Мускаври Тӗп клиника пульници пӗлтернӗ тӑрӑх паян каҫхине Михаил Горбачев вилсе кайнӑ. ТАСС пульница пӗлтернӗ хыпара вырнаҫтарнӑ: «Паян каҫхине йывӑр та нумай вӑхӑт хушши чирленӗ хыҫҫӑн Михаил Сергеевич Горбачев вилсе кайнӑ».
СССР пӗрремӗш президенчӗ 91 ҫулта пулнӑ. Вӑл 1931 ҫулхи пуш уйӑхӗн 2-мӗшӗнче Ставрополь крайне кӗрекен Привольное ялта ҫуралнӑ. Ашшӗ вырӑс, амӑшӗ украинка пулнӑ. Унӑн кукашшӗпе аслашшӗ иккӗшӗ те 1930-мӗш ҫулсенче репрессине ҫакланнӑ. Кукашшӗне Лев Троцкий шухӑшӗсене майлӑ пулнӑшӑн тытса хупнӑ, аслашшӗне — 1934 ҫулта тыр-пул акас плана пурнӑҫламаннишӗн. Кукашшӗне 1938 ҫулта ирӗке кӑларнӑ, аслашшӗне — 1936 ҫулта. Вӑрҫӑ вӑхӑтӗнче Провольное ял 1942 ҫулта нимӗҫсен аллине лекнӗ, ҫапла май 10 ҫулти Михаил пилӗк уйӑх хушши оккупацинче пурӑннӑ.
Михаил Сергеевич 13 ҫултах колхоза пулӑшма тытӑннӑ. 15 ҫула ҫитсен комбайнер пулӑшуҫи пулса ӗҫленӗ. Шкул пӗтернӗ хыҫҫӑн правительство наградине тивӗҫнине пула Мускаври патшалӑх университетне вӗренме кӗнӗ. Коммунистсен партине ҫамрӑкранах кӗме тӗмсӗлнӗ. 19 ҫулта кандидат пулса тӑнӑ. Тепӗр виҫӗ ҫултан ӑна КПСС членне илнӗ. 1955 ҫулта университетӑн юридици факультетӗнчен чаплӑ паллӑсемпе вӗренсе тухнӑ.
Раҫҫейре «Амӑшӗ Героиня» ята ҫирӗплетнӗ. Кам тивӗҫейӗ-ха ӑна? 10 ача е ытларах ҫуратнӑ, воспитани панӑ амӑшӗсем. Ҫак ятсӑр пуҫне 1 миллион тенкӗ парса хавхалантарӗҫ.
Анчах условисем пур. 10-мӗш ача ҫуралсанах «Амӑшӗ Героиня» пулаймӑн. Ҫав ачан 1 ҫул тултармалла. Кунсӑр пуҫне аслисен пурин те чӗрӗ пулмалла. Анчах ҫӗршыва хӳтеленӗ чухне хыпарсӑр ҫухалнӑ е вилнӗ, теракт е инкеклӗ лару-тӑрура пурнӑҫран уйрӑлнӑ, контузие пула чӗри тапма пӑрахнӑ ачасене шута илеҫҫӗ.
Малашне амӑшӗн капителӗн укҫипе харпӑр усламӑҫем уҫнӑ шкул умӗнхи вӗренӳ организацийӗшӗн те тӳлеме май пулӗ. Ку хушӑва РФ Президенчӗ Владимир Путин ҫурла уйӑхӗн 4-мӗшӗнче алӑ пуснӑ.
Анчах ҫав вӗренӳ организацийӗн ку енӗпе ӗҫлеме ирӗк паракан лицензи пулмалла. Аса илтерер: капитал укҫипе ҫурт-йӗр туянма, ачана вӗрентме, сусӑр шӑпӑрлан реабилитаци тухнӑшӑн тӳлеме юрать. Ҫавӑн пекех амӑшӗ нухрата пенсие яма, иккӗмӗш ачи 3 ҫул тултариччен капиталти укҫана уйӑхсерен илсе тӑма пултарать.
Сӑмах май, пӗрремӗш ача ҫуралнашӑн – 524,5 пин, иккӗмӗшӗшӗн 693,1 пин тенкӗ параҫҫӗ.
Шупашкарта пурӑнакан Шиловсем Пӗтӗм Раҫҫейри «Ҫулталӑк ҫемйи» конкурсра «Нумай ачаллӑ ҫемье» номинацире ҫӗнтернӗ.
Алексей Алексеевичпа Наталья Валерьевна 22 ҫул пӗрле пурӑнаҫҫӗ, икӗ ывӑлпа тӑватӑ хӗр ҫитӗнтереҫҫӗ. Аслӑ ывӑлӗпе хӗрӗ аслӑ шкулта вӗренеҫҫӗ, тепӗр виҫҫӗшӗ шкула ҫӳреҫҫӗ. Кӗҫӗнни ача пахчинче кӑна-ха.
Алексей Алексеевич - строитель, Наталья Валерьевна - Шупашкарти 93-мӗш ача пахчин воспитателӗ. Шиловсем - туслӑ, вӑхӑта пӗрле ирттерме юратакан ҫемье.
Кӑҫал «Раҫҫей мисӗ» конкурса Чӑваш Енрен икӗ пике хутшӑнӗ: Анна Будаева тата Яна Галанина. Пӗтӗмпе унта тӗрлӗ регионти 25 чиперук хутшӑнӗ. Конкурс утӑ уйӑхӗн 25-мӗшӗнче пулӗ.
Анна Будаева 2020 ҫулта Шупашкар мисӗ пулнӑ, кӑҫал вара Чӑваш Ен мисӗ. Вӑл электромеханика колледжӗнче программиста вӗренет.
Яна Галанина, Анна пекех, 19 ҫулта. Вӑл нумай ачаллӑ ҫемьере ҫуралнӑ, фотокамерӑна мӗн пӗчӗкрен юратать. Пӗр хушӑ модель агентствинче ӗҫленӗ.
Сӑмах май, «Раҫҫей мисӗ» конкурсра Чӑваш Ен пикисем икӗ хутчен ҫӗнтернӗ: 1996 ҫулта - Александра Петрова, 2018 ҫулта - Юлия Полячихина.
Раҫҫейре упӑте шатра чирӗпе аптӑранӑ пӗрремӗш ҫынна тупса палӑртнӑ. Роспотребнадзор пӗлтернӗ тӑрӑх, ҫак чир Европӑран таврӑннӑ ҫамрӑк ҫынна ернӗ. Вӑл ют ҫӗршывран килсен кӗлетки ҫине шатра тухса тулнӑ тесе пульницӑна пынӑ.
Ҫамрӑк ҫыннӑн чирӗ ҫӑмӑллӑн иртет. Роспотребнадзор хыпарланӑ тӑрӑх, ӑна сарӑлма паман.
Сӑмах май, упӑте шатра чирӗ - вирус инфекцийӗ. Унччен вӑл Африкӑра ҫеҫ тӗл пулнӑ. Кӑҫал ҫуркунне вӗҫӗнче тӗнчипе сарӑлма тытӑннӑ.
Роспотребнадзор Раҫҫейре кӑшӑлвируспа ҫыхӑннӑ пӗтӗм чарӑва пӑрахӑҫланӑ. Ку каварлӑ инфекципе чирлекенсен шучӗ чакнипе ҫыхӑннӑ. Ведомство пӗлтернӗ тӑрӑх, юлашки вӑхӑтра чирлесси 64 хут чакнӑ. Ытларахӑшӗ, 93 проценчӗ, чире ҫӑмӑллӑн чӑтса ирттернине палӑртнӑ.
Малашне ниҫта та общество вырӑнӗсенче маска тӑхӑнмалла мар, кафесемпе ресторансем те талӑкӗпех ӗҫлеме пултарӗҫ.
Анчах, ведомство пӗлтернӗ тӑрӑх, чарусене кайран тавӑрма та пултарӗҫ.
Ӗнер ҫӗнӗ хут укҫа пирки каласа пани вӑл тӳрех ҫынсен аллине лекессине пӗлтермест. «Коммерсантъ» ҫырнӑ тӑрӑх ҫӗнӗ 100 тенкӗллӗ укҫа ҫаврӑнӑша тухиччен темиҫе ҫул та иртме пултарать.
Сӑлтавӗ: ҫынсен аллине лекес умӗн ӑна банкоматсемпе терминалсем тата касса хатӗрӗсем палласа илме вӗренмелле. Ҫак ӗҫ вӑраха тӑсӑлма пултарассин сӑлтавӗ вара банкоматсем тӑвакан предприятисем Раҫҫейрен кайнипе ҫыхӑннӑ. Украинӑра ятарлӑ ҫар операцийӗ пуҫланнӑ хыҫҫӑн пирӗн ҫӗршывран NCR тата Diebold Nixdorf кайнӑ. Банкоматсен йышӗнчен 60% ытла ҫак икӗ фирма туса кӑларнисем йышӑнаҫҫӗ.
Иртнинче ҫӗнӗ 200 тата 2000 тенкӗ укҫасене ҫаврӑнӑша кӗртнӗ чухне (ку 2017 ҫулта пулса иртнӗччӗ) банкоматсене вӗсене палласа илме вӗрентесси уйӑх патнелле йышӑннӑ. Ку хутӗнче вара ҫак ӗҫ самай вӑраха тӑсӑлма пултарӗ — банкоматсем тӑвакансем те ҫӗршывран кайнӑ, пысӑк кредит организацисем те санкцисем айне лекнӗ.
2021 ҫулта пенсионерсен шучӗ 1,1 млн ҫын чакнӑ, вӗсенчен 200 000-ӗшӗ кӑшӑлвируса пула вилнӗ, ытти 900 000-шӗ пенси ҫулне ӳстернине пула ҫак категорине лекеймен. Кун пирки Раҫҫейӗн Пенси фончӗн пуҫлӑхӗ Андрей Кигим каласа панӑ. «Ку хисеп пысӑк, анчах вӑл ҫынсем нумай вилнипе ҫыхӑнман», — ӑнлантарнӑ вӑл Патшалӑх думинче тухса калаҫнӑ вӑхӑтра.
Фонд пуҫлӑхӗ каланӑ тӑрӑх, ҫӗршывра реформа пулман пулсан 2021 ҫулта пенсие 1,8 млн ҫын тухмалла пулнӑ. Саккуна улшӑнусем кӗртнӗ май ку хисеп икӗ хута яхӑн сахалрах пулнӑ иккен — 974 000.
Пенси илекенсен йышӗ ҫакӑн пек чакнине юлашки хут 1990-мӗш ҫулсен пуҫламӑшӗнче шута илнӗ. Ун чухне ҫак пулӑм патшалӑх бюджетне 1220 млрд тенкӗлӗх перекетлеме май панӑ, анчах мӗнпур укҫа-тенкӗ пенсионерсене хушма пулӑшу пама кайнӑ.
Палӑртмалла: Раҫҫей Пенси Фончӗн статистикинче гражданла пенсионерсене кӑна шута илнӗ — унччен Шалти ӗҫсен министерствин, Хӳтӗлев министерствин тата ытти вӑй-хал структурин ӗҫченӗсем урӑх юрисдикцире шутланаҫҫӗ. Унашкаллисен йышӗ 2,7 млн ҫынпа танлашать.
Пенсионерсен шучӗ 2022 ҫулта та чакса пырать. Ака уйӑхӗ тӗлне фонд 41,9 млн ҫынна шута илнӗ — ку вӑл кӑрлачри кӑтартусенчен 100 000 сахалрах.
Кызыл хула сучӗ, ҫӗртмен 30-мӗшӗнче регионти прокуратура пӗлтернӗ тӑрӑх, Тыва Республикин ҫыннисем тӗлӗшпе, вӑйпа лаша кӗтӗвне туртса илнипе айӑпа кӗнӗшӗн, йышӑну тунӑ.
Ку ӗҫе вӗсем 2019 ҫулхи ҫуркунне тунӑ. Республикӑри тӑватӑ ҫын ентешсен шучӗпе пуйма шухӑшланӑ, пӗр-пӗринпе калаҫса татӑлнӑ та темиҫе лаша вӑрланӑ тесе икӗ кӗтӳҫе айӑпланӑ. Хӑратса та хӗнесе вӗсем кӗтӳҫсене «айӑпа» йышӑнтарнӑ, вӑрланӑ пек шутланнӑ ҫичӗ лаша вырӑнне пӗтӗм кӗтеве — 184 лашана — пама хушнӑ.
Суд икӗ ҫынна пилӗк ҫуллӑха ирӗклӗхсӗр хӑварма йышӑннӑ; вӗсемпе пӗрле ҫак ӗҫе хутшӑннӑ ҫынсене ҫур ҫул сахалрах лекнӗ.
Асӑрхав ведомствинче пӗлтернӗ тӑрӑх, приговор хальлӗхе саккунлӑ вӑя кӗмен.
+12.5 °C