Нарӑсӑн 17-мӗшӗнче Лаш Таяпари (Елчӗк районӗ) Аслӑ урамра пурӑнакан Кондратьевсен уяв пулчӗ. Кил хуҫи Серафима Захаровна 100 ҫулхи юбилейне палӑртрӗ.

Пӳрт тулли тӑван-пӗлӗш пуҫтарӑнчӗ кунта. Ҫерем аппан тӑватӑ ывӑлӗ тата икӗ хӗрӗ ачисемпе мӑнукӗсемпе килсен ларма та вырӑн пулмарӗ. Пурӗ 52 мӑнук — ҫав шутра мӑнукӗсен ачисем те! Чӑннипе те пуян Ҫерем аппа. Вӑл хӑй те нумай ачаллӑ ҫемьере ҫурлса ӳснӗ: тӑххӑрӑн пӗр тӑван пулнӑ. Ял ачипе Николай Ивановичпа вӑл ҫемье ҫавӑрнӑ. Упӑшки салтака кайсан 3 ачипе тӑрса юлнӑ. 1944 ҫулта Миккуль вӑрҫӑ хирӗнчен аманса килнӗ, суранӗсем тӳрленейменнипе урине кастарнӑ. Миккуль колхозра аслӑ конюхра ӗҫленӗ. Вӑл виҫ урапаллӑ велосипедпа, машинпа ҫӳренӗ. Кондратьевсен ҫемье йышӗ те пысӑкланнӑ: тепӗр 5 ача ҫуралнӑ, шел те, вӗсенчен иккӗшӗ каярах вилнӗ.

Мӑшӑрӗ 1958 ҫулта ҫӗре кӗнӗ. Ҫерем аппа кӗҫӗн ывӑлӗн Валерийӗн ҫемйипе пӗрле пурӑнать. Паянхи кун тӗлне вӑл пульницара выртса курман тесен те юрать. Пӗрре ҫеҫ, ун чухне те урине хуҫсан анчах. Хӗлле урама тухсах каймасть, ҫулла хапха умӗнче ларма кӑмӑллать. Ун чухне кӳршӗ-аршӑ юнашар пырса ларсан тем ҫинчен те калаҫма сӑмах тупать. Икӗ патак ҫине таянса чӑх-чӗпсем патне те тухса кӗрет.

Икӗ класс анчах пӗтернӗ вӑл. Ҫырма, вулама пӗлет. Тӗнчери хыпарсемпе хаҫат вуласа паллашать. Ҫерук аппапа Миккуль тетен ачисем ӗҫчен те пултаруллӑ. Паянхи кун вӗсем пурте тивӗҫлӗ канура. Зинон колхозра бригадир, Петя механизатор, Зоя пӑру пӑхнӑ, Тамара бухгалтер, Валери тракторист пулса ӗҫленӗ. Анатолий ял администрацийӗн ертӳҫи те пулнӑ.

#Лаш Таяпа, #Елчӗк районӗ, #юбилейсем