Чӗмпӗр ҫыравҫин — __Анатоли Ырьятӑн__ — черетлӗ кeнеки кун ҫути курчӗ. Ячӗ — «Пурнӑҫ утравӗсем». Суйласа илнисем. Поэзи пайне ҫак сӑвӑ ярӑмӗсем вырнаҫнӑ: «Телее аякра шырамаҫҫӗ», «Ӑраскал», «Пурнӑҫ утравӗсем», «Пурнӑҫ тулӑх — пурӑнма пӗлсен», «Ватлӑха эп читлӗхе хупатӑп», «Юрра хывнӑ сӑвӑсем», «Удел», «Халалсем». Проза жанрӗпе виҫӗ ҫӗнӗ повеҫ вырнаҫнӑ: «Тамӑкра тӗвӗленнӗ кӗтрет», «Таврӑннӑ юрату», «Юн шыв мар». Кӗнекере Чӑваш тата Раҫҫей ҫыравҫисен пӗрлешӗвӗн пайташӗсем — Алексаедр Богатов, Серте Мишши, __Валентина Тарават__, Николай Ларионов, __Николай Симунов__, __Роман Чепунов__, __Анатолий Юман__ — автор пултарулӑхне хак панӑ статьясем, халалсем кӗнӗ. Сӑнӳкерчӗксем нумай. Кӗнеке «Хамашкал эп» сӑвӑпа уҫӑлать.

Хамашкал ман туйӑм. Хамашкал ман кӑмӑл.

Хамашкал пулнӑран пурӑнма та ҫӑмӑл.

Телейлӗ ман ӗмӗр. Телейлӗ эп — пӗлӗр!

Пысӑк пуҫлӑ ҫын мар, ятран кӑна чӗнӗр.

Анне парнелерӗ мана ҫивӗч ӑсне.

Атте парнелерӗ мӑшӑр кӑвак куҫне.

Ял-йышпа тӑвансем вӑй-хал парнелерӗҫ,

«Тӑхӑрьял ятне эс ҫӗклеме пӗл!» — терӗҫ.

Хамашкал ман туйӑм. Хамашкал ман кӑмӑл.

Хамашкал пулнӑран пурӑнма та ҫӑмӑл.

Ҫӗнӗ вӑйпа кӗрӗп Ҫӗнӗ ӗмӗре,

Ҫӗкленсе таптӑрах ман кӑварлӑ чӗре!

Кӗнекене вулакансем патне Ҫӗнӗ Чӗмпӗрти Культура керменӗнче илсе ҫитерчӗҫ.