Авӑнӑн 15-18-мӗшӗсенче Шупашкарта, Чӑваш патшалӑх гуманитари ӑслӑлӑхӗсен институтне йӗркеленӗренпе 80 ҫул ҫитнине халалласа тӗрӗк пӗлӳлӗхӗн тӗнче конференцийӗ иртӗ. Ирттерекенсем: Раҫҫейри тӗрӗк пӗлӳлӗхӗн комитечӗ, Пӗтӗм тӗнчери тӗрӗк халӑхӗсен Ассамблеи, РӐА чӗлхе пӗлӗвӗн институчӗ, Чӑваш Республикин вӗренӳ тата ҫамрӑксен политикин министерстви, Чӑваш патшалӑх гуманитари ӑслӑлӑхӗсен институчӗ.

Конференци чӗлхисем: чӑвашла, тӗрӗк чӗлхисем, вырӑсла, акӑлчанла.

Пурӗ 11 секци ӗҫлӗ:

1) Тӗрӗк пӗлӗвӗн еткерӗ, XXI ӗмерти вырӑнӗ.

2) Танлаштаруллӑ-историллӗ тӗрӗк пӗлӗвӗпе алтаистика. Секци хӑйӗн ӗҫне Н.И.Ашмарин ҫуралнӑранпа 140 ҫул ҫитнине халаллать.

3) Тӗрӗк чӗлхисенчи типологисемпе ареалсем.

4) Танлашруллӑ тата тишкерӳллӗ этнолингвокультурологи.

5) Тӗрӗк тӗнчин диахронири тата синхронири чӗлхе ӳкерчӗкӗ.

6) Тӗрӗк сасӑ пӗлӗвӗ тата грамматики. Секци хӑйӗн ӗҫне Л.С.Левитскаяна халаллать.

7) Тӗрӗк халӑхӗн пултарулахӗ тата литератури.

8) Компоративлӑ халап пӗлӗвӗ.

9) Тӗрӗк тӑрӑхӗсенчи чӗлхе лару-тӑрӑвӗн типологийӗ.

10) Пӗчӗк йышлӑ тӗрӗк чӗлхисем.

11) Историпе чӗлхе пӗлӗвне тишкерсе палӑртнӑ тӗрӗксен ҫыхӑнӑвӗсем.

Авӑнӑн 15-мӗшӗнче конферентҫӑсене йышӑнӗҫ, вырнаҫтарӗҫ. Тепӗр кун, авӑнӑн 16-мӗшӗнче, 8 сехетпе 10 хушшинче вӗсем регистрациленӗҫ.

Авӑнӑн 18-мӗшӗнче института никӗсленӗренпе 80 ҫул ҫитнӗ ятпа тӗрлӗ мероприятисем иртӗҫ.

Конференцие хутшӑнас тесен сирӗн хӑвӑр заявкӑна авӑнӑн 15-мӗшӗччен ҫак адреспа ярса памалла: 428015, Шупашкар, Мускав пр., 29 ҫ., 1 корпус.

#Шупашкар, #конференцисем, #ЧПГӐИ