Нумаях пулмасть Шупашкара Кӑнтӑр Корейӑран Полина Федорова таврӑннӑ. Чӑваш спортсменки тӑван тӑрӑхне пушӑ алӑпа килмен.

Шупашкарта ӑна чукун ҫул вокзалӗнче сумлӑ хӑнасем, тӑванӗсемпе юлташӗсем кӗтсе илнӗ. Полина Универсиадӑра виҫӗ медаль ҫӗнсе илнине ҫав тери кӑмӑллӑ палӑртма. Вӑл икӗ ылтӑн тата пӗр кӗмӗл медальсем ҫӗнсе илнӗ. Утӑн 5-мӗшӗнче Полина Федорова команда тупӑшӑвӗнче ылтӑн медаль илнӗ. Утӑн 7-мӗшӗнче вара пӗрене ҫинче хӑнӑхтарусем туса кӗмӗл медале тивӗҫнӗ. Ҫав кунах гимнастка ирӗклӗ хӑнӑхтарусенче мала тухнӑ.

Полина каланӑ тӑрӑх, халӗ вӑл кӑштах канӗ. Унтан тренировкӑсене малалла тӑсӗ.

Аса илтерер: Кванджу хулинче иртекен Универсидӑна 146 ҫӗршыври 13 пин яхӑн спортсмен хутшӑнать. Вӑл утӑ уйӑхӗн 14-мӗшӗччен иртӗ.

#Универсиада, #Шупашкар, #спорт, #ҫӑмрӑксем, #Кӑнтӑр Корея, #Кванджу