Чӑваш Енӗн Патшалӑх Канашӗн депутачӗсем Раҫҫейӗн премьер-министрӗ Дмитрий Медведев тата РФ Патшалӑх Думин спикерӗ Сергей Нарышкин патне ҫыру шӑрҫаланӑ. Халӑх «тарҫисене» ял хуҫалӑхӗнчи лару-тӑру пӑшӑрхантарать.

Депутатсене шухӑшлаттаракан тӗп самантсен шутӗнче федераци хыснинчен килекен укҫа-тенкӗ, республикӑн хӑмла отрасльне тӗкӗ кӳресси, ял хуҫалӑх продукцине туса илекен Чӑваш Енри пердприятисене федераци сечӗн лавккисем патне ҫул уҫса парасси, яла кадрсемпе тивӗҫтересси.

Тухтӑрсемпе вӗрентекенсене унта илӗртес тесе патшалӑх енчен маларах йышӑну турӗҫ-ха. Ялта тухтӑрта ӗҫлеме кӑмӑл тунӑ ҫамрӑк специалистсене 1 миллионшар тенкӗ ним мар кӑларса тыттараҫҫӗ. Вӗрентекенсене вара ҫурт-йӗр тума е туянма тесе илекен кредитӑн тата ҫав укҫа проценчӗн пӗр пайне саплаштарма йышӑннӑ.

Ҫав вӑхӑтрах ял хуҫалӑх предприятийӗсем те ӗҫлекенсем ҫуккипе халтан каяҫҫӗ. Механизатор-дояркӑсем кӑна-и, инженерсемпе агрономсем, ветеринарсемпе зоотехниксем каясшӑн мар. Ял хуҫалӑх специальноҫне илекен яш-кӗрӗмпе хӗр-упраҫ нумай-ха, анчах вӗсем яла талпӑнни сисӗнсех каймасть. Ял хуҫалӑхӗнче ӗҫлекен специалистсене те яла ҫапла майпа илӗртсен аван тесе шухӑшлаҫҫӗ Патшалӑх Канашне депутата суйланнисем.

Халӑх «тарҫисене» пӑшӑрхантаракан тепӗр самант — сӗтшӗн субсидилес йӗркене килес ҫултан ылмаштарма палӑртни. Паянхи кун чи пысӑк тата тата пӗрремӗш сортлӑ патшалӑх укҫа уйӑрса пулӑшать пулсан килес ҫул пӗрремӗш сорчӗшӗн саплаштарма пӑрахасшӑн. Капла туни сӗте тирпейлекенсене алла май тесе шухӑшлаҫҫӗ иккен аграрисем. Ара, сӗт заводне кайса хӑв пахалаймӑн та шанса пӗтер теҫҫӗ-тӗр ҫав.

Сӗтне-ашне туса илме пулать-ха. Анчах техникӑсӑр, йӗркеллӗ фермӑсемсӗр нумай мала каямӑн. Юсаса ҫӗнетме вара хресченӗн ирӗксӗрех кредит илме тивет. Ара, унсӑр укҫи-тенки ҫитсе-саплашса пымасть-ҫке. Кредитӑн процент ставкин пӗр пайне хыснаран субсидилеҫҫӗ. Анчах ҫак тӗллевлӗ укҫа Чӑваш Ене 240 миллион тенкӗ кӑна лекнӗ иккен. Ҫын кӗсйине кӗме хушмаҫҫӗ те, пирӗннисем ирӗксӗрех кӳршӗсене федераци хысни мӗн чухлӗ уйӑрнине танлаштарнӑ. Мари Эла 600 миллион тенкӗ лекнӗ иккен, Тутар Республикине — 1 миллиарда яхӑн.

Патшалӑх Канашӗн депутачӗсем шӑрҫаланӑ ҫырура ял хуҫалӑх продукцине кунта туса илекенсене федерацин суту-илӳ лавккисене хӑйсен продукцине сӗнме йывӑррипе ҫыхӑннӑ. Кунсӑр пуҫне ытти ыйтӑва та хускатнӑ.

#политика, #пулӑшу, #укҫа-тенкӗ, #ял хуҫалӑхӗ