Раиса Сарпи

Нумаях пулмасть Патӑрьел район администрацийӗн вӗрентӳ, социаллӑ аталану, хыпарлавпа тивӗҫтерӳ тата архив ӗҫӗн пайӗн хушӑвӗпе килӗшӳллӗн Нӑрваш Шӑхаль вӑтам шкулӗнче 3–11 классем хушшинче «Сарпи вулавӗсем» пултарулӑх кунӗ иртрӗ.

«Уява чӑваш сӑвӑҫи, пирӗн ентеш Раиса Сарпи хутшӑнни конкурса хутшӑнакансене хавхалантарчӗ, савӑнтарчӗ», — хыпарлать район администрацийӗ.

Конкурса районти 18 шкултан ҫӗре яхӑн вӗренекен хутшӑннӑ. Ачасем Раиса Сарпи сӑввисене чӑвашла тата вырӑсла илемлӗ вулассипе тупӑшнӑ. 3–4-мӗш классем хушшинче Татмӑш шкулӗнчи Александр Михайлов (вӗрентекенӗ — В.В. Солдатова), 5–6-мӗш классем хушшинче Пӑлапуҫ Пашьел шкулӗнчи Ксения Чернова (вӗрентекенӗ — В.И. Козлова), 7–8-мӗш классем хушшинче Туҫа шкулӗнчи Ирина Захарова (вӗрентекенӗ — И.З. Табакова), 9–11-мӗш классем хушшинче Патӑрьелӗнчи 1-мӗш шкулти Полина Ильичева (вӗрентекенӗ — В.Ф. Федорова) ҫӗнтернӗ.

«Раиса Сарпи сӑввисем тӑрӑх кӗвӗленӗ юрӑсем» номинацире 1-мӗш вырӑна Нӑрваш Шӑхаль вӑтам шкулӗнче 8-мӗш класра вӗренекен Елена Адикина (вӗрентекенӗ — Н.И. Павлова) тивӗҫнӗ.

«Раиса Сарпи хайлавӗсене инсценировкӑласа кӑтартасси» номинацире те Нӑрваш Шӑхаль вӑтам шкулӗнче вӗренекенсем палӑрнӑ. 5-мӗш класра вӗренекен пӗчӗк артистсем «Пукане» юмаха ӑста вылянӑ (пултарулӑх ертӳҫи — Н.И. Павлова вӗрентекен).

Ҫӗнтерӳҫӗсем пурте Патӑрьел районӗн администрацийӗн вӗрентӳ, социаллӑ аталану, хыпарлавпа тивӗҫтерӳ тата архив ӗҫӗн пайӗн дипломӗсене тивӗҫрӗҫ. Конкурса хутшӑнакансене Раиса Сарпи пурне те асӑнмалӑх парнесемпе хавхалантарнӑ.

#Сарпи вулавӗсем, #шкулсем, #Патӑрьел районӗ, #Нӑрваш Шӑхаль, #Татмӑш, #Пӑлапуҫ Пашьел, #Туҫа, #Патӑрьел