pattar.cap.ru сӑнӳкерчӗкӗ

Чӑваш Енри ҫӑмӑл атлета Элтепер стипендине уйӑхсерен парса тӑрӗҫ.

Республика ертӳҫин Олег Николаевӑн йышӑнӑвӗпе килӗшӳллӗн Михаил Киргизов ҫӑмӑл атлет уйӑхсерен 25-шер пин тенкӗ стипенди илсе тӑрӗ. Укҫана кӑҫалхи пуш уйӑхӗн 1-мӗшӗнчен пуҫласа раштав уйӑхӗн 31-мӗшӗччен парӗҫ.

Михаил Киргизова Раҫҫейӗн пӗрлештернӗ спорт командине йышӑннӑ. Вӑл йыш Олимп вӑййисен программине спортӑн ҫуллахи енӗпе хутшӑнма хатӗрленет.

Михаил Киргизов Патӑрьел районӗнчи Первомайскинчен.

cap.ru сӑнӳкерчӗкӗ

Пӗтӗм чӑвашсен «Акатуй» уявне ирттерме Федерацин национальноҫсен ӗҫӗн агентстви пулӑшӗ. Ҫакӑн пирки Чӑваш Ен Элтеперӗ Олег Николаев агенство ертӳҫипе Игорь Бариновпа тӗл пулсан калаҫса татӑлнӑ.

Мускавра йӗркелекен ҫӗршыв шайӗнчи Акатуй Халӑх хуҫалӑхӗн ҫитӗнӗвӗсен куравӗн тата Измайлов паркӗн территорийӗнче иртӗ. Ку уява чӑвашсем ҫурхи уй-хир ӗҫне вӗҫленӗ хыҫҫӑн уявланӑ. Ырӑ йӑла-йӗркене тӑван халӑхӑмӑр паян та тивӗҫлипе тытса пырать. Ӑна ҫӗршывӑн тӗрлӗ кӗтесӗнче пурӑнакан йӑхташӑмӑрсем те ирттереҫҫӗ.

culture.cap.ru сӑнӳкерчӗкӗ

Ҫӗршывӑн тӗрлӗ регионӗ тӑрӑх гастрольпе ҫӳрекен Чӑваш патшалӑх юрӑпа ташӑ ансамбльне пур ҫӗрте те ӑшшӑн кӗтсе илеҫҫӗ. Кун пирки республикӑн Культура министерствин сайтӗнче хыпарланӑ.

Гастроле кайма коллектив «Гордимся Родиной своей» (чӑв. Тӑван ҫӗршывпа мӑнаҫланатпӑр) программа хатӗрленӗ. Унта ансамблӗн ылтӑн фондӗнчи вокалпа хореографи номерӗсем тата ҫӗнӗ постановкӑсем кӗнӗ.

Ӗнер пултарулӑх ушкӑнӗ Кироври П. Чайковский ячӗллӗ Вятка патшалӑх филармонийӗн сцени ҫинче концерт лартса панӑ. Паян артистсем Чистополь хулинчи куракансене хӑйсен пултарулӑхӗпе савӑнтарӗҫ.

elhammusic.com сӑнӳкерчӗкӗ

Паян, ака уйӑхӗн 4-мӗшӗнче, Чӑваш Енре Композиторсен союзне йӗркелесе янӑранпа 80 ҫул ҫитнӗ.

Чӑваш АССРӗнчи совет композиторӗсен союзӗн йӗркелӳ комитетне 1940 ҫулта пуҫарнӑ. Ҫав пӗрлешӗвӗн тӗп тӗллевӗ чӑваш наци культурине, унӑн йӑли-йӗркине аталантарасси тата чӑваш композиторӗсен произведенийӗсене халӑхра сарасси пулнӑ. Хамӑр тӑрӑхра ҫеҫ мар, ют регионсенче те.

obrazov.cap.ru сӑнӳкерчӗкӗ

Чӑваш Енре Китай культурин кунӗсем иртӗҫ. Ӑна ака уйӑхӗн 12-15-мӗшӗсенче йӗркелӗҫ.

Мероприятие савӑнӑҫлӑ лару-тӑрура ака уйӑхӗн 12-мӗшӗнче И.Я. Яковлев ячӗллӗ Чӑваш патшалӑх педагогика университетӗнче уҫӗҫ.

Китай культурин кунӗсенче китайской каллиграфийӗпе, цигун гимнастикӑпа, чей ӗҫессипе ӑсталӑх лаҫҫисем ӗҫлӗҫ.

Унсӑр пуҫне Раҫҫейпе Китай хутшӑнӑвӗсем, Иакинф Бичуринӑн китай грамматики, Китай живопиҫӗн философийӗпе хӑйне евӗрлӗхӗ ҫинчен лекцисем ирттерӗҫ.

Раҫҫейӗн наукӑсен акаемийӗн Китайпа хальхи вӑхӑтри Азин институчӗн ӑслӑлӑх ӗҫченӗн, китай живопиҫӗпе каллиграфи преподавателӗн Анна Донченкон куравӗ уҫӑлӗ.

culture.cap.ru сӑнӳкерчӗкӗ

Паян Ҫеҫпӗл Мишши ячӗллӗ Чӑваш патшалӑх ҫамрӑксен театрне йӗркеленӗренпе 90 ҫул ҫитнӗ.

Шӑп та лӑп тӑхӑр теҫетке ҫул каялла, 1933 ҫулхи ака уйӑхӗн 3-мӗшӗнче Шупашкарти рабочи клубӗнче (вӑл Ефремов купсасен буьварӗнче вырнаҫнӑ) Леонид Бочин пьесипе «Топай» спектакль кӑтартнӑ. Театр артисчӗсем Шупашкарти музыка техникумӗн театр уйрӑмӗн студенчӗсем пулнӑ. Театрта спектакльсене чӑвашла тата вырӑсла кӑтартнӑ.

1979 ҫулта коллектив Ҫеҫпӗл Мишши премине тивӗҫнӗ, 1984 ҫулта — Халӑхсен туслӑхӗн орденне. 1999 ҫултанпа театр Ҫеҫпӗл Мишши ячӗпе хисепленет.

Юбилей каҫне театрта ака уйӑхӗн 21-мӗшӗнче ирттерӗҫ.

culture.cap.ru сӑнӳкерчӗкӗ

Кӑҫалхи пуш уйӑхӗнчен пуҫласа ҫӗртме уйӑхӗччен ача-пӑча пултарулӑхӗн «Черчен чечексем» республикӑри фестиваль-конкурсӗ иртессине эпир унччен пӗлтернӗччӗ-ха. «Трактор тӑвакансен культура керменӗ» республикӑри халӑх пултарулӑхӗн центрӗ йӗркелекен ҫав конкурса хутшӑнма кая юлман-ха.

Конкурс виҫӗ тапхӑрпа иртӗ. Ака уйӑхӗн 10-мӗшӗччен хуласемпе муниципалитет округӗсенчи культурӑпа кану учрежденийӗсенче вырӑнти ӑстасене суйласа илӗҫ. Унтан вӗсем республикӑри халӑх пултарулӑхӗн центрӗн али витӗр тухӗҫ. Ҫав тӗрӗслев ака уйӑхӗн 11-мӗшӗнчен тытӑнса 22-мӗшӗччен пырӗ. Фестиваль-конкурсӑн виҫҫӗмӗш тапхӑрӗ ҫӗртме уйӑхӗн 24-мӗшӗнче иртӗ. Вӑл кун гала-концерт пулӗ.

drama21.ru сӑнӳкерчӗкӗ

Паян, пуш уйӑхӗн 30-мӗшӗнче, Чӑваш патшалӑх академи драма театрӗнче «Юлашки парӑм» спектакль кӑтартӗҫ. Ҫӗнӗ ӗҫе вырӑс драматургийӗн классикӗ Александр Островский ҫуралнӑранпа 200 ҫул ҫитнине халалланӑ.

Спектакле лартассипе ӗҫленӗ Чӑваш халӑх артистки Наталия Сергеева шухӑшланӑ тӑрӑх, Островскин хайлавӗсенче хӑйне евӗр чӗлхе те, пурнӑҫран илнӗ сӑнарсем те, пурнӑҫри ҫивӗч ыйтусем те пур. Спектакль — этемӗн ырӑ енӗсем хакне ҫухатни ҫинчен.

Рольсенче — Раҫҫей тава тивӗҫлӗ артистки Валентина Ситова, Чӑваш халӑх артисчӗсем Сергей Иванов тата Наталия Сергеева, Чӑваш Республикин тава тивӗҫлӗ артисчӗсем Валерий Карпов, Николай Сергеев тата Ирина Верьялова, ҫавӑн пекех театрӑн ытти актерӗ.

culture.cap.ru сӑнӳкерчӗкӗ

Республикӑри «Чӗнтӗрлӗ чаршав» XXIII конкурс ҫӗнтерӳҫисем паллӑ.

«Ҫулталӑкри чи лайӑх спектакль» – Юхма Мишшин романӗ тӑрӑх Борис Манджиев режиссёр лартнӑ «Куккук куҫҫулӗ» спектакль; «Ачасем валли хатӗрленӗ чи лайӑх спектакль» – Денис Андронов лартнӑ «Сказка о Ежике, волшебном лесе и еще кое о чем…».

Венера Пайгильдина артистка «Куккук куҫҫулӗ» спектакльти Эльза ролӗшӗн «Чи лайӑх хӗрарӑм сӑнарӗ» номинацире ҫӗнтернӗ; Александр Кураков «Айӑпсӑр чун» спектакльти Кӳршӗ сӑнарӗпе «Чи лайӑх арҫын сӑнарӗ» номинацие тивӗҫнӗ, «Иккӗмӗш планри чи лайӑх сӑнар» номинацие — «Братья Карамазовы» спектакльте Смердяков сӑнарне калӑпланӑ Владислав Савельев.

«Чи лайӑх сценографи» номинацире «Сӑр чикки» спектакле илемлетнӗ Елисей Шепелёва палӑртнӑ, «Спектакле музыка енчен чи лайӑх илемлетни» номинацие «Сказка о Ежике, волшебном лесе и еще кое о чем…» спектакле юрӑ-кӗвӗпе пуянлатнӑ Андрей Галкина панӑ.

hypar.ru сайтран илнӗ сӑнӳкерчӗк

Шӑп та лӑп 65 ҫул каялла, 1958 ҫулхи пуш уйӑхӗн 27-мӗшӗнче, СССР Журналистсен союзӗн Чӑваш Енри уйрӑмӗн йӗркелӳ съезчӗ иртнӗ. Кун пирки эпир Чӑваш Республикин хальхи вӑхӑтри историйӗ патшалӑх архивӗнчи хыпар тӑрӑх пӗлтӗмӗр.

Чӑваш Республикинче Журналистсен союзне унччен маларахах пуҫарса янӑ-ха. Кӑҫалхи ҫулла асӑннӑ пӗрлешӳ йӗркеленнӗренпе 100 ҫул ҫитӗ — Журналистсен тата писательсен «Канаш» союзне 1923 ҫулхи утӑ уйӑхӗнче йӗркеленӗ.

Чӑваш Енре журналистика XVIII ӗмӗр вӗҫӗнче никӗсленнӗ теҫҫӗ историксем. Ӑна пуҫарса яракансен йышӗнче Охадер Томеев, Еремей Рожанский, Спиридон Михайлов, Николай Золотницкий, Иван Яковлев, Алексей Рекеев, Никифор Охотников, Иван Юркин публицистсене тата ыттисене асӑнса хӑварма пулать.