https://egoza-tag.ru/ сӑнӳкерчӗкӗ

Вӑрнар поселокӗнчи Дача урамӗ пӗлтӗрхи юпа уйӑхӗнченпе шывсӑр пурӑннӑ. Асӑннӑ уйӑхӑн 29-мӗшӗнче унта шыв пӑрӑхӗ ҫурӑлса кайнӑ. Вӑхӑт самай иртсен те яваплисем кӑлтӑка пӗтерме васкаман. Шыв пӑрӑхне хупса хунӑ та — ӗҫӗ-пуҫӗ пӗтнӗ. Ҫав урамра вара нумай ачалисен ҫӗр лаптӑкӗсем пулнӑ. Вӗсене ҫӗре ҫурт тума уйӑрса панӑ.

Шывсӑр пурӑнса ывӑннӑ ҫынсем тӗнче тетелӗнчи халӑх ушкӑнӗсенче ҫырма пуҫланӑ, прокуратурӑна ҫитнӗ.

Ҫынсен интересне хӳтӗлесе прокуратура суда ҫитнӗ. Суд Вӑрнар район администрацине Дача урамне шывпа тивӗҫтермелле тесе йышӑну кӑларнӑ. Вӑл хальлӗхе саккунлӑ вӑя кӗреймен-ха. Апла пулин те вырӑнти ҫынсем ку хыпаршӑн савӑннӑ, лав вырӑнтан хускаласса вӗсем халӗ тем пекех шанаҫҫӗ.

#ҫемьесем, #Вӑрнар, #Вӑрнар районӗ, #судсем, #пӑтӑрмахсем, #прокуратура