forum.na-svyazi.ru сайтран илнӗ сӑнӳкерчӗк

Чӑваш Енре Элтепере виҫӗ кун суйласси пирки сайтра пӗлтернӗччӗ. Ку кӑшӑлвирус сарӑлнипе ҫыхӑннӑ. Пандеми вӑхӑтӗнче суйлав участокӗсенче инфекцирен сыхланмалли условисем туса памалла. Нумаях пулмасть Тӗп суйлав комиссийӗнче ку ыйтӑва сӳтсе явнӑ.

ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ хушура палӑрнтӑ тӑрӑх, республикӑра суйлав ирттерме 46 миллион тенкӗ уйӑрӗҫ. Ку укҫа- резерв – фондӗнчен.

Укҫа-тенкӗпе кӑшӑлвирусран сыхланмалли хатӗрсем туянӗҫ, суйлав пирки хыпарлас ӗҫе те ку нухрат тӑкакланӗ. Укҫа-тенкӗпе Тӗп суйлав комиссийӗ хуҫаланӗ.

Аса илтерер: суйлав авӑн уйахӗн 11-13-мӗшӗсенче иртӗ.

Чӑваш Республикин Элтеперӗн тивӗҫӗсене вӑхӑтлӑх пурнӑҫлакан Олег Николаева суйлава хутшӑнма ырӑ кӑмӑллӑ ҫынсем 24 миллион тенкӗ пухса панӑ. 725 пин тенкине ҫынсем пухнӑ, 23 миллион та 625 пинне – юридици сӑпачӗсем. Тепӗр 50 пин тенкине Олег Алексеевич кӗсйинчен кӑларнӑ. Укҫа нумай пухӑннӑ, 8 миллион тенкине каялла та тавӑрса пама тивнӗ.

Паянхи кун тӗлне Олег Николаев пичет материалӗсене кӑларма, сарма 3 миллион та 288,5 пин тенкӗ тӑкакланӑ. Алӑ пуснине пуҫтаракансем валли 198 пин тенкӗ кайнӑ. 205 пин тенкӗ суйлавҫӑсен алӑ пуснине йӗркелес ӗҫе тӑкакланнӑ. Информаци тата кунсультаци 190 пин тенке кайса ларнӑ. Тепӗр 4 миллион та 475,7 пин тенки ытти расхута саплаштарнӑ. Ҫапла майпа 8 миллион та 240,7 пин тенкӗ юлнӑ.

Ытти кандидатсем, Александр Андреевпа Сергей Матвеев, хӑйсен 30 пинне тӑкакланӑ. Николай Степанов 100 пин тенкӗ хурса 28 пинне пӗтернӗ. Константин Степанова ЛДПР суйлава хутшӑнма 500 пин панӑ. Хальлӗхе 28 пинне тӑкакланӑ.

Вӑрмар районӗнче ҫӗнӗ пуҫлӑха ҫирӗплетнӗ. Ку должноҫри ҫынна палӑртмалли пуху паян, ҫурла уйӑхӗн 20-мӗшӗнче, иртнӗ. Пухӑва районти тӳре-шарапа пӗрлех республикӑри пуҫлӑхсем те пырса ҫитнӗ.

Депутатсем паянхи ларура пӑхса тухнӑ ыйтусем пуҫлӑх суйлассипе ҫеҫ ҫыхӑннӑ. Конкурсра Дмитрий Иванов тата Леонид Степанов ҫӗнтернӗ.

Пухура иккӗшӗнчен пӗрне суйлама тивнӗ. Депутатсем Дмитрий Иванов кандидатурине ырланӑ.

Паянтан, сӑмах май, Улатӑр хулин администрацийӗнче ҫӗнӗ пуҫлӑх ӗҫлеме тытӑннӑ. Ҫак должноҫре Сергей Лукишин тӑрӑшӗ. Ӑна тилхепене тыттарассипе ҫыхӑннӑ пуху ҫурла уйӑхӗн 13-мӗшӗнче иртнӗ.

Tass.ru сайтри сӑн

Чӑваш Енри министрсем пӗлтӗр мӗн чухлӗ ӗҫлесе илни пирки декларацисем тӑратнӑ. Чи нумай ӗҫлесе илекен министр Дмитрий Краснов пулнӑ, вӑл экономика министрӗн тивӗҫӗсене пурнӑҫлать. Вӑл 2019 ҫулта 4 843 271 тенкӗ илнӗ. Унӑн мӑшӑрӗ вара 10 миллион та 600 пин тенкӗ тупӑш тунӑ. Сӑмах май, пӗлтӗр РФ президенчӗ Владимир Путин 9 726 595 тенкӗ ӗҫлесе илнӗ.

ЧР ял хуҫалӑх министрӗ Сергей Артамоновӑн тупӑшӗ 3 773 366 тенкӗпе танлашнӑ. Урӑх тупӑш – 5 601 132 тенкӗ.

Виҫҫӗмӗш вырӑнта – строительство, архитектура тата ЖКХ министрӗ Александр Героев. Вӑл декларацире 3 674 756 тенкӗ тупӑш кӑтартнӑ.

Шупашкарта ҫуралнӑ Дмитрий Марков Тула облаҫне ӗҫлеме куҫӗ. Унта вӑл Правительство ертӳҫин ҫумӗн должноҫне йышӑнӗ. Тулӑра Чӑваш Ен сывлӑх сыхлав, мировой тӳресемпе загс органӗсен ӗҫне сӑнаса тӑрӗ. Росздравнадзорӑн, Роспотребнадзорӑн регионти уйрӑмӗсемпе, социаллӑ страховани, медицина страховани фончӗсемпе килӗштерсе ӗҫлессишӗн те яваплӑ пулӗ.

Дмитрий Марков 1970 ҫулта Шупашкарта ҫуралнӑ. И.Н. Ульянов ячӗллӗ ЧПУра сиплев ӗҫне алла илнӗ. Аслӑ шкулта, Шупашкар хула администрацийӗнче тӑрӑшнӑ, Васкавлӑ медицина пулӑшӑвӗн пульницин тӗп врачӗн ҫумӗ пулнӑ. 2013 ҫулта Мускав облаҫӗнче сывлӑх сыхлав министрӗн ҫумӗнче, 2016-мӗшӗнче министрта тӑрӑшма пуҫланӑ. 2018 ҫулхи авӑн уйӑхӗнченпе Социаллӑ страховани фончӗн Мускав облаҫӗнчи уйрӑмӗн пуҫлӑхӗнче вӑй хурать.

forum.na-svyazi.ru сайтри сӑн

Шупашкар тата Ҫӗнӗ Шупашкар сити-менеджерӗсем иртнӗ ҫул мӗн чухлӗ ӗҫлесе илнӗ? Алексей Ладыков, Ольга Чепрасовӑпа танлаштарсан, сахалрах тупӑш тунӑ.

Шупашкар сити-менеджерӗ Алексей Ладыков хӑйӗн должноҫӗнче пӗлтӗр 1 млн та 428 пин те 621,67 тенкӗ ӗҫлесе илнӗ. Декларацире ытти тупӑша кӑтартман. Унӑн, хут ҫинчине ӗненес тӗк, машина та, куҫман пурлӑх та ҫук. Ывӑлӗн – 135,6 тӑваткал метрлӑ хваттер. Декларацире мӑшӑрӗн тупӑшӗ ҫук, вӗсем 2 ҫул каялла уйрӑлнӑ.

Ҫӗнӗ Шупашкар хула администрацийӗн пуҫлӑхӗ Ольга Чепрасова пӗлтӗр 1 млн те 538 пин те 497,22 тенкӗ ӗҫлесе илнӗ. Хушма тупӑш – 60,6 пин тенкӗ. Унӑн ҫӗр лаптӑкӗ, гараж, хваттер пур.

Авӑн уйӑхӗн 13-мӗшӗнче пирӗн ҫӗршывра пӗрлехи суйлав кунӗ тесе йышӑннӑ. Ун чухне Чӑваш Ен Элтеперне тата муниципалитсенчи депутатсене суйлӗҫ.

Кӑшӑлвирус инфекцийӗнчен шкиленнипе, ӑна сарасран асӑрханас тӗллевпе суйлава виҫӗ кун хушши ирттерӗҫ. Кун пирки Чӑваш Енӗн Тӗп суйлав комиссийӗ ӗнер йышӑннӑ. Ҫапла вара сасӑлава авӑн уйӑхӗн 11 тата 12-мӗшӗсенче те ирттерӗҫ. Тӗп суйлав кунӗ ҫапах та 13-мӗшӗнче пулӗ тесе пӗлтернӗ.

Аса илтерер: республика Элтеперӗн суйлавне 5 кандидат хутшӑнать. Вӗсенчен тӑваттӑшӗ — парти сӗннӗ кандидатсем: Сергей Матвеев («Раҫҫей патриочӗсем»), Николай Степанов («Пенсионерсен социаллӑ тӗрӗслӗхӗшӗн партийӗ»), Александр Андреев (Раҫҫей Федерацийӗн коммунистсен партийӗ), Константин Степанов (либерал-демократсен партийӗ). Республика ертӳҫин тивӗҫне хальхи вӑхӑтра пурнӑҫлакан Олег Николаев хӑйӗн кандидатурине хӑй тӗллӗн тӑратнӑ.

Улатӑрта хула администрацийӗн пуҫлӑхне суйланӑ. Ӑна Депутатсен пухӑвӗн 49-мӗш ларӑвӗнче ҫирӗплетнӗ. Ҫӗнӗ сити-менеджер пулма «Алатырская спецавтоматика» (чӑв. Улатӑрти спецавтоматика) тулли мар яваплӑ обществӑн пуҫлӑхне Сергей Лукишина шаннӑ.

Хула администрацийӗн пуҫлӑхӗнче ӗҫлеме виҫӗ ҫын ӗмӗтленнӗ. Конкурс комиссийӗ Депутатсен пухӑвӗнче пӑхса тухма икӗ кандидата сӗннӗ. Хулари «халӑх тарҫисем» Лукишиншӑн саспланӑ. Вӑл хӑйӗн тивӗҫне пурнӑҫлама ҫурла уйӑхӗн 20-мӗшӗнче тытӑннӑ.

Сергей Лукишин – юлашки пилӗк ҫулта ылмашнӑ пиллӗкмӗш пуҫлӑх. Ҫав вӑхӑтра Владимир Степанов, Александр Седов, Александр Герасимов тата Юрий Боголюбов пуҫлӑхра ӗҫлесе ӗлкӗрчӗҫ.

ЧР Патшалӑх Канашӗн пресс-службин сӑнӳкерчӗкӗ

Ӗнер Шупашкар хулинчи Депутатсен пухӑвӗн ларӑвӗ иртнӗ. Унта Раҫсей Феедерацийӗн коммунистсен партийӗн фракцийӗн ертӳҫи Дмитрий Евсеев сӑмах каланӑ. Авӑн уйӑхӗн 13-мӗшӗнче иртекен суйлавра Евсеев республика Элтеперӗн тивӗҫӗсене вӑхӑтлӑх пурнӑҫлакан Олег Николаевшӑн сасӑлассине пӗлтернӗ.

Аса илтерер: суйлава коммунистсен партийӗн пайташӗ Александр Андреев та (унӑн кандидатурине парти ырланӑ) хутшӑнать. Анчах Евсеева коммунистсен партийӗн республикӑри ертӳҫисем килӗшмеҫҫӗ-мӗн. Ҫавӑнпа вӑл Олег Николаевшӑн сасӑлама палӑртать. Дмитрий Евсеев

Олег Николаевпа республика парламентӗнче килӗштерсе ӗҫленине аса илнӗ. Николаевӑн мӗнпур шухӑшне ырлаймасан та вӑл тепӗр ҫынна итлеме пӗлнине, конструктивлӑ йышӑнусем тума пултарнине Евсеев ырланине палӑртнӑ.

Паян, ҫурла уйӑхӗн 12-мӗшӗнче, Чӑваш Енӗн Патшалӑх ҫурт-йӗр инспекцийӗн пуҫлӑхӗн ҫумне ҫирӗплетнӗ. Хушӑва республика Элтеперӗн тивӗҫӗсене вӑхӑтлӑх пурнӑҫлакан Олег Николаев алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче «Саккунсем» ярӑмра вырнаҫтарнӑ. Инспекци пуҫлӑхӗн ҫумӗ пулма Надежда Ивановӑна шаннӑ.

Сӑмах май, кӑҫалхи пуш уйӑхӗн 2-мӗшӗнченпе инспекци пуҫлӑхӗн тивӗҫне Виктор Кочетков пурнӑҫлама тытӑннӑ, пуш уйӑхӗн 30-мӗшӗнче ӑна пуҫлӑх пуканне шанса панӑ. Унччен вӑл ҫав ӗҫре 2016 ҫулхи пуш уйӑхӗн 5-мӗшӗнчен тытӑнса 2020 ҫулхи кӑрлачӑн 17-мӗшӗччен тимленӗччӗ. Ӑна Михаил Игнатьев Элтепер ӗҫрен хӑтарнӑччӗ.