Иртнӗ шӑматкун ветеран йӗлтӗрҫӗсемпе спортӑн ҫак енне юратаканcем республика Элтеперӗн парнисене ҫӗнсе илессишӗн йӗлтӗр йӗрӗ ҫине тӑнӑ.

Ӑмӑрту Шупашкарти 2-мӗш спорт шкулӗн йӗлтӗр йӗрӗ ҫинче иртнӗ. Сивӗ ҫанталӑка пӑхмасӑрах унта Шупашкар, Ҫӗнӗ Шупашкар, Канаш, Улатӑр хулисенчи, Шупашкар, Куславкка, Шӑмӑршӑ, Ҫӗмӗрле, Вӑрнар, Красноармейски районӗсенчи тата Мари Элти 120 ҫын йӗлтӗр сырса пухӑннӑ.

Сӑмах май, кӑҫал Чӑваш Енре ҫӗршывра та халиччен ирттермен спартакиада йӗркелӗҫ. Унта ветерансем хутшӑнӗҫ. Вӗсем спортӑн тӗрлӗ енӗпе тупӑшӗҫ.

Ӑмӑртӑва хутшӑннисен хастарлӑхне ҫула кура 12 ушкӑна пайласа палӑртнӑ. Хӑйсен ушкӑнӗнче Джамалия Баранова, Николай Федоров, Владислав Васильев (Шупашкар районӗ), Наталья Кузьмина, Александр Антонов, Валерий Матвеев (Шупашкар), Сергей Павлов (Канаш хули), Юрий Мануйлов (Куславкка районӗ), Виктор Серенков (Улатӑр хули), Николай Алексеев (Сӗнтӗрвӑрри районӗ), Михаил Ямолкин, Александр Антонов (Мари Эл) палӑрнӑ.

Сывӑ пурнӑҫ йӗркине аталантарассишӗн ҫине тӑнӑшӑн патшалӑх символӗллӗ сехетпе Михаил Игнатьев Элтепер Красноармейски районӗнчи Владислав Терентьев тата Шупашкарти Александр Егорцов ветеран-йӗлтӗрҫӗсене, Сӗнтӗрвӑрри хула представительне Сергей Крупнова хавхалантарнӑ.

#Канаш, #Улатӑр, #Шупашкар районӗ, #Куславкка районӗ, #Шӑмӑршӑ районӗ, #Ҫӗмӗрле районӗ, #спорт, #Вӑрнар районӗ, #Красноармейски районӗ, #Шупашкар, #Ҫӗнӗ Шупашкар