Элӗк районӗнчи Прашкушкӑнь ялӗнче пуш уйӑхӗн 24-мӗш каҫхине пысӑк инкек пулнӑ. Вутра икӗ арҫн ҫунса кайнӑ.

РФ Следстви комитечӗн Чӑваш Енри управленийӗ пресс-службинче пӗлтернӗ тӑрӑх, ҫулӑм пӗр хутлӑ йывӑс пӳртре алхаснӑ. Пӳрт юрӑхсӑра тухнӑ. Пушара сӳнтернӗ хыҫҫӑн унтан 56-ри кил хуҫипе 54-ри тепӗр арҫынна (вӑл — Прашкушкӑнь ялӗнченех) тупнӑ. Тӗрӗсрех, ҫунса кайнӑскерсене асӑрханӑ. Специалистсем шухӑшланӑ тӑрӑх, арҫынсем сӗрӗмпе вилнӗ.

Пӳртре буржуйка-кӑмака пулнӑ. Ҫулӑм ҫавӑнтан тухма пултарнӑ тесе тӗшмӗртеҫҫӗ.

Ҫапах та ку инкек сӑлтавне тӗрӗс палӑртма РФ Следстви комитечӗн Чӑваш Енри управленийӗн тӗпчевҫисем тӗпчев пуҫарнӑ. Ӗҫе тишкерсе-тӗпчесе пӗтернӗ хыҫҫӑн татӑклӑ йышӑну тӑвӗҫ.

#Прашкушкӑнь, #инкексем, #пушарсем, #Элӗк районӗ, #тӗпчевсем