Шупашкарта 14-мӗш троллейбус маршрутне улӑштарасшӑн. Тӗрӗсрех каласан, ӑна тӑсасшӑн.

Хальхи вӑхӑтра 14-мӗш троллейбус И.Н.Ульянов ячӗллӗ Чӑваш патшалӑх университечӗ патӗнчен "Солнечный" микрорайона ҫӳрет. Пӗлтӗр маршрут ҫине автономлӑ майпа ҫӳрекен транспортсем тухнӑ, ҫавӑнпа микрорайона ҫити кайма тытӑннӑ та троллейбуссем.

Ҫитес вӑхӑтра маршрута "Университет" микрорайона ҫити тӑсасшӑн. Тӗрӗслев рейсӗ тунӑ, нимӗнле йывӑрлӑхсем те сиксе тухман. Хальлӗхе палӑртнӑ тӑрӑх, 14-мӗш троллейбус Миначев урамӗпе сехет йӗппи ҫаврӑннӑ май кайӗ.

Пуш уйӑхӗн 31-мӗшӗнче ҫӑлав службине шӑнкӑрав ҫитнӗ: хӗрачан пӳрне автомат ӑшӗнче хӗсӗнсе ларна.

Ку Шупашкарти пӗр шкулта ОБЖ урокӗнче пулнӑ. Хӗрача автомат макетне сӳтсе пуҫтарнӑ. Ӑнсӑртран унӑн пӳрни пӑшал пеналӗ ӑшӗнче хӗсӗнсе ларнӑ. Вӑл ӑна хӑй тӗллӗн кӑларайман.

Ҫӑлавҫӑсем вырӑна ҫитсен ачан пӳрнине кӑларнӑ. Унтан ӑна медпулӑшу ӗҫченӗсем патне илсе ҫитернӗ.

Шупашкарта пурӑнакан икӗ арҫын пуш уйӑхӗн 8-мӗшӗнче савнийӗсене савӑнтарас тесе лавккаран 50 кӗлчечек вӑрланӑ.

Уявра ҫӗнӗ кӑнтӑр районӗнче вырнаҫнӑ суту-илӳ ҫурчӗн сутуҫисем полицирен пулӑшу ыйтнӑ. Вӗсен лавккинчен икӗ чечек ҫыххи, пӗтӗмпе – 50 чечек, ҫухалнӑ. Вӑл вара 6 пин ытла тенкӗ тӑрать.

Йӗрке хуралҫисем ҫак ӗҫе 27-ри тата 29 ҫулти арҫынсем тунине палӑртнӑ. Вӗсем ӑнлантарнӑ тӑрӑх, чечек ҫыххисене савнийӗсене парнеленӗ.

t.me/pg21ru сӑнӳкерчӗкӗ

Шупашкар хулинче Александр Дельман усламҫӑн заправкине сӳтме тытӑннӑ. Ҫав ҫын сумлӑ шутланать — ӑна хӑй вӑхӑтӗнче «Чӑваш Республики умӗнчи тава тивӗҫлӗ ӗҫсемшӗн» орденпа та чысланӑ. Ҫав вӑхӑтрах Александр Дельман налук йӗркеллӗ тӳлемен тӗслӗх те пулнӑ.

Маларах эпир асӑннӑ объекта предприниматель темиҫе ҫул каяллах уҫнӑ. Анчах ҫав ӗҫе вӑл саккуна пӑсса пурнӑҫланӑ. Тепӗр майлӑ каласан, ятарлӑ органсенчен тивӗҫлӗ ирӗк илмен. Апла пулин те хулари Гагарин урамӗнчи «Волганефтьхолдинг» заправка 15 ҫул ӗҫленӗ.

Объекта сӳтме йышӑннӑ хыҫҫӑн ӑна тата тепӗр 3 ҫул никам та тӗкӗнмен. Ҫав вӑхӑтра заправкӑна 19 хутчен сӳттерме тӑнӑ. Анчах пуҫӑннӑ ӗҫе вӗҫлемен — усламҫӑна 50-шар пин тенкӗ штраф ҫырса панипех ҫырлахнӑ.

Унччен те судпа айӑпланнӑ, Шупашкарта пурӑнакан арҫын лампочкӑсем сутса укҫа тӑвасшан пулнӑ. Анчах май килмен.

Арҫын вӗсене «Ясная поляна» микрорайонти Таллеров урамӗнче вырнаҫнӑ 16 хутлӑ ҫуртран йӑкӑртнӑ. Вӑл подъездри пӗтӗм лампочкӑна тенӗ пек илсе тухнӑ. Ҫакна унта пурӑнакансем пуш уйӑхӗн 26-мӗшӗнче асӑрханӑ.

Полицейскисем ҫакна тума пултарнӑ ҫын йӗрӗ ҫине ӳкнӗ. Вӑл – 36 ҫулти арҫын. Хайхискер ӑнлантарнӑ тӑрӑх, ҫав вӑхӑтра вӑл ӳсӗр пулнӑ, подъездран 20 яхӑн лампочка пӑрса тухнӑ. Анчах киле кайнӑ чухне ӳкнӗ те вӗсене ҫухатса пӗтернӗ.

Арҫын тӗлӗшпе пуҫиле ӗҫ пуҫарнӑ.

fotostrana.ru сайтри сӑн

Шупашкарта 88 ҫулти кинемейӗн укҫине вӑрланӑ. Хӑй каланӑ тӑрӑх, унӑн хваттерне палламан арҫын кӗнӗ те нухратне йӑтса тухса кайнӑ. Ватӑскер хӑй тӗллӗн утаймасть.

Арҫын 200 пин тенкӗ вӑрласа тухнӑ. Ӑҫтан тупӑннӑ-ха палламан ҫын? Ҫак ҫын, унччен те судпа айӑпланнӑ 38 ҫулти арҫын, малтан ҫак хваттере кинемейӗн мӑнукӗпе килсе курнӑ. Хайхискер ватӑ хӗрарӑмӑн укҫи ӑҫта упраннине астуса юлнӑ.

Тепӗртакран ҫак арҫын кинемейӗн мӑнукӗпе пӗр ушкӑнра пулнӑ. Ҫавӑн чухне вӑл унӑн кӗсйинчен хваттер уҫҫине кӑларса илнӗ. Арҫын вӑрланӑ укҫана тӑкаклама ӗлкӗрнӗ. Ун тӗлӗшпе пуҫиле ӗҫ пуҫарнӑ.

Ака уйӑхӗн 16-мӗшӗнче Шупашкарта тата Ҫӗнӗ Шупашкарта велосезон уҫӗҫ. Космонавтика кунне халалланӑ велочупу Шупашкарта Юрий Гагарин палӑкӗ умӗнчен 9:00 сехетре пуҫланӗ. 11:00 сехетре велосипедҫӑсем Ҫӗнӗ Шупашкарти «Химик» КК ҫывӑхӗнче пухӑнӗҫ. Финиш яланхи пекех Сӗнтӗрвӑрри районӗнчи Шуршӑлта пулӗ.

Шуршӑла ҫитсен митинг иртӗ, А. Г. Николаев вил тӑпри ҫине чечек хурӗҫ. Хутшӑнакансем космонавтика музейне ҫитсе курӗҫ. Йӗркелӳҫӗсем пӗлтернӗ тӑрӑх, поэтсемпе писательсем тухса калаҫма палӑртнӑ. Унсӑр пуҫне «Трава у дома» юрӑпа ташӑ флешмобне йӗркелӗҫ.

Велочупӑва хутшӑнма юсавлӑ велосипед кирлӗ. Шупашкарсен 70 ҫухрӑм ҫула педаль ҫавӑрттарса ҫӗнмелле пулӗ, ҫӗншупашкарсен — 35 ҫухрӑм ҫула.

taganrogprav.ru сайтри сӑн

Пӗрре Ҫӗнӗ Шупашкарта пурӑнакан хӗрарӑм электронлӑ почтӑна кӗме хӑтланнӑ та парольне те, логинне те ҫырайман – тӗрӗс мар иккен. Кайран вӗсене ҫӗнӗрен тусан почтӑна кӗнӗ. Ун чухне тин вӑл такам тӗнче тетелӗнчи лавккаран, ют ҫӗршывра вырнаҫнӑскертен, ун ячӗпе япала туяннине, унӑн банк карттипе тӳленине ӑнланнӑ. Палламан ҫын телефон экранне хӳтӗлемелли кантӑк, арҫынсен кроссовкине туяннӑ. Пӗтӗмпе – 8 пин ытла тенкӗлӗх. Паллах, япаласем урӑх адреспа килнӗ. Хайхи ултавҫӑ электронлӑ почта хуҫине те парнепе савӑнтарас тенӗ – 100 тенкӗ ытла тӑракан эреш саккас панӑ, унӑн адресне кӑтартнӑ. Анчах ку япала хӗрарӑм патне ҫитмен.

Йӗрке хуралҫисем палӑртнӑ тӑрӑх, ку ӗҫе Краснодар крайӗнче пурӑнакан, ниҫта та ӗҫлемен 21 ҫулти каччӑ тума пултарнӑ. Ӑна тытса чарнӑ. Каччӑ айӑпне йышӑннӑ, тӑкакӑн пӗр пайне саплаштарнӑ. Ун тӗлӗшпе пуҫиле ӗҫ пуҫарнӑ.

gov.cap.ru сӑнӳкерчӗкӗ

Ӗнер, пуш уйӑхӗн 27-мӗшӗнче, ирхи 7 сехет те 48 минутра, Чӑваш Енри ҫӑлавҫӑсем пӑр ҫинче чупса ҫӳрекен пулӑшнӑ. Хӗрачасене куракансем пулнӑ. Вӗсем пирки ҫынсем ҫӑлавҫӑсене пӗлтернӗ. Ҫавсем Шупашкар гидроэлектростанцийӗнчен инҫех мар, пӑр тӑрӑх, чупса ҫӳренӗ. Ҫӑлавҫӑсем ҫав вырӑна кимӗпе васкаса пырса ҫитнӗ. Вӗсем хӗрачасене кимӗ ҫине лартса ҫыран хӗрне илсе тухнӑ. Пӑтӑрмах вырӑнне йӗрке хуралҫисене чӗнсе илнӗ.

kg-rostov.ru сайтри сӑн

Ӗнер, пуш уйӑхӗн 25-мӗшӗнче, Шупашкарти хӑш-пӗр хваттер ҫутӑсӑр тӑрса юлнӑ. Мӗне пула?

«Университет-2» микрорайонта кран ӗҫленӗ чухне электролиние икӗ хутчен лектернӗ. Ҫавна май Хмельницкий урамӗнчи, Миттов бульварӗнчи, Гузовский урамӗнчи, Заовражнӑйӗнчи ҫуртсене ҫутӑпа тивӗҫтерекен подстанци сӳнсе ларнӑ. Унтан Михайлов, Пирогов урамӗсенчи, Мускав проспектӗнчи урамсем те ҫутӑсӑр ларнӑ.

Шупашкар хула администрацийӗн пуҫлӑхӗ Денис Спирин каланӑ тӑрӑх, ҫутӑ сӳнсе ларнине ҫынсем, ахӑртнех, сиссе те юлайман. Мӗншӗн тесен ҫутта 4-26 ҫеккунтранах панӑ.