Юрий Пичугин тунӑ сӑн

Шупашкарта пурӑнакан 14 ҫулти Никита Борисов «Пӗрлӗхлӗ Раҫҫей» партин Шупашкарти уйрӑмӗ тата Дмитрий Медведевӑн йышӑну пӳлӗмӗ умне пикета пӗччченех тухнӑ.

7-мӗш класра вӗренекен арҫын ача амӑшӗпе мӗн ҫуралнӑранпах 6 тӑваткал метрлӑ пӳлӗмре пурӑнать-мӗн. Вӗсем пурӑнмалли условисене лайӑхлатмашкӑн черете тӑнӑ, анчах вӑл ниепле те шумасть. Хула администрацийӗ вӗсене ҫурт памашкӑн май ҫуккине каланӑ.

4 уйӑх каялла Никита Алена Аршинова патне ҫырӳ ҫырнӑ. Анчах депутат ӑна йышӑнма хирӗҫленӗ, ҫырӑвне илнӗ. Право хӳтӗлевҫи ҫакна акӑ мӗнле ӑнлантарнӑ: ача Навальный енче пулни Аршиновӑна килӗшмест имӗш.

Никитӑсен пӳлӗмӗнчех тепӗр кӳршӗ пурӑнать. Вӑл эпилепсипе чирлӗ. Никита ун валли васкавлӑ медпулӑшу пӗрре мар чӗннӗ. Амӑшӗ Ирина Борисова кӳрши чирлӗ пулнӑран вӗсене пушшех те урӑх кӗтес уйӑрса памалла тесе шухӑшлать.

Нарӑсӑн 23-мӗшӗнче Никитӑна КПРФ митингӗнче тытса чарнӑ. Вӑл унта «Взятка» хаҫат валеҫнӗ. Хаҫатра вӗсем пӗчӗк пӳлӗмре хӗсӗнсе пурӑнни пирки статья тухнӑ пулнӑ.

Паян ЧР Элтеперӗ Михаил Игнатьев Тутарстан президентне Рустам Минниханова «Чӑваш Республики умӗнчи тава тивӗҫлӗ ӗҫсемшӗн» орденпа чысласси пирки хушӑва алӑ пуснӑ.

Хушура президента мӗншӗн орденпа чысланине кӑтартнӑ: «туслӑха тата килӗштерсе ӗҫлессине пысӑк тӳпе хывнӑшӑн». Палӑртмалла: Рустам Нургалиевич Тутарстана 2010 ҫулхи пушӑн 25-мӗшӗнче ертсе пыма тытӑннӑ.

Рустам Минниханов Шупашкарта иртекен федераци Сапантуйне килнине пӗлтернӗччӗ. «Чӑваш Республикинче 34 пин тутар пурӑнать. Вӗсем кунта ӗҫлеҫҫӗ. Ҫав вӑхӑтрах пирӗн республикӑра – 116 пин чӑваш, вӗсем хӑйсен чӗлхине вӗренеҫҫӗ, культурине упраҫҫӗ, эпир вара вӗсене пулӑшатпӑр, яланах пулӑшӑпӑр та», - тенӗ Рустам Нургалиевич уявра.

Икӗ ен ҫитес ҫул Тутарстанра Пӗтӗм Раҫҫейри чӑваш культурин «Уявне» ирттерме калаҫса татӑлнӑ.

Ӗнер Чӑваш Енӗн Патшалӑх Канашӗн социаллӑ политика тата наци ыйтӑвӗсемпе ӗҫлекен, ҫавӑн пекех экономика комитечӗсем лару ирттернӗ. РФ коммунистсен партийӗн пайташӗ, чӑваш парламенчӗн депутачӗ Григорий Данилов Фейсбукра пӗлтернӗ тӑрӑх, ларӑва васкавлӑ йӗркеленӗ. Мероприяти пирки электрон пуштӑпа кӑнтӑрла пӗлтернӗ иккен, вӑл 17 сехетре пуҫланнӑ.

Ларура пенсие тухас вӑхӑта тӑсас ыйтӑва сӳтсе явнӑ. Коммунистсем ку саккун проектне ырламаҫҫӗ иккен, вӗсен хӑйсен хаклавӗ. Григорий Данилов чӑваш парламенчӗн хӑш депутачӗ епле сасӑланине каярах пӗлтерме шантарнӑ.

ЧР Сывлӑх сыхлавӗн министерствине 5 ҫул ертсе пынӑ Алла Самойлова сывлӑх сыхлавӗн тытӑмӗнче федераци тӗрӗслев службин канашҫи пулӗ. Аса илтерер: Алла Владимировна министр пуканне пӗлтӗр, 2017 ҫулта, пушатнӑ.

Алла Самойлова министерствӑна ертсе пыриччен Республикӑри ҫемье планламалли тата репродукци центрӗн тӗп тухтӑрӗ пулнӑ, унтан Президент пепкелӗх центрӗнче тӗп тухтӑр тивӗҫӗсене пурнӑҫланӑ. Вӑл – медицина ӑслӑлӑхӗсен докторӗ, Чӑваш Республикин тава тивӗҫлӗ тухтӑрӗ.

Патшалӑх службинчен кайсан Алла Самойлова «Чувашиякурорт» санатори комплексӗн генеральнӑй директорӗ-тӗп тухтӑрӗ пулнӑ. Халӗ ун вырӑнӗнче Светлана Тюрникова ӗҫлет.

«Коммерсантъ» деклараци кампанине пӗтӗмлетнӗ. Ҫӗртме уйӑхӗн пуҫламӑшӗччен Раҫҫейри регион пуҫлӑхӗсем пӗлтӗрхи тупӑшсене кӑтартнӑ.

Чӑваш Енӗн Элтеперӗ Михаил Игнатьевӑн мӗн чухлӗ пурлӑх пулни паллӑ. Унӑн ҫӗр лаптӑкӗ нумай. Ку енӗпе Михаил Васильевич танлаштарӑмра чи малти йӗркесенчен пӗрне, 3-мӗшне, лекнӗ.

Михаил Игнатьевӑн харпӑрлӑхӗнче 58,2 пин тӑваткал метр ҫӗр шутланать. Танлаштарӑмра пӗрремӗш вырӑна Красноярск крайӗн кӗпӗрнаттӑрӗ йышӑннӑ. Унӑн харпӑрлӑхӗнче 224,6 пин тӑваткал лаптӑк. Иккӗмӗш вырӑнта Брянск облаҫӗн пуҫлӑхӗ. Унӑн 189,2 пин тӑваткал метр ҫӗр пур.

Михаил Анисимов министр

Паян Чӑваш Енӗн Цифра аталанӑвӗн, информаци политикин тата массӑллӑ коммуникацисен министрне ҫирӗплетнӗ. Ҫак лава Михаил Анисимова шанса панӑ.

Михаил Владимирович 1995 ҫулта И.Я. Яковлев ячӗллӗ Чӑваш патшалӑх педагогика институтӗнчен «Математика, информатика тата шутлав техники» специальноҫа алла илсе тухнӑ. Педагогика ӑслӑлӑхӗсен кандидачӗ.

Пулас министр ӗҫ биографине шкултан пуҫланӑ. 1994 ҫулта вӑл Шупашкарти 51-мӗш вӑтам шкулта математика тата информатикӑпа шутлав техникин учителӗнче ӗҫлеме тытӑннӑ. Каярах ЧППУра информаци центрӗн ертӳҫинче, Инҫет вӗрентӗвӗн республикӑри центрӗн, Чӑваш Енӗн Сывлӑх сыхлав министерствин Медицинӑн информаци центрӗн, ЧР Информаци политикин министерствин Информаци технологийӗсен центрӗн пуҫлӑхӗсенче тӑрӑшнӑ.

Пӗлтӗрхи нарӑс уйӑхӗнче Михаил Анисимова Чӑваш Енӗн информаци политикин тата массӑллӑ коммуникацисен министрӗн ҫумне ҫирӗплетнӗ.

Чӑваш Енӗн экс-президенчӗ, РФ Федераци Канашӗн председателӗн ҫумӗ Николай Федоров Шупашкар ҫыннисемпе тӗл пулнӑ, вӗсен ыйтӑвӗсене хуравланӑ.

Кунсӑр пуҫне Николай Васильевич услам элчисемпе строительство комплексӗнчи лару-тӑрӑва сӳтсе явнӑ. Ку тытӑмра ҫивӗч ыйтусем пур-мӗн.

Сенатора регионта патшалӑх ҫурт-йӗр фончӗн программи ӗҫлеменнине пӗлтернӗ, ҫавна май чылай строительство предприятийӗн саккассем ҫук. Ҫамрӑк вӗрентекенсем, тухтӑрсем, хысна тытӑмӗнчи ытти ӗҫченсем унччен ҫак программӑпа усӑ курса ҫурт-йӗр ыйтӑвне татса панӑ пулсан халӗ унашкал май ҫук, ҫавна май чылайӑшӗ республикӑран каять.

Усламҫӑсем вырӑнти влаҫ ура хунине те пытарман. Вӗсем ӗҫлеме чӑрмантараҫҫӗ-мӗн.

Владимир Иванов ректор халӗ депутат

И.Я. Яковлев ячӗллӗ Чӑваш патшалӑх педагогика университечӗн ректорне Владимир Иванова Чӑваш Енӗн Патшалӑх Канашӗн депутатне суйланӑ. Уншӑн суйлавҫӑсен 76-а яхӑн проценчӗ хӑйӗн сассине панӑ.

Аса илтерер, ӗнер, ҫӗртме уйӑхӗн 3-мӗшӗнче Чӑваш Енре тӗрлӗ шайри депутатсене суйлассипе хушма суйлав иртнӗ. Республикӑн Патшалӑх Канашне Етӗрнери пӗр мандатлӑ 9-мӗш суйлав округӗпе суйланӑ. Шупашкар хулин Депутатсен пухӑвне те унччен пушӑннӑ вырӑна тепӗр ҫынна суйланӑ.

Кунсӑр пуҫне Элӗк районӗнчи Шӗмшеш тата Етӗрне районӗнчи Иваньково ял тӑрӑхӗсен пухӑвӗсен депутачӗсене суйланӑ. Элӗк районӗнче ҫынсем Раҫҫей Федерацийӗн коммунистсен партийӗн пайташне депутата шаннӑ.

Чӑваш Енӗн Элтеперӗ Правительство пайташӗсемпе паян ирттернӗ канашлура ЧР Тӗп суйлав комиссийӗн ертӳҫи Александр Цветков суйлав «яланхиллех уҫҫӑн» иртнине ӗнентернӗ.

Кӑҫалхи пуш уйӑхӗн 6-мӗшӗнче ЧР спорт министрӗн ҫумне Алексей Яковлева Шупашкарти Ленин районӗн сучӗ пӗтӗмӗшле режимлӑ колоние 4 ҫул ҫурӑлӑха ӑсатма приговор вуланӑ, кунсӑр пуҫне патшалӑх службинче хӑш-пӗр должноҫа 3 ҫул йышӑнма чарнӑ. Тата унӑн ЧР Спорт министерствине 10 миллион ытла тенкӗ тӑкака саплаштармалла.

Ӗнер ЧР Аслӑ сучӗ айӑплав приговорне улӑштарнӑ, кун хыҫҫӑн Алексей Яковлев тӗлӗшпе амнисти акчӗ пурнӑҫлама май пулнӑ. Ҫитес вӑхӑтра ӑна ирӗке кӑларӗҫ.

Следстви версийӗ тӑрӑх, министр ҫумӗ 2013 ҫулта ведомство ячӗпе «Шурӑ чулсем» республика центрне реконструкцилемешкӗн проект документацине хатӗрлеме Шупашкарти пӗр стройфирмӑпа 9 миллион ытла тенкӗлӗх патшалӑх килӗшӗвне алӑ пуснӑ. Шупашкарти маунтинбайк центрӗ ҫывӑхӗнчи ҫула тунӑ чухне те ҫакнашкалах лару-тӑру сиксе тухнӑ. Проектпа смета документацине патшалӑх экспертизи ырламасӑрах вӑл подрядчик счечӗ ҫине 1,2 миллион ытла тенкӗ куҫарса пама хушнӑ.

Аса илтерер: Алексей Яковлева 2016 ҫулхи раштав уйӑхӗнче ӗҫрен кӑларнӑ, пӗлтӗрхи авӑн уйӑхӗнче ун тӗлӗшпе пуҫарнӑ пуҫиле ӗҫе суда ярса панӑ.

Утӑ уйӑхӗн 3-мӗшӗнче Етӗрнери 9-мӗш номерлӗ пӗр мандатлӑ суйлав округӗпе Чӑваш Патшалӑх Канашӗн депутачӗн хушма суйлавӗ иртӗ. Вӑл Етӗрнепе Хӗрлӗ Чутай районӗсен тата Элӗк районӗнчи ултӑ ял тӑрӑхӗн территорийӗсенчи (Мӑн Выла, Крымзарай, Ураскилт, Тавӑт, Тени, Шӗмшеш ял тӑрӑхӗсенче) суйлавҫӑсем валли иртет.

2016 ҫулта иртнӗ суйлавра эпир Чӑваш Патшалӑх Канашӗн депутатне Николай Малова суйланӑ. Кайран Николай Малов Раҫҫей Патшалӑх Думин депутачӗ пулса тӑнӑ.

Чӑваш Енӗн Патшалӑх Канашӗн депутачӗ пулма 4 кандидатран пӗрне суйлӗҫ. Депутат мандачӗшӗн кӗрешӗве тухнисем: Владимир Леонидович Офаринов (1961 ҫулта ҫуралнӑ, «Тӗрӗслӗхшӗн Раҫҫей» партин пайташӗ), Владимир Николаевич Иванов (1957 ҫулта ҫуралнӑ, «Пӗрлӗхлӗ Раҫҫей» партин пайташӗ), Алексей Юрьевич Сапожников (1987 ҫулта ҫуралнӑ, либерал-демократсен партин пайташӗ) тата Андрей Иванович Игнатьев (1988 ҫулта ҫуралнӑ, Раҫҫей Федерацийӗн коммунистсен партийӗн пайташӗ).