Спектакль саманчӗ. Галина Зотова сӑнӗ

Хӗрлӗ Чутай районӗнче «Асамлӑ чаршав» фестиваль малалла пырать. Ял тӑрӑхӗсенчи пултарулӑх ушкӑнӗсем пӗрин хыҫҫӑн тепри Культура ҫурчӗсен сцени ҫине паллӑ драматургсен хайлавӗсемпе тухаҫҫӗ. Халӑх ытларах камитсем пӑхма юратать, ҫавӑнпа артистсем ытларах чухне сцена ҫинче кулӑшла спектакльсем лартса пама кӑмӑлларах параҫҫӗ.

Штанашсем вара вӑрҫӑ теми суйласа илнӗ, куракансем умне Беларуҫ драматургӗ Алексей Кудрявцев ҫырнӑ «Тӑлӑх Марье» ятлӑ икӗ пайлӑ драмӑпа тухрӗҫ. Залра «Асамлӑ чаршав» сӑн тата кӗнеке куравӗ йӗркеленӗ. Пьесӑри ӗҫсем вӑрҫӑ пӗтнӗренпе 40 ҫул иртсен пулса иртеҫҫӗ. Тӑлӑх хӗрарӑм Марье (Надежда Егорова) ӗмӗр тӑршшӗпех хӑй пытарнӑ летчикӑн вил тӑприне пӑхса пурӑнать, ӑна асрах тытать, вӑл ӑна юратнӑ пулнӑ-ҫке, ял пуҫлӑхӗ лайӑхрах кил-ҫурта куҫма сӗнсессӗн ҫӗнӗ ҫӗре ниепле те куҫса каясшӑн мар. Вӑрҫӑ пьесӑри геройсен асӗнче тарӑн йӗр хӑварнӑ: Мотя хӑйӗн ачине вӗлернӗ хыҫҫӑн ӑсран тайӑлнӑ (ку сӑнара Майа Егорова чуна тивмелле сӑнласа пачӗ, сасси, хӑйне тытни, пуканене ача тесе ыталаса алӑ ҫинче йӑтса ҫӳрени ытла та чуна ҫӳҫентерет. Ял администраторӗн Татьяна Ивановнӑн (Елена Майорова) амӑшне, Ольгӑна (Надежда Шипеева) нимӗҫсем пусмӑрланӑ иккен, Татьяна Ивановнӑра нимӗҫ юнӗ чупать... Марье юратса пурӑннӑ летчикӑн арӑмӗ (Светлана Соловьева) 40 ҫултан тупӑнать. Вӑл та мӑшӑрӗпе кӑштах та пурӑнса курайман иккен. Спектакльте ҫавӑн пекех почтальонка Ганна рольне Валентина Тумашкова лайӑх сӑнарларӗ.

Курӑнусем (актсем) хушшинче янӑранӑ кӗвӗсене вырӑнлӑ усӑ курнӑ тесе палӑртаҫҫӗ куракансем. Спектакле пӑхма ҫӑмӑлах мар — чуна хумхантарать, куҫран куҫҫуль кӑларать.

#Хӗрлӗ Чутай районӗ, #Штанаш, #спектакльсем, #фестивальсем, #театрсем