Паян Питӗрте «Технологический институт» тата «Сенная площадь» станцийӗсен ҫывӑхӗнче 14 сехет те 40 минутра метро вакунӗнче взрыв пулнӑ. Наци антитеррор комитечӗ пӗлтернӗ тӑрах, хальлӗхе паллӑ мар взрыв хатӗрӗ сирпӗннӗ. Вырӑнта ФСБ ӗҫченӗсем ӗҫлеҫҫӗ.

Взрыв хыҫҫӑнах пассажирсене эвакуациленӗ, суранланнисене пулӑшу кӳнӗ. Питӗрти прокуратура ку ӗҫ тӗлӗшпе тӗрӗслев ирттерет. Ӑна хула прокурорӗ Сергей Литвиненко сӑнаса тӑрӗ. Вӑл пӑтӑрмах вырӑнне ҫитнӗ.

Малтанах метрори взрывра 10 ҫын вилни пирки пӗлтернӗ. Кайран ку хисеп 9-па танлашнӑ. Взрыв вӑхӑтӗнче 20 ытла ҫын аманнӑ. Халӗ вӗсене психологи тата медицина пулӑшӑвӗ кӳреҫҫӗ.

Раҫҫейре эрех хакне хӑпартасшӑн. РФ Финанс министерствине ҫур литр эрех хакне 219 тенкӗ таран ҫитерме хушнӑ. Кун пирки «Интерфакс» пӗлтерет.

Аса илтерер: халӗ ҫур литр эрех сахалтан та 190 тенкӗ тӑрать. Унӑн хакне 29 тенкӗ ӳстересшӗн. Документа Кремльте пӑхса тухӗҫ, ака уйӑхӗн 1-мӗшӗ тӗлне хатӗрлеме пӗтерӗҫ.

Рф Правительствинче ку ыйту пирки тахҫанах калаҫаҫҫӗ. Эрех хакне ӳстересси пирки кӑрлач тата нарӑс уйӑхӗсенче сӑмах хускатнӑ.

Эрех тенӗрен. Нумаях пулмасть Шупашкарта 26 пин литр суя эрех тупнӑ, ӑна хуҫисенчен туртса илнӗ. Кун пирки те Чӑваш халӑх сайтӗнче хыпарланӑччӗ.

Йӗрке хуралҫисем Смоленскра чирлӗ ачасем валли укҫа пухакан чӑваш фончӗпе интересленнӗ. Фонда Ҫӗнӗ Шупашкарта регистрациленӗ. Хӑй вара Смоленск тӑрӑхӗнче ӗҫлет.

Фонд элчи каланӑ тӑрӑх, вӗсем пухнӑ укҫан 20 процентне хӑйсене илеҫҫӗ. Тата ҫакна палӑртнӑ: реклама листисем ҫинче кӑтартнӑ банк карттин реквизичӗсем чирлӗ ачасен ашшӗ-амӑшӗн мар, хӑйӗн счечӗ ҫине кирлӗ ҫӗре куҫаракан организацин пулнӑ.

Ҫитменнине, Смоленски Ҫӗнтерӳ тӳремӗнче чирлӗ ачасем валли ҫул ҫитмен ачасем укҫа пухаҫҫӗ.

РФ Ӗҫлев министерстви 2018 ҫулта мӗнле канасси пирки шухӑшлать. Канмалли кунсем тата уявсем пирки постановлени проектне хатӗрленӗ ӗнтӗ.

Ҫитес ҫул Ҫӗнӗ ҫул хыҫҫӑнхи каникул 10 куна тӑсӑлӗ раштавӑн 30-мӗшӗнчен пуҫласа кӑрлачӑн 8-мӗшӗччен. Тӑван ҫӗршыв хӳтӗлевҫин кунӗнче, Пӗтӗм тӗнчери хӗрарӑмсен кунӗнче, ҫу уйӑхӗн 1-мӗшӗнче тата ытти увра канмалли кунсем пулӗҫ. Ҫӗнтерӳ кунӗнче вара 1 кун ҫеҫ ӗҫе тухмалла мар.

Ҫавӑн пекех пушӑн 9-мӗшӗнче тата ҫу уйӑхӗн 7-мӗшӗнче кантарӗҫ. Нарӑсӑн 23-25-мӗшӗсенче ӗҫе тухмалла мар. Пушӑн 8-11-мӗшӗсенче кантараҫҫӗ. Акан 29-мӗшӗнчен пуҫласа ҫу уйӑхӗн 2-мӗшӗнче ӗҫлеттермеҫҫӗ. Ҫӗртмен 10-12-мӗшӗсенче кантараҫҫӗ. Чӳкӗн 3-5-мӗшӗсенче те ӗҫе тухмӑпӑр.

Паян Патшалӑх Думин ларӑвӗнче пӑтӑрмах сиксе тухнӑ. Владимир Жириновские (ЛДПР парти ертӳҫи) сӑмах парсан вӑл Мускав облаҫӗнчи «Пӗрлӗхлӗ Раҫҫей» депутачӗсене хурласа пӗтернӗ. Микрофон умӗнчен каяс умӗн вара ҫитес ҫулхи суйлавра ҫӗнтерес пулсан «Пӗрлӗхлӗ Раҫҫей» депутачӗсене ҫакма тата персе пӑрахма хатӗр пулни ҫинсен каланӑ.

«Вӑрӑ-хурахла ӗҫсем сирӗн унта, Мускав облаҫӗнче! Вӑл чи криминаллӑ, чи преступлӑ область. Малтанхи Громов кӗпернаттӑр мӗнле апла пулнӑ, паян та ҫаплах... Куратӑр-и, «Пӗрлӗхлӗ Раҫҫей» мӗн хӑтланать? Акӑ вӗсем — сутӑннӑ депутатсем, ҫӗр хут сутӑннӑскерсем. Вӑрӑ-хурахсене тата мафине хӳтӗленӗшӗн «Пӗрлӗхлӗ Раҫҫейе» кӑларса ҫапмалла, депутат мандачӗсене туртса илмелле! Ҫитес ҫулта ак Кремле кӗрсе ларӑп, вара пурсӑра та сире персе пӑрахӑп, ҫакӑп» — тенӗ ЛДПР ертӳҫи.

Ытти фракцисен депутачӗсем Владимир Жириновские хӑйӗн сӑмахӗсемшӗн каҫару ыйтма каланӑ.

Александр Карелинпа Иосиф Кобзон. ТАСС сайтӗнчи Александр Шалгин сан ӳкерчӗкӗ

РФ Патшалӑх Думин депутачӗсем ларура ларасшӑн мар. Ҫакна хыпарланӑ май «РБК» информаци агентстви час-час сиктерекенсем хушшинче «Пӗрлӗхлӗ Раҫҫей» парти пайташӗсем нумайраххине асӑрханӑ. Ларӑва ҫӳреме кӑмӑлламаннисем хушшинче депутат-ҫӑлтӑрсемпе пуян усламҫӑсем палӑраҫҫӗ.

Юлашки виҫӗ уйӑхра депутатсенчен кам епле тытнине сӑнанӑ та, маларах асӑннӑ парти пайташӗсенчен 30-а яхӑн ҫын пленарлӑ ларусене ҫурринчен пуҫласа чӗрӗк пайӗ таран сиктернӗ. Ларӑва «Тӗрӗслӗхшӗн Раҫҫей» парти пайташӗсем те кӑмӑлласах каймаҫҫӗ темелле-ши — сиктерессипе вӗсем иккӗмӗш вырӑнта. Коммунистсемпе либерал-демократсем вӑл енчен лайӑххисен шутӗнче — ку партисен пайташӗсем хӑйсен тивӗҫне манмаҫҫӗ.

Ҫапах та экспертсенчен хӑшӗсем партисем тӑрӑх уйӑрнипе килӗшесшӗнех мар. Вӗсен шучӗпе, «Пӗрлӗхлӗ Раҫҫей» парти пайташӗсен шучӗ нумай, ларӑва сиктерекенсенчен нумайӑшӗ ҫавна май вӗсем пек пулса тухаҫҫӗ.

Вячеслав Ильин контр-адмирал

Мускавра Чӑвашран тухнӑ офицерсен пухӑвӗ иртнӗ. «Сыны Отечества» (чӑв. Тӑван ҫӗршыв ывӑлӗсем) офицерсен юлташлӑхӗн Мускаври организацийӗ ӗнер, нарӑсӑн 17-мӗшӗнче, ирттернӗ канашлӑва Хӗҫпӑшаллӑ ҫарсенче, Шалти ӗҫсен министерствинче, Федерацин хӑрушсӑрлӑх службинче, Инкеклӗ ӗҫсен министерствинче, следстви комитетӗнче, налук полицийӗнче тата ытти вырӑнта тӑрӑшакан офицерсем пухӑннӑ. Организацие 2000 ҫулта йӗркеленӗ. Йышра — 450 ытла ҫын.

Чӑвашран тухса Чӑваш Енпе ҫыхӑну татманскерсем иртнӗ ҫулхи ӗҫ-хӗле пӗтӗмлетнӗ. Юлташлӑхӑн пӗлтӗрхи ӗҫӗпе Владислав Ильин вице-адмирал, вӑл Мускаври организацин ертӳҫи, паллаштарнӑ. Унта Чӑваш Республикин Раҫҫей Президенчӗ ҫумӗнчи тулли праваллӑ пайташӗ Юрий Акиньшин хутшӑннӑ. Ҫӗршыв хӳтӗлевҫин кунӗ ҫывхарнӑ май офицерсене вӑл Чӑваш Ен Элтеперӗ Михаил Игнатьев ячӗпе саламланӑ. Уйрӑмах хастаррисене республика ертӳҫин тав хутне панӑ.

Мускавра кӑрлач уйӑхӗн вӗҫӗнче «Голос. Дети» проект валли клип ӳкернӗ. Унта пирӗн ентеш те хутшӑннӑ.

Шупашкарти 31-мӗш шкулта ӑс пухакан Александр Долинский телепроекта хутшӑнакан Рагда Ханивӑн тата Саша Савиновӑн клипӗнче тӗп роле калӑпланӑ.

Шупашкар хула администрацийӗн вӗренӳ управленийӗ пӗлтернӗ тӑрӑх, KID LIKES Cinema Production ача-пӑча компанийӗ клипра ӳкерӗнмешкӗн кастинг ирттересси пирки пӗлтернӗ. Унта Шупашкарти шкул ачи лекнӗ, ӑна тӗр роле шаннӑ.

«Летай» юрӑ клипне Мускавра тата Одинцовӑра ӳкернӗ. Нарӑс уйӑхӗн пуҫламӑшӗнче унӑн премьери пулнӑ. Сценари ҫапларах: тӗп сӑнар хоккейла вылясшӑн, анчах лару-тӑру пачах урӑхла пулса пырать.

Ижевскра пурӑнакан хӗрарӑм хӑйӗн хӗрне чикансене сутнӑ. Ачана машинӑна лартнӑ та Пермь хулине илсе кайнӑ.

Хӗрарӑм тӗпренчӗкне 12 пин тенкӗпе сутнӑ. Унта ӑна 15 ҫулти арҫын ачана качча панӑ. Хӗрача кунашкал пурнӑҫа чӑтайман — тапӑртан тарнӑ. Вӑл халӗ Питӗрте пурӑнма пултарать.

Ку тӗлӗшпе следовательсем пуҫиле ӗҫ пуҫарнӑ. Халӗ тӗпчев пырать. Хӗрарӑмӑн пӗлӗшӗ Оксана каланӑ тӑрӑх, амӑшӗ ача нумай ҫуратнӑ, вӗсене тивӗҫлипе пӑхмасть. Ҫавӑнпа вӑтам хӗрӗ Пермьрен шӑнкӑравласа япӑх пурӑнни пирки пӗлтерсен те, макӑрсан та вӑл пӗрре те кулянман.

Хӗрарӑм кун пек хӑтланнӑ хыҫҫӑн унпа пӗлӗшӗсем калаҫма пӑрахнӑ.

НТВ телеканалпа пыракан «Чудо техники» кӑларӑмра пирӗн маттур ентеше кӑтартнӑ. Сӗнӗрвӑрри районӗнчи Аксарин ялӗнче пурӑнакан Вячеслав Васильев пушмак хывакан хатӗр шухӑшласа кӑларнӑ.

Кӑларӑм нарӑс уйӑхӗн 12-мӗшӗнче эфира тухнӑ. «Эрнери ӑста» рубрикӑра Вячеслав Васильев хӑй шухӑшласа кӑларнӑ хатӗр пирки каласа кӑтартнӑ. Ҫавӑн пекех вӑл ҫак ӗҫе мӗнрен пуҫланнипе паллаштарнӑ.

Вячеслав каланӑ тӑрӑх, кӳрши пушмак хывма пулӑшакан механизм шухӑшласа кӑларма ыйтнӑ. Халӗ кунашкал хатӗрпе шкулта та, культура ҫуртӗнче те усӑ кураҫҫӗ.

Вячеслав Васильев ҫырла тасатакан машина та хатӗрленӗ. Вӑл ҫулҫине, тунине уйӑрать. Ӑста мотоблока та ҫӗнетнӗ. Халӗ вӑл унпа ҫӑмӑллӑнах сухалать.