Пуш уйӑхӗн 22-мӗшӗнче ҫӗрле Елчӗк районӗнче пурӑнакан 18 ҫулти каччӑ ашшӗ-амӑшӗн машинине ыйтмасӑрах тапратнӑ та тусӗпе пӗрле Ҫӗнӗ Шупашкарти каҫхи клуба вӗҫтернӗ. Хайхискерӗн права та пулман.

Анчах каччӑсем клубра ташлайман – машинӑна ҪҪХПИ инспекторӗсем асӑрханӑ. Пакунлисем вӗсене чарӑнма темиҫе хутчен те ыйтнӑ, анчах лешсем хӑнк та туман. Ҫапах каччӑсене тытса чарнӑ.

Водитель алкоголь тесчӗ витӗр тухма килӗшмен (ӑна 15 талӑклӑха арестлеме е 30 пин тенкӗлӗх штрафлама пултараҫҫӗ). ҪҪХПИ инспекторӗсем ыйтнипе чарӑнманшӑн 500-800 тенкӗ штраф парӗҫ. Ҫитменнине, водитель светофор хӗрлӗ ҫутнӑ чухне пилӗк хутчен чарӑнман. Куншӑн та штрафлӗҫ.

#Елчӗк районӗ, #ҪҪХПИ, #штрафсем, #Ҫӗнӗ Шупашкар