Паян, утӑ уйӑхӗн 5-мӗшӗнче, Чӑваш Енри сакӑр районта «Чӑвашавтотранс» автобусӗсем ҫула тухмӗҫ. Кун пирки предприяти вокзалсен хуҫине — «АвтоВАС» акционерсен уҫӑ обществине — асӑрхаттарнӑ. Утӑ уйӑхӗн 3-мӗшӗнче шӑрҫаланӑ ҫырӑва вӑл Чӑваш Енӗн Транспорт тата ҫул-йӗр хуҫалӑхӗн министерствине те ӑсатнӑ.

«Чӑвашавтотрансӑн» автобусӗсем хӑш-пӗр хулара ҫӳреме пӑрахассине ведомство хӑйӗн сайтӗнче ӗнер пӗлтернине тӗпе хурса ку хыпара Чӑваш халӑх сайчӗ ӗнер пӗлтернӗччӗ-ха.

Министерство асӑннӑ хуласенче (Улатӑр, Ҫӗнӗ Шупашкар, Канаш, Куславкка, Ҫӗмӗрле) ҫеҫ мар, районсенче те предприяти автобусӗсем ҫӳремӗҫ иккен. Маларах асӑннӑ ҫырупа Александр Белов журналист паллаштарнӑ. Сакӑр районта пассажирсене пачах та турттарма пӑрахассине систернӗ вӑл. Унта сӑмах Улатӑр, Канаш, Куславкка, Комсомольски, Хӗрлӗ Чутай, Сӗнтӗрвӑрри, Ҫӗмӗрле, Тӑвай районӗсем пирки пырать. Чи пысӑк йывӑрлӑх — вӗсенче урӑх перевозчиксем ҫукки.

Автобуссене ҫӳретме пӑрахнине «Чӑвашавтотранс» ҫунтармалли-сӗрмелли материалсем тата транспортра цифра тахографӗсем ҫуккипе сӑлтавланӑ. Чӑн та, вӑл прибор кирлӗ. Хулаҫум маршрутпа ҫӳрекен автобуссене унпа кӑҫалхи утӑ уйӑхӗн 1-мӗшӗччен тивӗҫтермелле пулнӑ. Ӑна-кӑна тӗшмӗртекенсен шучӗпе вара тӗп сӑлтав ҫапах та урӑххи: районсенчи чылай маршрут тӑкакли.

#Транспорт министерстви, #Ҫӗмӗрле, #Куславкка, #Канаш, #ҫул-йӗр, #транспорт, #Канаш районӗ, #Улатӑр районӗ, #Куславкка районӗ, #Комсомольски районӗ, #Хӗрлӗ Чутай районӗ, #Сӗнтӗрвӑрри районӗ, #Ҫӗмӗрле районӗ, #Тӑвай районӗ, #Улатӑр, #Ҫӗнӗ Шупашкар, #предприятисем, #экономика