Судра. Н. Плотников сӑнӳкерчӗкӗ

Муркашра паян Илле Ивановпа «Сӗтев» хаҫата айӑплакан черетлӗ суд иртрӗ. Ларӑва килнисен умӗнче ыйтусем ҫине Романова Тамара тата ФСБ ӗҫченӗ хуравларӗҫ.

Патшалӑх канашӗн депутачӗ пулнӑ Тамара Романовӑна суда айӑплакан ен чӗнсе илнӗ имӗш. Хӑйӗн сӑмахӗнче вара Тамара Ивановна Илле Иванова майлӑ тухса калаҫнӑ — статья ун шухӑшӗпе хавшакрах пулса тухнӑ, авторӗн ӑна ҫивӗчрех ҫырмалла пулнӑ иккен. Статьяра имӗш чӗлхене хӗсӗрлени пирки кӑна мар, халӑха хӗснине те (кунта вӑл Г.С. Лебедев ячӗллӗ интернат лицее хупнине асӑнчӗ), айӑплӑ ҫынсен хушамачӗсене те каламалла пулнӑ иккен. Юлашки тапхӑрта чӑн та чӑвашлӑха ура хуни нумайланчӗ — аслӑ шкулсенче чӑваш кафедрисене ыттисемпе пӗрлештереҫҫӗ, чӑвашла хаҫатсене пӗр ҫыхха пухаҫҫӗ, тата ыт.те. Наци телекуравӗн ертӳҫине суйлама пултарайманни те халӑха пулӑшмасть ӗнтӗ.

Ларӑвӑн иккӗмӗш пайӗнче ФСБ ӗҫченне ыйтусем пачӗҫ. Вӑл ӑнлантарнӑ тӑрӑх вӗсен служби следстви ирттерсе статьяна Илле Иванов ҫырнине палӑртнӑ. Ҫакна телефон калаҫӑвне итленӗ май пӗлме пултарнӑ имӗш. Хӳтӗлев енне шӑп ҫак самант кӑсӑклантарчӗ те. Харпӑр ҫын телефонпа мӗн пирки калаҫнине ӑна вӑтам е йывӑр статьяпа айӑпланӑ чухне итлеме май пур иккен. Илле Иванова айӑплакан статья вара — ҫӑмӑл йышшисенчен, ун пек чухне РФ Конституцийӗ ҫын калаҫӑвне итлеме чарать иккен. Унсӑр пуҫне пуҫилле ӗҫне кӗне материалсенче калаҫӑва ҫырса илнӗ самант суд ирӗк панӑ умӗнхи датӑпа иккен. Суд ҫын калаҫӑвне итлеме ирӗк парас умӗнех ФСБ вӗсене сыхланӑ пулса тухать — хӳтӗлекен ен пӗлтернӗ тӑрӑх кунта е суда суйни е йӗркене пӑсни палӑрать. Илле Иванов ҫав суд мӗнле материала тӗпе хурса итлеме ирӗк панине пӗлес тесе, унти материалсене ҫак ӗҫ ҫумне хушма евит пачӗ пулин тӳре килӗшмерӗ (сӑмах май, айӑплакан ен те хирӗҫ марччӗ).

ФСБ ӗҫченне илес пулсан вӑл хӑйӗн хуравӗсене пӑрӑнарах пама тӑрӑшрӗ — хӑҫан пулса иртнине тӗплӗ калама пултараймарӗ е ыйту ҫак ӗҫпе ним енчен те ҫыхӑнман текелерӗ. Тӗслӗхрен, Борис Чиндыков айӑпланакан статья ӑна вуланӑ хыҫҫӑн саккуна пӑсакан мӗнле те пулин ӗҫ-пуҫ тума хистерӗ-и тесе ыйтсан — статьяна ку тӗлӗшпе хакласси унӑн ӗҫӗ мар тесе пӗлтерчӗ. Маларах, паллах, ку ыйту ҫине экспертсем хуравламалла терӗ, Борис Борисович статьяна экспертсем валли мар, пурин валли те ҫырнӑ тесе тӳрлетсен те ФСБ ӗҫченӗ ыйту ҫине тӗплӗ хуравлас темерӗ. Хӑйӗн ҫине те вӑл ниепле яваплӑх илмерӗ — вӑл, имӗш, пуҫлӑхсем хушнине пурнӑҫланӑ.

Тепӗр лару утӑн 24-мӗшӗнче иртмелле. Столбов Николай ваккат суд ларӑвне тепӗр вӑхӑта куҫарма ыйтрӗ — ҫав кун вӑл пушӑ мар иккен, унӑн тепӗр ларӑва хутшӑнмалла. Тӳре ун хӳтне кӗмерӗ, юнкунах лартрӗ — Муркашра иртекен суд ун шухӑшӗпе Елчӗкри ӗҫрен (Николай Анатольевич унта пӗр кинемейӗн правине хӳтӗлемелле) пӗлтерӗшлӗрех пулмалла имӗш. Суд пӗтӗмлетӗвӗн яваплӑхне туякан тӳререн чӑн та тивӗҫлӗ йышӑну тӑвасса шанас килет.

#Сӗтев, #чӑваш чӗлхи, #Муркаш, #судсем, #айӑплав