cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта паян пенсионерсене тӳлевсӗр концерт кӑтартнӑ.

Пӗр сехет ытла пынӑ программӑпа вырӑс халӑх юррин «Родные просторы» (чӑв. Тӑван тӑрӑх) фольклор коллективӗ пырса ҫитнӗ. Пултарулӑх ушкӑнне 45 ҫул ӗнтӗ Мускаври патшалӑх культура институтӗнчен вӗренсе тухнӑ Людмила Кондратьева ертсе пырать. Грузире ҫуралса ӳснӗ хӗр малтанласа ансамбле Шупашкарти трактор тӑвакансен заводӗнче йӗркелесе янӑ.

Людмила Кондратьева чӑваш каччипе ҫемье ҫавӑрнӑ та кунтах ӗҫлесе пурӑннӑ, Чӑваш Ене ҫывӑха хурса хаклать. Чӑваш Енри тӗрлӗ тӑрӑхра пурӑнакан вырӑссен фольклорне пухса вӑл ансамбль репертуарне самай пуянлатнӑ.

#концертсем, #ансамбль, #пултарулӑх, #культура, #ваттисем