Александра Федорова

Пирӗн республикӑри шкулсенче тӑван ен культурине 1992 ҫултанпа вӗрентеҫҫӗ. Малтанхи вӑхӑтра ҫак предмета вӗрентме питех те ҫӑмӑл пулмарӗ пулин те, халь йывӑрлӑхсем айккинелле пӑрӑнса пыраҫҫӗ тесен те йӑнӑш пулмасть пуль. Ачасем валли 4-мӗш класран пуҫласа 8-мӗшне ҫитичченех ятарлӑ вӗренӳ кӗнекисем хатӗр, вӗсемпе ӗҫлесе пыма ӗҫ тетрачӗсем те ҫителӗклӗ кларса пыраҫҫӗ. Шкулсене уроксенче усӑ курма ятарласа ӳкернӗ видеофильмсем те килсе ҫитнӗ. Ҫак пархатарлӑ ӗҫе Е.В.Александрова туса пырать. Паллах, ҫак утӑмсем ачасене тӑван ен культурине вӗренсе пыма маллала хавхалантарса пыраҫҫӗ.

Уроксенче илнӗ пӗлӳпе усӑ курма пултарнине Хырхӗрри тӗп шкулӗнче вӗренекен ачасем те кӑтартса параҫҫӗ. Харӑсах икӗ ҫул — 2006 тата 2007 — М.Белкова вӗренекен республикӑра ирттернӗ «Туслӑх хӗлхемӗ» фестивале («Асамат» номинаци) хутшӑнса виҫҫӗмӗш вырӑн йышӑнма пултарчӗ. Халӗ вара Шупашкартан тепӗр савӑнӑҫлӑ хыпар ҫитрӗ: шкулта тӑххӑрмӗш класра вӗренекен Александра Федорова республикӑра кӑҫал пӗрремӗш хут тӑван ен культурипе иртекен олимпиадӑра виҫҫӗмӗш вырӑна тухма пултарнӑ. Хӗрачана шкул ачисем те, вӗрентекенсем те ӑшшӑн саламларӗҫ.

Сӑмах май каласан, тӑван ен культурипе районта иртекен олимпиадӑсене Саша 7-мӗш класранпах хутшӑнать, кашнинчех 2-3 вырӑнсене йышӑнать. Ҫак вӗренӳ ҫулӗнче вара пултаруллӑ хӗрача тӑххӑрмӗшсем хушшинче мала тухма пултарчӗ, ҫавӑнпах ӗнтӗ хамӑр район чысне республика шайӗнче хӳтелес чыса тивӗҫрӗ. Ытти предметсемпе те вӑл аван ӗлкӗрсе пырать. Право, обществознани, биологи, математика предмечӗсмпе те район шайӗнче иртнӗ олимпиадӑсенче малтисен шутӗнче. Мал ӗмӗтлӗ хӗрачана малашне те вӗренӳре ӑнӑҫлӑ ӗлкӗрсе пыма, ҫӗнӗ ҫитӗнӳсем тума ӑнӑҫу сунас килет.

#Хырхӗрри, #ҫитӗнӳсем, #Комсомольски районӗ, #тӑван ен, #вӗренӳ