Cap.ru сӑнӳкерчӗкӗ

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ЧР Элтеперӗ ҫумӗнче йӗркеленӗ консультаципе канашлу органӗсен тухӑҫлӑхне ӳстересшӗн. Ҫак шухӑша вӑл РФ Патшалӑх Думин Финанс рынокӗ енӗпе ӗҫлекен комитечӗн ертӳҫипе Анатолий Аксаковпа (аса илтерер: Олег Николаев та, Анатолий Аксаков та — «Тӗрӗслӗхшӗн Раҫҫей» парти пайташӗсем) тӗл пулсан каланӑ. Экономика ыйтӑвӗсене сӳтсе явнӑ чух экспертсемпе канашлани пӗлтерӗшлӗ тесе шухӑшлать республикӑн ҫӗнӗ ертӳҫи.

Республика Правительствин, вырӑнти хӑй тытӑмлӑх органӗсен, патшалӑх корпорацийӗсен пайташӗсен, усламҫӑсен, экспертсен хӑватне пӗр ҫӗре пӗрлештермелли пирки те калаҫнӑ ӗнерхи тӗлпулура республикӑн Элтеперӗн тивӗҫӗсене вӑхӑтлӑх пурнӑҫлаканӗпе РФ Патшалӑх Думин депутачӗ.

Cap.ru сӑнӳкерчӗкӗ

Ӗнер, кӑрлачӑн 31-мӗшӗнче, Чӑваш Ен Элтерерӗн тивӗҫӗсене вӑхӑтлӑх пурнӑҫлакан Олег Николаев ИТАР-ТАСС информаци агентствин, «Комсомольская правда – Москва» хаҫатӑн тата «Мир» телерадиокомпанин Шупашкара, ЧР Правительство ҫуртне, килнӗ журналисчӗсен ыйтӑвӗсене хуравланӑ.

МИХсенче ӗҫлекенсене республикӑн ҫӗнӗ ертӳҫи команда йӗркелессипе тата регионта туса ирттерме палӑртнӑ ӗҫсем кӑсӑклантарнӑ.

Олег Николаев Правительствӑн хальхи структурине тӗплӗн тишкерсе хаклама палӑртнине пӗлтернӗ. Ҫак ыйтӑва вӑрах тӑхтамасӑр татса парасшӑн.

Аса илтерер: ӗнер ЧР Правительствине отставкӑна ячӗҫ. Ӗнерех ЧР Элтеперӗн Администрацийӗн Ертӳҫине Юрий Васильева тата Светлана Енилина министра ӗҫрен кӑларнӑ. Хушусенче палӑртнӑ тӑрӑх хакласан, ҫемҫе пукансене вӗсем хӑйсен кӑмӑлӗпе пушатнӑ.

Паян, карлач уйӑхӗн 31-мӗшӗнче, ЧР Элтеперӗн администрацийӗн ертӳҫине – ЧР Министрсен Кабинечӗн Председателӗн ҫумне Юрий Васильева хӑйӗн ирӗкӗпе ӗҫрен яни пирки Чӑваш халӑх сайчӗ тин кӑна пӗлтерчӗ.

Паян ЧР Министрсен Кабинечӗн Председателӗн ҫумне – финанс министрне Светлана Енилинӑна та ӗҫрен кӑларасси пирки хушу тухнӑ. Документра палӑртнӑ тӑрӑх, вӑл та хӑйӗн ирӗкӗпе кайнӑ.

Аса илтерер: РФ Президенчӗ Владимир Путин ЧР Элтеперне Михаил Игнатьева отставкӑна янӑ хыҫҫӑн ку тивӗҫе вӑхӑтлӑха пурнӑҫлама Олег Николаева («Тӗрӗслӗхшӗн Раҫҫей» парти) шаннӑ.

Cap.ru сӑнӳкерчӗкӗ

Паян, кӑрлачӑн 31-мӗшӗнче, Чӑваш Ен Министрсен Кабинечӗн Ертӳҫине — Элтеперӗн Администрацийӗн Ертӳҫине Юрий Васильева ӗҫрен кӑларнӑ. 10-мӗш номерлӗ хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ. Документра палӑртнӑ тӑрӑх, Юрий Васильевич хӑй кӑмӑлӗпе ӗҫрен кайнӑ.

Чӑваш Ен Правительствине паян отставкӑна янине эпир пӗлтернӗччӗ. Аса илтерер: Олег Николаев Министрсен Кабинечӗн унчченхи йышне туса ирттернӗ ӗҫсемшӗн тав тунӑ. «Ҫӗнӗ йышӑну тӑвиччен сире пурсӑра та тивӗҫӗре пурнӑҫлама ыйтнӑ пулӑттӑм. Сирӗнтен чылайӑшӗнпе малашне те ӗҫлӗпӗр», — тенӗччӗ Чӑваш Ен Элтеперӗн тивӗҫӗсене вӑхӑтлӑх пурнӑҫлаканӗ Правительство пайташӗсемпе ирттернӗ паян ирхи тӗлпулура.

Cap.ru сӑнӳкерчӗкӗ

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев хӑйӗн пулӑшуҫисен тивӗҫне пурнӑҫлакансене ҫирӗплетнӗ.

Ҫапла йышӑнӑва вӑл ӗнер алӑ пуснӑ. Документа республикӑн влаҫ органӗсен официаллӑ порталне паян ирпе вырнаҫтарнӑ.

Тӳрех палӑртар: йышӑнусенче каланӑ тӑрӑх, пулӑшуҫӑсем Олег Николаев Чӑваш Республикин Элтеперӗн тивӗҫӗсене вӑхӑтлӑх пурнӑҫланӑ вӑхӑтра пулӑшуҫӑ тивӗҫне пурнӑҫлӗҫ. Контракта вӗсемпе шӑпах ҫав вӑхӑтлӑх алӑ пуснӑ.

Олег Николаева пулӑшакансем ҫаксем: Иван Даренков, Татьяна Михайлова, Иван Филиппов, Георгий Какабадзе.

Иван Филиппов, сӑмах май, пӗр эрне ытларах Михаил Игнатьев Элтеперӗн пулӑшуҫи те пулса ӗлкӗрчӗ. Унпа йышӑннӑ малтанхи йышӑнӑва кӑҫалхи кӑрлачӑн 18-мӗшӗнче алӑ пуснӑччӗ.

Паян, кӑрлачӑн 31-мӗшӗнче, Чӑваш Ен Правительствине отставкӑна янӑ. ЧР влаҫ органӗсен официаллӑ порталӗнче ҫакӑн пирки хыпарланинче пӗлтернӗ тӑрӑх, Олег Николаев Министрсен Кабинечӗн унчченхи йышне туса ирттернӗ ӗҫсемшӗн тав тунӑ.

Правительствӑна отставкӑна ярасси ҫинчен калакан хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ. Асӑннӑ документра палӑртнӑ тӑрӑх, ҫӗнӗ йыша ҫирӗплетиччен унчченхи йышпах ӗҫлӗҫ. Ҫак шухӑша Олег Николаев Правительство ҫуртӗнче Министрсен Кабинечӗн пайташӗсемпе ирттернӗ тӗлпулура та палӑртнӑ. «Ҫӗнӗ йышӑну тӑвиччен сире пурсӑра та тивӗҫӗре пурнӑҫлама ыйтнӑ пулӑттӑм. Сирӗнтен чылайӑшӗнпе малашне те ӗҫлӗпӗр», — тенӗ Олег Николаев.

Ӗнер, кӑрлачӑн 30-мӗшӗнче, Чӑваш Республикин Пуҫлӑхӗн тивӗҫӗсене вӑхӑтлӑх пурнӑҫлакан Олег Николаевпа паллаштарнине Чӑваш халӑх сайчӗ пӗлтерчӗ ӗнтӗ.

Паллаштару хыҫҫӑн журналистсем Раҫҫей Патшалӑх Думин Финанс рынокӗн комитечӗн ертӳҫинчен, «Тӗрӗслӗхшӗн Раҫҫей» парти пайташӗнчен Анатолий Аксаковран кӗске интервью илнӗ. Аса илтерер: Олег Николаевпа Анатолий Аксаков — пӗр партири ҫынсем.

«Эсир, партири аслӑ юлташ евӗр, Николаевпа Министрсен Кабинечӗн ҫӗнӗ йышне сӳтсе явман-и?» — ыйтнӑ, тӗслӗхрен, МИХсем. «Калаҫатпӑр, канашлатпӑр, палӑртса хунисем, паллах, пур. Команда пуҫтарӑнать, команда, пӗтӗмӗшле илсен, хатӗр. Эпир яваплӑха хамӑр ҫине илме хатӗр тесе яланах каланӑ», — хуравланӑ Аксаков.

«Министрсен Кабинечӗн унчченхи йышӗнчен ҫӗнӗ правительствӑна кам та пулсан кӗрӗ-и?» — кӑсӑкланнӑ журналистсем. «Унта профессиналсем пур, вӗсене аталанма май парсан ҫӗнӗ условисенче усӑ кӳме пултараҫҫӗ тесе шухӑшлатӑп. Эп шухӑшланӑ тӑрӑх, ун пек ҫынсем шӑпах ӗҫлеме пултарӗҫ», — пытарман Анатолий Аксаков.

Малалла...

tass.ru сайтри сӑн

Нумаях пулмасть ЧР прокуратурин анлӑ ларӑвӗ иртнӗ, 2019 ҫулти пӗтӗмлетӳсене пӑхса тухнӑ.

Ларура палӑртнӑ тӑрӑх, транспорт министрне Александр Николаева тата вӗренӳ министрне Сергей Кудряшова тупӑшӗсем пирки тӗрӗс пӗлтермешӗн дисциплинарлӑ майпа явап тыттарнӑ. Вӗсен ҫумӗсен те декларацире суя хисепсем пулнине палӑртнӑ.

Шупашкар хула администрацийӗн пуҫлӑхӗ Алексей Ладыков тата РФ президенчӗн Чӑваш Енри тулли праваллӑ элчи Петр Чекмарев та декларацире пӗтӗм тупӑша кӑтартман. Вӗсене те дисциплинарлӑ майпа явап тыттарнӑ.

Декларацире суя хисепсем кӑтартакан сахал пулман: Шупашкарти 25 депутата тӑрӑ шыв ҫине кӑларнӑ. Каласа хӑвармалла: декларацие тӗрӗс мар кӑтартнӑшӑн Виктор Шмаков тата Алексей Никитин депутат полномочийӗсӗр тӑрса юлнӑ.

GETTY IMAGES

Чӑваш Ене 10 ҫула яхӑн ертсе пынӑ Михаил Игнатьева ӗҫрен хӑтарни ҫинчен юлхав журналист та ҫырчӗ пулӗ. Михаил Игнатьевпа ҫыхӑннӑ хыпарсене ҫӗршыври тата хамӑр регионти МИХсем ӑмӑртмалла тенӗ пек хыпарласа тӑчӗҫ. Паян Михаил Васильевич хӑйӗнпе пӗрле ӗҫленисене тата хӑйне критикленисене тав туса Инстаграмра ҫырнине Чӑваш халӑх сайчӗ пӗлтерчӗ ӗнтӗ.

Би-Би-Син вырӑс служби (аса илтерер: Михаил Игнатьев ЧР Патшалӑх Канашне янӑ Ҫырӑва итлеме Би-Би-Син журналисчӗ Илья Барабанов килнӗччӗ) Шупашкарти ҫӑлкуҫсем систерни тӑрӑх ҫапларах пӗлтернӗ: Михаил Игнатьева Путин ӗҫрен кӑлариччен Федераци Канашӗнчи должноҫе тата Чӑваш патшалӑх ял хуҫалӑх академийӗн ректорӗ пулма сӗннӗ-мӗн. Анчах Михаил Васильевич влаҫран кайма килӗшмен имӗш.

М.Игнатьевӑн Инстаграмри страницинчи сӑнӗ

Паян 10 сехет те 50 минутра ЧР Элтеперӗ пулнӑ Михаил Игнатьевӑн Инстаграмри страницинче пост тупӑннӑ: вӑл унта ӑна пулӑшса пынӑ тата критикленӗ ҫынсене тав тунӑ.

Михаил Васильевич вырӑсла ҫырнӑ цитатӑна илсе кӑтартар: «Хочу обратиться со словами благодарности ко всем жителям любимой Чувашии! За понимание, за участие, за совместную работу на протяжении всех этих лет на благо родной Республики, за вашу активную гражданскую позицию, за ваши предложения и критику. Хочу сказать спасибо и всем вам, уважаемые подписчики, за внимание и к официальной хронике, да и к личным фото.

Желаю всем вам крепкого здоровья, мира и благополучия в ваших семьях, дальнейшего процветания и развития нашей родной России!

С уважением, Михаил Игнатьев».

Аса илтерер: ӗнер РФ президенчӗ Владимир Путин Михаил Игнатьева отставкӑна янӑ, ҫак тивӗҫе вӑхӑтлӑх пурнӑҫлама «Тӗрӗслӗхшӗн Раҫҫей» партин депутатне Олег Николаева шаннӑ.

Сӑмах май, ЧР Элтеперне хӑҫан суйласси паллӑ: смуйлав авӑн уйӑхӗн 13-мӗшӗнче иртӗ.