миннегулов "Мэдэни пюмга" хаҫатра (2.01.2009) ҫырнинчен: "Ашмарин — паллӑ тюрколог. Вӑл тӗрӗк халӑхӗсен чӗлхине, литературине, сӑмахлӑхне тата йӑли-йӗркине тӗпченӗ. Унӑн ӑслӑлӑх ӗҫӗсенче чӑваш чӗлхине тата халӑх сӑмахлӑхне тӗпчесси пысӑк вырӑн йышӑнса тӑрать. Вӑл хатӗрленӗ 17 томлӑ «Чӑваш сӑмахӗсен пуххи» словарь питӗ пысӑк пӗлтерӗшлӗ. Ҫавӑн пекех Ашмарин аслӑ вӗренӳ шкулӗсенче чӑваш чӗлхине вӗрентме хатӗрленӗ программӑсем тӑвакан пуҫаруҫӑ пулнине те палӑртмалла.

Паянхи вӑхӑтра ЧПУ ректорӗ Л.П.Кураков ертсе пынипе чӑваш филологийӗпе культура факультечӗн преподавателӗсем чӑваш чӗлхипе литератури тата культури аталантӑр тесе пӗтӗм чунтан тӑрӑшаҫҫӗ. Чӑваш патшалӑх университечӗ те паянхи кун чӑваш чӗлхипе литературин специалисчӗсене хатӗрлекен тӗп вырӑн шутланать. Кунта ҫавӑн пекех диссертаци канашӗ те ӑнӑҫлӑ ӗҫлет. ЧПУри ӑсчахсен ӗҫӗсене Раҫҫейпе Тӗрӗк тӗнчинче аван пӗлеҫҫӗ. Чӑваш филологийӗпе культура факультечӗ ӑслӑлӑха аталантарас тесе чылай ӗҫсем тӑвать. Вӗсенчен пӗри — «Ашмарин вулавӗсем» ӑслӑлах конференцийӗ. Ҫулсерен иртекен ҫак конференцире Атӑлпа Урал тӑрӑхӗнчи ӑсчахсем хутшӑнаҫҫӗ. Ӑслӑлӑх статйисене ЧПУ кашнинчех уйрӑм кӗнекере пичетлесе кӑларать...»

Х.Ю.Миннегулов Чӑваш патшалӑх университечӗпе хӑй те чылайранпа ҫыхӑну тытать. Тӗрӗк чӗлхиллӗ халӑхсен хушшинчи ҫыхӑнусем ҫирӗп пулччӑр тесе тӑрӑшакан профессора эпир чунтан тав тӑватпӑр.

#чӑваш филологийӗпе культура факультечӗ, #Чӑваш патшалӑх университечӗ, #Шупашкар, #конференцисем, #Ашмарин вулавӗ