Любовь Фёдоровӑна саламланӑ самант

Нарӑсӑн 12-мӗшӗнче К.В. Иванов ячӗллӗ Чӑваш патшалӑх академи драма театрӗнче Чӑваш Республикин халӑх артисткин, Раҫҫей Федерацийӗн тава тивӗҫлӗ артисткин Любовь Фёдоровӑн пултарулӑх каҫӗ иртрӗ.

Пултаруллӑ артисткӑна Чӑваш Ен культура министрӗ Роза Лизакова саламларӗ — театр ӳнерне аталантарнӑшӑн тата нумай ҫул чуна парса ӗҫленӗшӗн Любовь Михайловна Чӑваш Ен президенчӗн Тав сӑмахне тивӗҫни пирки пӗлтерчӗ.

Саламлама ҫавӑн пекех артистка ҫуралса ӳснӗ Шупашкар районӗнчи ҫынсем чылайӑн пынӑччӗ. Унсӑр пуҫне пултарулӑх каҫӗнче салам сӑмахӗ калакансен шутӗнче Любовь Михайловнӑн пултарулӑхне кӑмӑллакансем, тусӗсем, юлташӗсем, тӑванӗсем пулчӗҫ.

Пултарулӑх каҫне пухӑннисем А. Цагарелин «Евчӗ», Г. Медведевӑн «Пасар патши», Г. Башкуевӑн «Ҫӗнӗ арӑм», А. Лекановӑн «Юратсан юрлас килет» спектакльсенчи сценкӑсене курма пултарчӗҫ.

Любовь Михайловна Фёдорова 1951 ҫулхи кӑрлачӑн 12-мӗшӗнче Шупашкар районӗн Лапсар ялӗнче ҫуралнӑ. 1972 ҫулта ЛГИТМиК-ран вӗренсе тухнӑ.

К.В. Иванов ячӗллӗ Чӑваш патшалӑх академи драма театрӗнче Любовь Михайловна 100 ытла роль выляса кӑтартнӑ. Вӗсенчен чи паллисем: Миссис Пейдж (В. Шекпирӑн «Ашкӑнчӑк инкесем»); Елюна (А. Чебановӑн «Праски инке хӗр парать»); Ольга Геннадьевна (Г.Медведевӑн «Амаҫури»); Василиса Павловна (Н. Дьяконовӑн «Парнеллӗ туйӗ»); Фекла (Ф. Абрамовӑн «Ҫурт»); тата ыттисем.

Сӑнсем (автор — С. Журавлев)

#пултарулӑх каҫӗсем, #Лапсар, #К.В. Иванов ячӗллӗ Чӑваш патшалӑх академи драма театрӗ, #Шупашкар районӗ