«Хыпар» хаҫат пӗлтернӗ тӑрӑх ҫак кунсенче Красноармейски районӗнчи Упи шкулӗнче Нестор Янкас ҫуралнӑранпа 100 ҫул ҫитнине халалланӑ литература каҫӗ иртнӗ. Уява Янкас премийӗн лауриачӗсем, Трак тӑрӑхӗнчи Шетмӗ Михали, Николай Ершов сӑвӑҫсем хутшӑннӑ.

Паллах, литература каҫӗ шкул ачисемсӗр иртмен — вӗсем пултаруллӑ сӑвӑҫӑн пурнӑҫӗпе паллаштарнӑ, унӑн сӑввисене пӑхмасӑр каласа панӑ. Унтан Упи культура ҫурчӗ ҫумӗнчи «Ҫавал» фольклор ушкӑнӗ «Ача-пӑча вӑййисем» программӑпа паллаштарнӑ.

Нестор Янкас 1909 ҫулхи нарӑсӑн 20-мӗшӗнче Красноармейски районне кӗрекен Янкасра ҫуралнӑ. Малтан пуҫламӑш шкулта, унтан Упири ултӑ ҫул веренмелли шкулта, каярахпа Ҫерпӳри икӗ сыпӑклӑ шкулта вереннӗ. 1928 ҫулта Шупашкарти типографи ҫумӗнчи ФЗО шкулӗнчен вӗренсе тухнӑ, типографире наборщикре ӗслеме тытӑннӑ. 1930 ҫулта «Сунтал» журнал редакцине куҫнӑ. 1932 ҫулта вӑл Самар хулине куҫса кайнӑ. 1934 ҫултанпа сӑвӑҫ Чӑваш АССР кӗнеке издательствинче кӗнеке калӑплакан редактор пулнӑ, унтан «Сунтал» журнал редакцийӗн ответлӑ секретарӗнче ӗҫленӗ.

Н. Янкас литература ӗҫне 1928 ҫулта хастарлӑн кӳленнӗ. Вӑл калавсемпе очерксем те ҫырнӑ, тӗрлӗ халӑх поэзине чӑвашла куҫарнӑ. Унӑн паллӑрах кӗнекисем: «Ирхи йӗрсем» (1931), «Сӑвӑсем» (1935, 1939), «Парне» (1940), «Иккӗмеш парне» (1941), «Катя» (1958), «Лирика» (1961).

#Красноармейски районӗ, #Упи, #Янкас, #литература, #шкулсем, #юбилейсем