«Хыпар» хаҫат пӗлтернӗ тӑрӑх, 2012 ҫулхи утӑн 17-мӗшӗнче чӑваш чӗлхин паллӑ тӗпчевҫи, филологи ӑслӑлӑхӗсен кандидачӗ, Чӑваш Республикин тава тивӗҫлӗ культура ӗҫченӗ Анатолий Ермолаевич Горшков доцент пирӗнтен яланлӑхах уйрӑлса кайрӗ.

Анатолий Ермолаевич Горшков 1931 ҫулхи кӑрлачӑн 5-мӗшӗнче Муркаш районне кӗрекен Вускасси ялӗнче хресчен ҫемйинче кун ҫути курнӑ. 1938 ҫулта Сӑпайкассинчи пуҫламӑш шкулта, унтан Калайкассинчи ҫичӗ ҫул вӗренмелли, Ишлейри вӑтам шкулсенче ӑс пухать. 1949 ҫулхи кӗркунне Чӑваш патшалӑх педагогика институтне вӗренме кӗрет. Аслӑ шкула хӗрлӗ дипломпа пӗтернӗ хыҫҫӑн пӗр хушӑ Чӑваш патшалӑх кӗнеке издательствинче вӗрентӳпе педагогика литературин редакторӗнче ӗҫлет. 1954 ҫулта педагогика институчӗн аспирантурине вӗренме кӗрет. Ӑна пӗтернӗ хыҫҫӑн Анатолий Ермолаевич каллех издательствӑна таврӑнать, 1961-1965 ҫулсенче тӗп редакторта ӗҫлет.

1964 ҫулта тӗпчевҫӗ филологи ӑслӑлӑхӗсен кандидачӗ пулса тӑрать. 1965–1968 ҫулсенче — Чӑваш АССР Министрсен Канашӗ ҫумӗнчи Пичет управленийӗн ертӳҫи. 1968 ҫулта паллӑ, талантлӑ ӑсчах чӑваш чӗлхин аталанӑвне малалла тишкерес ӗмӗтпе Чӑваш АССР Министрсен Канашӗ ҫумӗнчи наука-тӗпчев институчӗн директорӗн ҫумӗнче ӗҫлет. Унта вӑй хунӑ вӑхӑтра А.Е.Горшков ӑслӑлӑх енӗпе 100 яхӑн статья пичетлет, кӗнекесем кӑларать. Унӑн «Мӗнле каласан тӗрӗс? Словарь-справочник» (1973), «Сӑмах пултӑр уҫӑмлӑ, шухӑш пултӑр витӗмле» (1980), «Чӑваш чӗлхи: лексика, фразеологи, пуплев культури» (1997) монографисене вуламан ҫын ҫук-тӑр. А.Е.Горшков чӑваш чӗлхе вӗрентӗвӗнче пуҫласа «Чӑваш чӗлхин кӗске орфоэпи словарьне» тата «Чӑваш чӗлхин фразеологи словарьне» ҫырса хатӗрлесе пичетлесе кӑларать. 1982 ҫулта кун ҫути курнӑ «Чӑвашла-вырӑсла словарь» хатӗрлес ӗҫре те тӗпчевҫӗн тӳпи пысӑк.

Юлашки вӑхӑтра А.Е.Горшков «Чӑваш чӗлхи. Пуплев культури. Хӑнӑхтарусем», «Чӗлхе пӗлӗвӗн кӳртӗмӗ», «Чӑваш чӑлхипе вырӑс чӗлхин шайлаштаруллӑ грамматики», «Чӑваш чӗлхи, риторика тата пуплев этикечӗ», «Стилистика тата текстсен чӗлхине редакцилесси» ятлӑ вӗренӳ пособийӗсем ҫырса хатӗрлерӗ.

Паллӑ тӗпчевҫӗ 1990 ҫулхи юпа уйӑхӗн 1-мӗшӗнчен пуҫласа 2011 ҫулччен И.Я.Яковлев ячӗллӗ Чӑваш патшалӑх педагогика университетӗнче ӗҫленӗ.

А.Е.Горшковӑн ҫутӑ сӑнарӗ ӗмӗрлӗхех пирӗн чӗрере пулӗ.

#Вускасси, #Муркаш районӗ, #ҫухатусем