chuvashia.sledcom.ru сӑнӳкерчӗкӗ

Шупашкарта пурӑнакан 25-ри хӗрарӑм амӑшне вӗлерме тӑнӑ.

Авӑн уйӑхӗн 16-мӗшӗнче 15 сехетре хайхискерпе 48 ҫулти амӑшӗ хирӗҫсе кайнӑ. Пӑтӑрмах хулари Граждан урамӗнчи нумай хваттерлӗ пӗр ҫуртра пулса иртнӗ. Тарӑхса кайнӑ хӗрӗ алла ҫӗҫӗ ярса илсе амӑшне хырӑмӗнчен тата ҫурӑмӗнчен 7 хутран кая мар ҫӗҫӗпе чикнӗ. Унтан вӑл килӗнчен тухса утнӑ.

Суранланнӑ хӗрарӑм хваттертен тухма пултарнӑ, унтан вӑл кӳршисенчен пулӑшу ыйтнӑ, лешсем васкавлӑ пулӑшу тухтӑрӗсене чӗнсе илнӗ.

Амӑшӗпе хирӗҫнӗ хыҫҫӑн 25-ри хӗр хулари кафесенчен пӗрне кайнӑ, унта пынисемпе хирӗҫме тытӑннӑ. Унтан ӑна йӗрке хуралҫисем тытса кайнӑ.

Хӗре хальлӗхе психиатри больницине вырнаҫтарнӑ. Амӑшне вӗлерме тӑнӑшӑн ун тӗлӗшпе пуҫиле пуҫарнӑ.

zori48.ru сӑнӳкерчӗкӗ

Шупашкар хулинче пурӑнакан 73 ҫулти хӗрарӑм иртнӗ эрнере ултавҫӑсен аллине чутах ҫакланман. Капкӑна ҫакланасран хӗрарӑма карас ҫыхӑнӑвӗн лавккинче ӗҫлекенсем вӑхӑтра тытса чарнӑ.

Карчӑк патне ҫав кун ултӑ сехет хушшинче 18 номертан шӑнкӑравланӑ. Паллӑ мар ҫынсем кинемее банкри укҫана ултавҫӑсенчен «сыхласа хӑварма» тупрана урӑх счёт ҫине куҫарма ӳкӗте кӗртме хӑтланнӑ.

Хӗрарӑм ӗненнӗ, банкри 500-е яхӑн пин тенке илнӗ те Калинин урамӗнчи суту-илӳ центрӗнчи карас ҫыхӑнӑвӗн лавккине укҫа куҫарма кайнӑ. Анчах унта ӗҫлекенсем хӗрарӑма ултавран тытса чарнӑ.

Карчӑка улталама хӑтланнӑ тӗслӗхпе йӗрке хуралҫисем пуҫиле ӗҫ пуҫарнӑ.

ШӖМ тунӑ сӑн

Авӑн уйӑхӗн 23-мӗшӗнче ирхи 7 сехетре Куславкка районӗнче, М-7 ҫул ҫинче, фурӑпа ГАЗ машина ҫапӑннӑ. Шел те, ГАЗель водителӗ, 35 ҫулти арҫын, ҫавӑнтах вилнӗ. Вӑл Хусан ҫынни пулнӑ.

Фура рулӗ умӗнче 36 ҫулти Дагестан ҫынни ларнӑ. Следстви версийӗ тӑрӑх, вӑл транспорт хирӗҫ килекен ҫул ҫине тухса кайса ГАЗельпе ҫапӑннӑ. Водитель тӗлӗшпе пуҫиле ӗҫ пуҫарнӑ.

gkan.cap.ru скриншочӗ

Канаш хула администрацийӗн пуҫлӑхӗн ҫумне явап тыттарнӑ. Атӑлҫи регионсем хушшинчи ҫутҫанталӑк прокуратуринче хыпарланӑ тӑрӑх, Шупашкарти ҫутҫанталӑка сыхлакан районсем хушшинчи прокуратура канашсем каяша тирпейлес ӗҫе епле пурнӑҫланине тӗрӗсленӗ.

Хула администрацийӗн пуҫлӑхӗн ҫумӗ — ҫурт-йӗрпе коммуналлӑ хуҫалӑх пайӗн пуҫлӑхӗ Евгений Козлов надзор органӗн ыйтӑвне ыйтнине вӑхӑтра хуравламан.

Прокурор ыйтнине пӑхӑнманшӑн Канашри тӳре-шара административлӑ майпа явап тыттарса 2 пин тенкӗ штраф хурса панӑ.

forum.na-svyazi.ru сӑнӳкерчӗкӗ

Шупашкар хулинче ҫӑмӑл машина йывӑҫа тӳнтерсе янӑ.

«Мазда» автомобиль хулари Дзержинский урамӗнчи йывӑҫ ҫине пырса кӗнӗ.

Пӑтӑрмах авӑн уйӑхӗн 23-мӗшӗнчи ҫӗрле пулса иртнӗ. Инкекре никам та шар курман имӗш. Кун пирки «Город грехов» (чӑв. Ҫылӑхсен хули) проектра пӗлтернӗ.

Видео тӑрӑх хакласан, «Рено» водителӗ малтан сылтӑм енчен сулахаялла пӑрӑнма тӑнӑ. «Мазда» машина водителӗ «Ренопа» пырса ҫапӑнас мар тесе тротуар ҫине тухса кайнӑ, унта вӑл йывӑҫа тӳнтерсе янӑ.

«Ҫыхӑнура» формура пӗлтернӗ тӑрӑх, инкекчен пӗр-икӗ ҫеккунт маларах «Мазда» водителӗ анлӑ сарлака йӗре пӑхмасӑр малалла вӗҫтернӗ.

sledcom.ru сӑнӳкерчӗкӗ

Атӑлҫи тӑрӑхӗнчи маньяка 30 ытла ҫынна вӗлернӗ тесе шухӑшлаҫҫӗ. Хусанта пурӑнакан 40 ҫулти Радик Тагиров тӗлӗшпе пуҫарнӑ пуҫиле ӗҫе РФ Следстви комитечӗн ӗҫченӗсем тӗпчесе пӗтернӗ.

Вӑйпитти 30 ытла ҫынна вӗлернӗ, 3 хутчен вӗлерме тӑнӑ, ватӑ ҫынсене хурахла тапӑнса 30 хут ытла ҫаратнӑ.

Пуҫтаха чылай вӑхӑт тытса чарайман. 10 пин ытла ҫынна тӗрӗсленӗ, 5 пин ытла эксперт тӗрӗслевӗ ирттернӗ.

Преступление ҫав арҫын 2011 ҫулхи пуш уйӑхӗнчен тытӑнса 2012 ҫулхи юпа уйӑхӗччен тунӑ. Арҫын Хусан, Нижнекамск, Волжск, Ижевск, Чулхула, Шупашкар, Ӗпхӳ, Перӗм, Екатеринбург, Сарӑту, Иваново, Киров, Самар, Челепи, Мускав хулисенче пурӑнакан кинемейсене шар кӑтартнӑ. Вӑл ватӑсене коммуналлӑ служба ӗҫченӗ тесе ӗнентерсе вӗсен килне кӗнӗ. Кайран кинемейсене тапӑнса пӑвса вӗлернӗ, карчӑксен укҫине илсе тухса кайнӑ. Хусан арҫынни Шупашкарти икӗ кинемее вӗлернӗ.

Ҫывӑх вӑхӑтра арҫынна суд тӑвӗҫ.

Инкеклӗ лару-тӑру министерстви

Ӗнер, авӑн уйӑхӗн 21-мӗшӗнче, ирхи 6 сехетре Патӑрьел районӗнчи Пӑлакассинче сысна комплексӗнче выльӑх-чӗрлӗх усрамалли ангар ҫунма тытӑннӑ. Юрать-ха, пушарнӑйсем ҫулӑма хӑвӑртах сӳнтернӗ. Пушар тухсан ангартан 50 сысна ҫурине эвакуациленӗ.

Сӑмах май, юлашки талӑкра республикӑра виҫӗ пушар пулнине палӑртнӑ. Елчӗк районӗнчи Курнавӑшра 67 ҫулти арҫыннӑн хуралтисем ҫунма пуҫланӑ.

morgau.cap.ru сӑнӳкерчӗкӗ

Муркаш районӗнчи Мӑн Сӗнтӗр ял тӑрӑхӗ вырӑнти Ҫӗнтерӳ паркне юсаса ҫӗнетес тенӗ. Асӑннӑ парка Тӑван ҫӗршывӑн аслӑ вӑрҫинче ҫӗнтернӗренпе 40 ҫул ҫитнине халалланӑ иккен.

Юсама килӗшекен организаци те тупӑннӑ. «Краснов» тулли мар яваплӑ обществӑпа килӗшӗве 2021 ҫулхи раштав уйӑхӗнче алӑ пуснӑ. Ӗҫӗн пӗтӗмӗшле хакне 16,8 миллион тенкӗ тесе кӑтартнӑ. Палӑртнине кӑҫалхи утӑ уйӑхӗн 31-мӗшӗ тӗлне вӗҫлеме ӗмӗтленнӗ.

Объекта кайса пӑхнӑ та — палӑртнине туса пӗтермен. Вак-тӗвек ӗҫсем ҫеҫ юлнӑ-ха, ҫапах та пуҫӑннине вӗҫлемеллех-ҫке. Туса пӗтерменнине укҫа ҫине куҫарсан 666 пин тенкӗ пухӑннӑ.

Строительство организацийӗн директорӗ тӗлӗшпе прокуратура административлӑ ӗҫ пуҫарнӑ. Надзор органӗ яваплисем ӗҫе епле вӗҫленине те тӗрӗслесе тӑрӗ.

21.мвд.рф сӑнӳкерчӗкӗ

Шупашкар хулинче пӗр каччӑ телефон ҫухатнӑ. Йӗрке хуралҫисене вӑл ӑнлантарса панӑ тӑрӑх, гаджет Ленинла Комсомол урамӗнчи хӑйӗн хваттерӗнче пулнӑ. 85 пин тенкӗ тӑракан телефона 21 ҫулти ҫамрӑк хӑйӗнпе юнашар хунӑ. Вӑрансан пӑхать те — хаклӑ япала ҫук.

Йӗрке хуралҫисем пӑтӑрмах тӗлӗшпе судпа темиҫе хутчен те айӑпланнӑ арҫынна тытса чарнӑ. Вӑл кӳршӗсем патне хӑнана пынӑ, кайма тухсан юнашар кил хуҫисен хваттер алӑкне питӗрменнине асӑрханӑ. Хваттерте пӗр ҫывӑрнӑ, унпа юнашар телефон выртнӑ. Вӑрӑ хаклӑ гаджета ҫаклатса тухса кайнӑ. Вӑл ӗнентернӗ тӑрӑх, вӑрланӑ телефона таҫта ҫухатса хӑварнӑ имӗш.

Халӗ йӗрке хуралҫисем гаджета шыраҫҫӗ.

chuvashia.sledcom.ru сӑнӳкерчӗкӗ

Полимер каяшӗсене тирпейлессипе ӗҫлекен Шупашкарти пӗр усламҫӑ шалу вӑхӑтра тӳлемен тесе шухӑшлаҫҫӗ. Ун тӗлӗшпе РФ Пуҫиле кодексӗн 145.1 статйин 2-мӗш пайӗпе ӗҫ пуҫарнӑ.

Тӗпчевҫӗсем шухӑшланӑ тӑрӑх, асӑннӑ организацире пӗр рабочие 47 пин тенкӗ шалу тӳлесе ҫитермен.

Шалу тӳлемен тӗслӗх пирки РФ Следстви комитечӗн Чӑваш Енри управленине темиҫе мелпе пӗлтерме пулать. Пӗрремӗшӗнчен, chuvashia.sledcom.ru сайтри интернет-приёмнӑй урлӑ; иккӗмӗшӗнчен, (8352) 624-658 шанчӑк телефонӗпе; виҫҫӗмӗшӗнчен, Следстви управленийӗн ертӳҫи патне ну (8352) 624-661 телефон номерӗпе йышӑнӑва ҫырӑнса.