Юрӑ кӗнекисене эсир, паллах, пурте курнӑ. Ташӑ пуххисемпе вара паллашма тӳр килнӗ-и сире? Шупашкарти «Ҫӗнӗ вӑхӑт» издательствӑра ҫак кунсенче «Образцы танцевальных мелодий (для баяна и аккордеона)» вӗренӳ хатӗрӗ пичетленсе тухрӗ. Кӗнеке икӗ пайран тӑрать. Пӗрремӗшӗ — «Мелодии для музыкального оформления урока народно-сценического танца», тепри — «Мелодии народов Поволжья для хореографической постановки». Иккӗмӗш пайӗнче тӗрлӗ халӑх ташшисене ушкӑнӑн-ушкӑнӑн вырнаҫтарнӑ — чӑвашсен, тутарсен, ҫармӑссен, удмуртсен, мӑкшӑсен, калмӑксен тата пушкӑртсен ташӑ кӗввисем черетленнӗ. Чӑвашлисем: «Линкка-линкка», «Кай-кай Ивана», «Чӑваш кӑтрелӗ», «Савӑнӑҫ ташши», «Тури чӑвашсен ташши», «Ҫамрӑксен ташши» т.ыт.те. Пӗрремӗш пайра «Тӳнкки-тӳнкки», «Патӑрьелле тӑпӑртатни», «Хӗрсен ташши» пур. Кунтах тӗнчери паллӑ ташӑсен кӗввисене тупма пултаратӑр% «Краковяк», ”Гопак”, «Лезгинка», «Тарантелла», «Чардаш», «Летка-енка», «Барыня». Ку ҫеҫ-и! Инди, чикан, мексикан, испан, таджик, украин, молдаван, белорус халӑхӗсен ташӑ тӗслӗхӗсем те пур. Пӗри баянпа е аккордеонпа кӗввине каласа тӑтӑр, эсир вара — кӑмӑлӑра кура — ташша ярӑр, ташша ҫапӑр, ташша хуҫӑр, ташша илтерӗр. Вӑл та ку та пулмасан, ну унта кӑштах хуҫкаланса-ҫаврӑнкаласа илӗр хӑть. Пирӗн ҫӳлти хутри кӳршӗсем ҫав кӗнекене туянчӗҫ те — тӑпӑртатаҫҫӗ кӑна вӗт! Маччана йӑтсах антараҫҫӗ-ши ку шельмӑсем тетӗп! Люстрӑна виҫҫӗ илсе ҫакрӑм вӗт — каллех персе анать. Алла Пугачева пек: «Эй вы там, наверху-у-у!» тесе милкепе маччана шанлаттаратӑп е ҫӳлти хута чупса кайса алӑкне тӑрӑслаттаратӑп. Каккуй унта, ӳкӗте кӗртсе пулмарӗ! Ним тума аптранипе «Образцы танцевальных мелодий» кӗнекене хамӑр та туянтӑмӑр та ташша илтере пуҫларӑмӑр. Малтан хӑнӑхнисене — чӑвашлисене — сӳрӗмӗр кӑна! Халь чикансенне вӗрентӗмӗр те — тапӑрпа та гастроле кайма пултаратпӑр пуль.

Кай-кай-кай, мӗнле селӗм кӗнеке ҫырнӑ авторӗсем! Камсем тетӗр-и$ Ара, Чӑваш Республикинчи культура училищин аслӑ преподавателӗ Зоя Александрова тата Шупашкарти Ачасен 1-мӗш ӳнер шкулӗн преподавателӗ Татьяна Григорьева. Ташӑ лартас енӗпе пуян опыт пухнӑ пултаруллӑ вӗрентекенсем интереслӗ те усӑллӑ кӗнеке хатӗрленӗ. Кӗнекен ӑслӑлӑх редакторӗ — Чӑваш Республикин культурӑн тава тивӗҫлӗ ӗҫченӗ, Чӑваш патшалӑх университечӗн культурологи кафедрин доценчӗ Владимир Милютин, музыка редакторӗ — ЧР культурӑн тава тивӗҫлӗ ӗҫченӗ, Шупашкарти Ф.Павлов ячӗллӗ музыка училищин преподавателӗ Илья Сакмаров. Кӗнеке хуплашкине чӑвашла илемлетекенӗ — Чӑваш халӑх художникӗ Праски Витти.

«Образцы танцевальных мелодий» вӗрентӳ хатӗрӗ авторсен шучӗпе тухнӑ. Чӑваш Республикин культура министерстви ҫакӑн пек кӗнекесем валли нухрат тупаймасть-ши вара$ Ай-ай-ай???

#кӗнекесем, #культура