Асӑрхануллӑ пулӑр

Шупашкар районӗн полици ӗҫченӗсем Дагестан Республикинчен килнӗ икӗ арҫынна чарнӑ. Вӗсем Кӳкеҫри «Апат-ҫимӗҫ» лавккинче РФ суя банкнотне тыттарса хӑварнӑ. Сутуҫӑ хӗрарӑм туянакан тухса кайсан анчах парса хӑварнӑ укҫа чӑн маррине сиснӗ, хайхискер тӳрех пӑтӑрмах пирки Шупашкар районӗн полици уйрӑмне шӑнкӑравласа пӗлтернӗ.

Нумаях пулмасть ют регион номерлӗ автомашинӑна Хыркассинчи постра чарнӑ. Тимлӗ инспекторсем пассажир сумкинчен 5000 тенкӗлӗх 2 укҫа курӑннине асӑрханӑ. Дагестан ҫыннисем тӳрре тухма хӑтланман, унсӑр пуҫне автомашинӑра пытарнӑ ытти купюрӑсене те кӑтартнӑ. Унта 5000 тенкӗлӗх 84 хут укҫа пулнӑ.

Преступлени ҫулӗ ҫине тӑнӑскерсене РФ тӗп билечӗсене туса кӑларнӑшӑн, упранӑшӑн тата вырӑнтан вырӑна куҫарса ҫынсене улталанӑшӑн айӑпланӑ. Вӗсене 6 ҫуллӑха ирӗкрен хӑтарнӑ, унсӑр пуҫне 400 пин тенкӗ штраф тӳлеме йышӑннӑ.

Аякра пурӑнакансем Чӑваш Ене килсе суя укҫа вырнаҫтарни тӑтӑшах пулать. Ҫакнашкал преступленисене тӑвакансенчен чылайӑшӗ Кавказ тӑрӑхӗнчен. ЧР ШӖМӗн экономика хӑрушсӑрлӑхӗн управленийӗ палӑртнӑ тӑрӑх кӑҫалхи сакӑр уйӑхра кӑна суя укҫа тыттарса хӑварнӑ 314 тӗслӗх. Пӗлтӗрхи ҫак тапхӑрта кунашкал 388 преступлени пулнӑ. Иртнӗ ҫулхи суя купюрӑсен 80 проценчӗ 1000 тенкӗлӗххи пулнӑ пулсан, кӑҫал 5 пинлӗххисем ытларах.

Йӗрке хуралҫисем ҫынсене тимлӗрех пулма сӗнеҫҫӗ, иккӗленсенех полици уйрӑмне пӗлтермеллине асӑрхаттараҫҫӗ.

#укҫа, #Кӳкеҫ, #Шупашкар районӗ