https://vk.com/wall-54381767_228239 сӑнӳкерчӗкӗ

Шупашкарта упана калпак тӑхӑнтартнӑ.

Хулари «Элара» завод умӗнчи упана (унта ҫавӑн пек кӳлепе ларать) ҫак кунсенче хӑлхаллӑ ҫӗлӗк тӑхӑнтартнӑ. Ахаль ҫӗлӗк те мар, мулаххайӗ салтакри пек, ҫитменнине вӑл тата – хӗрлӗ ҫӑлтӑрлӑ..

Упана унччен те тем тӗрлӗ тӑхӑнтартса пӑхнӑ. Халӑх тетелӗнчи «Новостная барахолка» пабликра пӗлтернӗ тӑрӑх, унӑн гардеробӗнче унччен Раҫҫей ялавӗ те, лӗпӗш евӗр кӑвак галстук та тата ытти те пулнӑ.

Упа кӳлепи айне «Рядовой медвежьей сотни» тесе ҫырса хунӑ.

«Дорисс» тӗп директорӗн пуканне ҫӗнӗ ҫын йышӑннӑ. Ку пукана Люция Сафина шанса панӑ. Унччен вара вӑл Алексей Ладыковӑн ҫумӗ пулнӑ.

Сафина – 49 ҫулта. Хӑй Казахстанра ҫуралнӑ, И.Н.Ульянов ячӗллӗ ЧПУн экономика факультетне пӗтернӗ. 1993 ҫулта «Дорисра» ӗҫлеме пуҫланӑ. Аудит, бухгалтери тата налук учетӗнче 25 ҫул ытла ӗҫленӗ. 2021 ҫулхи ҫу уйӑхӗнче вӑл Шупашкар хула администрацийӗн пуҫлӑхӗн ҫумӗ пулса тӑнӑ, экономика аталанӑвӗ тата финанс енӗпе вӑй хунӑ. Ҫулталӑк каялла «Дорисс» директорӗн ҫумӗ тивӗҫне пурнӑҫлама тытӑннӑ.

"Про Город" сайтӗнчи сӑн

Общество транспортӗнче билет хакӗ ӳсесси пирки унта та кунта калаҫни илтӗнкелет. Ӗнер Шупашкартан Ҫӗнӗ Шупашкара ҫӳрекен маршрутсем ҫинче пушӑн 10-мӗшӗнчен хаксем ӳсесси пирки пӗлтерӳсем курӑнма пуҫланӑ.

Унта ҫырнӑ тӑрӑх, карттӑпа тӳлесен билет 37 тенкӗ пулӗ, карттӑсӑр - 40 тенкӗ. Хальхи хаксем вара ҫапларах: карттӑпа тӳлесен билет 34 тенке кайса ларать, унсӑр - 37 тенке.

"Про Город" сайтӗнчи сӑн

Паян Шупашкарта "Университет" микрорайонта ҫурт тӑрринчен пӑр катӑкӗ йӑтӑнса аннӑ. Ҫав вӑхӑра хӗрарӑм юр хырнӑ.

Телее, пӑр катӑкӗ унран кӑшт аяккарах ӳкнӗ. Пӑр ҫавӑнтах ларакан машина ҫине персе аннӑ. Юрать-ха, юр хыракан хӗрарӑм хӑранӑ кӑна, аманман.

Вырӑна полици ӗҫченӗсем ҫитнӗ.

Ӗнер Ҫӗнӗ Шупашкарта ҪҪХПИ инспекторӗсем "вунтӑваттӑмӗш" машинӑпа пынӑ водителе чарӑнма ыйтнӑ. Анчах руль умӗнчи хӗр чарӑнман, тарма пуҫланӑ.

Анчах тарнӑ чухне хӗр аварие лекнӗ. Унӑн права та ҫук иккен. Вӑл - автошкул курсанчӗ.

Хӗр каланӑ тӑрӑх, вӑл руль умне лариччен пӗр кӗленче сӑра ӗҫнӗ. Анчах медосвидетельсвовани вӑл урӑ пулнине кӑтартнӑ.

Аварире "Хендай" пассажирӗ аманнӑ.

ШӖМ тунӑ сӑн

Нарӑсӑ 23-мӗшӗнче ирхи 5 сехетре 16 ҫулти каччӑ икӗ тусӗпе каферен тухнӑ та руль умне ларнӑ. Вӑл ӳсӗр пулнӑ.

Полицейскисем ӑна курнӑ, чарӑнма ыйтнӑ. Анчах ӳсӗрскер итлемен - тарнӑ. Йӗрке хуралҫисем - ун хыҫҫӑн.

Хайхи каччӑ тарнӑ чухне кӗрт ҫине пырса тӑрӑннӑ. Водитель тата икӗ пассажир салонран тухса тарма пуҫланӑ. Йӗрке хуралҫисем вӗсене хӑваласа ҫитнӗ.

16-ри каччӑн водитель прави пулман. Халӗ ӗҫ-пуҫа тишкереҫҫӗ.

"Про Город" сайтӗнчи сӑн

Паян, Тӑван ҫӗршыв хӳтӗлевҫин кунӗнче, Шупашкарта автобусра икӗ арҫын ҫапӑҫнӑ.

"Про Город" хаҫата халӑх корреспонденчӗ пӗлтернӗ тӑрӑх, 13 сехет ҫурӑра Ҫӗнӗ Шупашкара ҫӳрекен 331-мӗш автобусра ӳсӗр арҫын ҫывӑрнӑ. "Модӑсен ҫучӗ" чарӑнӑва ҫитсен водитель ӑна вӑратнӑ та тухма ыйтнӑ. Лешӗ киӗшмен. Водитель ӑна ҫамкипе ҫапнӑ. Хӑйӗн куҫ харши ҫурӑлса кайнӑ. Пассажирӑн вара пичӗ суранланнӑ. Кун хыҫҫӑн ӳсӗр арҫын салонран тухнӑ.

cap.ru сӑнӳкерчӗкӗ

Шупашкарта пурӑнакан пӗр хӗрарӑм хӑйӗн кушаккине питӗ юратнӑ. Анчах пӗр кунхине чӗрчун килне таврӑнман. Пӗр кун иртнӗ, иккӗ. Пӗр кунхине хӗрарӑм уҫӑлма тухнӑ. Ҫавӑн чухне вӑл йывӑҫ тӑрринче кушак ларнине асӑрханӑ.

Хӗрарӑм шухӑшланӑ тӑрӑх, унта кушак йытӑсенчен хӑранипе тарса хӑпарса кайма пултарнӑ. Кушакӑн макӑрма та вӑйӗ юлман.

Хӗрарӑм Республикӑн ҫӑлавпа шырав службин ӗҫченӗсене чӗнсе илнӗ.

"Про Город" сайтӗнчи сӑн. Видео скринӗ

Шупашкарта хӗрарӑм ачипе ансӑр ҫулпа утнӑ. Вӗсене хирӗҫ машина пынӑ.

Водитель ирттерсе ярас тесе машинӑна чарнӑ. Хӗрарӑм вара лӑпкӑ иртсе кайман - машинӑна ҫапма, кӑшкӑрашма пуҫланӑ. Ҫакна унӑн ачи сӑнаса тӑнӑ.

Ҫак видео Ютубра сарӑлнӑ. Водитель ӑнлантарнӑ тӑрӑх, хӗрарӑм машинӑна ҫапнӑ вӑхӑтра тепӗр ҫын ҫав вырӑнтан чӑрмавсӑрах иртсе кайнӑ.

cap.ru сайтри сӑн

Атӑл ҫинче тетелпе пулӑ тытнӑ ҫынна тытса чарнӑ. Ӑна транспорт полицийӗн Чӑваш Енри лини уйрӑмӗн ӗҫченӗсем асӑрханӑ.

Ку мелпе Ҫӗнӗ Шупашкарта пурӑнакан арҫын тытнӑ. Вӑл – 35 ҫулта. Хайхискер Шупашкар ГЭСӗ патӗнче юраман вырӑнта тетелпе пулӑ тытса ларнӑ.

Йӗрке хуралҫисем тетелне, пулла туртса илнӗ. Халӗ кун тӗлӗшпе тӗрӗслев иртет.