Саха конгресӗ Раҫҫей Федерацийӗн Президенчӗ патне Заявленипе тухнӑ — Конституцин 68-мӗш статйине кӗртме палӑртнӑ улшӑнусемпе килӗшменни пирки пӗлтернӗ.

Аса илтеретпӗр, нумай пулмасть ҫӗршыв президенчӗ Конституцин 68-мӗш статйин 1-мӗш пунктне ҫапларах ҫырса хума сӗннӗ:

«Государственным языком РФ на всей ее территории является русский язык, как язык государствообразующего народа, входящего в многонациональный союз равноправных народов РФ» (чӑвашла: РФ патшалӑх чӗлхи пӗтӗм унӑн лаптӑкӗнче РФ пӗртан праваллӑ халӑхсен нумай нациллӗ пӗрлӗхне кӗрекен патшалӑха йӗркелекен халӑхӑн пек шутланакан вырӑс чӗлхи пулса тӑрать).

Якутсен шухӑшӗпе кунашкал ҫырни Раҫҫей Федерацийӗнчи халӑхсене уйӑрса хурӗ: пӗри тӗп халӑх пек шутланӗ, теприсем вара иккӗмӗшлисем пулса тарӗҫ. Саха конгресӗ шутлана тӑрӑх кунашкал пайланине хӑрушӑ та яваплӑхсӑр социаллӑ эксперимент пек ҫеҫ хаклама пулать. Ҫавна май вӗсем ку улшӑнусене пӑрахӑҫлама, тавлашуллӑ пункта малтанхи пекех хӑварма ыйтнӑ.

Конституцине улшӑнусем кӗртнине йышӑннипе килӗшменнине халӑхран сасӑлав урлӑ ака уйӑхӗн 22-мӗшӗнче ыйтса палӑртӗҫ.

Малалла...

rkob.med.cap.ru сӑнӳкерчӗкӗ

Ӗнер «Раҫҫей лидерӗсем» конкурсӑн «Сывлӑх сыхлавӗ» специализацире палӑртнӑ 30 ҫӗнтерӳҫӗ ятне пӗлтернӗ. Ҫурма финала Чӑваш Енри тухтӑр, Республикӑн клиника офтальмологи пульницин тӗп тухтӑрӗ Дмитрий Арсютов тухнӑ. Вӑл тата Раҫҫейӗн 9 регионӗнчи тепӗр тӑхӑр ҫын суперфинала лекнӗ. Вӗсем «Раҫҫей лидерӗсем» конкурсӑн суперфиналне Сочи хулине пуҫтарӑнӗҫ. Ӑмӑрту пуш уйӑхӗн 27-31-мӗшӗсенче иртӗ.

Дмитрий Арсютов 1977 ҫулта Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнче «Сиплев ӗҫӗ» специальноҫа алла илнӗ, 2007 ҫулта аспирантурӑран вӗренсе тухнӑ, 2017 ҫулта — экономика енӗпе магистратурӑран. Медицина ӑслӑлӑхӗсен кандидачӗ. 2010 ҫултанпа Республикӑн клиника офтальмологи пульницинче тӗп тухтӑр пулса ӗҫлет. ЧПУра офтальмологипе отоларингологи кафедрин доценчӗ. Чӑваш Патшалӑх Канашӗн депутачӗ.

http://yandex.ru/clck/jsredir?from=yandex.ru%3Bimages%2Ftouch%2Fsearch%3Bimages%3B%3B&text=&etext=8832.83jRulSlRahVz-cRkGp9LKkGk0WikBskfdpN46x_-N-53gECLq9d5Lb0GhXLdlKIijuqwIpTTnDlmv_MyHpSxeQAtn1__NZmSsvyrZrifyNhP49PMKj3mzPRArKWlm0T.9ec8800a5b6942858a9aaa3

Раҫҫее Иран тата Кӑнтӑр Корея ҫыннисене кӗртмӗҫ. Вӑхӑтлӑха. Ҫак йышӑну асӑннӑ тӑрӑхсенчен вӗренме, ӗҫлеме, курас тӗллевпе килекенсене пырса тивӗ. Пирӗн ҫӗршыв урлӑ урӑх ҫӗре каякансен те чарӑва пӑхӑнма тивӗҫ.

Раҫҫейӗн Ют ҫӗршыв ӗҫӗсен министерстви Иранӑн пирӗн ҫӗршыври консульствисенче виза пама чарӑнӗ. Иран гражданӗсене те электрон виза лекмӗ. Иран ҫыннисем транзит визӑсем те илеймӗҫ. Унччен панӑ визӑсене пӑрахӑҫлӗҫ.

Кӑнтӑр Корея ҫыннисене пирӗн ҫӗршыва пуш уйӑхӗн 1-мӗшӗ хыҫҫӑн кӗртме пӑрахнӑ.

Еврази экономика зонине кӗрекен ҫӗршыв ҫыннисене, самолёт экипажӗсене, официаллӑ делегаци пайташӗсене тата Раҫҫейре пурӑнма ирӗк илнисене (вӗсем Мускаври «Шереметьево» аэропортӑн F терминалне килсен) чармӗҫ. Мускаври ҫак аэропортӑн асӑннӑ терминалӗнче тухтӑрсем тӗрӗслеҫҫӗ, ҫынсене карантинта тытмалли май пур.

Нарӑс уйӑхӗн 28-мӗшӗнче Тӗмен хулинче «Пӗчӗк хуласене тата историлле тӑрӑхсене аталантарасси» ятпа форум иртнӗ. Унта пӗчӗк хуласене хӑтлӑх кӗртессипе лайӑх проект хатӗрлесе Пӗтӗм Раҫҫейри конкурсра ҫӗнтернисене палӑртнӑ. Ҫавӑнта Чӑваш Енри икӗ хула лекнӗ. Вӗсем - Канаш тата Улатӑр. Канаш «пӗчӗк хуласем» номинацире (кунта 20 пинтен пуҫласа 50 пин ҫын таран пурӑнаканнисем кӗреҫҫӗ) мала тухнӑ. Улатӑр «Истори тӑрӑхӗсем» категорире палӑрнӑ. Канаш хулине 70 миллион тенкӗ парӗҫ, Улатӑра — 44,5 миллион.

Ҫӗршыври комисси кӑҫал 80 проекта суйласа илнӗ. Ҫӗнтерӳҫӗсене 30 пинрен пуҫласа 100 пин тенкӗ таран парӗҫ.

Улатӑр «Улатӑр – музей-хула» проект хатӗрленӗ. Унта килӗшӳллӗн «Пӗчӗк пӗве», «ВЛКСМа 30 ҫул» парксене, «Боронин тата Ветвинский» скверӗсене илемлетесшӗн. Ҫав вырӑнсенче хула ҫыннисем уҫӑлса ҫӳреме кӑмӑллаҫҫӗ.

Канаш хули «Вуникӗ ҫул проектпа килӗшӳллӗн хулан тӗп пайне илемлетесшӗн.

Фейсбукра Павел Дуровӑн хӑйне евӗр реклами анлӑ сарӑлнӑ. Долларлӑ миллиардер хӑйӗн ҫӗнӗ платформипе усӑ курма сӗнекен рекламӑра Павел Дуров чухӑн ҫемьере ҫуралнине, амӑшӗ учитель, ашшӗ врач пулса ӗҫленине ӗнентернӗ. Унта килӗшӳллӗ пӗр ҫемье сӑнӳкерчӗкне вырнаҫтарнӑ.

Павел Дуровӑн рекламинче (ӑна кам хатӗрленине калаймӑпӑр) Чӑваш Енри паллӑ журналист Михаил Вансяцкий хӑйӗн ҫемйин сӑнӳкерчӗкне асӑрханӑ. Ашшӗпе амӑшӗ тата хӗрӗпе ывӑлӗ сӑнланнӑскере Вансяцкийсем 1989 ҫулта Красноармейскинче ӳкерӗннӗ иккен.

«Контактра» халӑх ушкӑнне тата ҫавӑн ятлӑ компание, Телеграм канала тата ытти проекта пуҫарса янӑ программист, Википеди пӗлтернӗ тӑрӑх, 1984 ҫулта Питӗрте ҫуралнӑ.

https://www.facebook.com/103095294540937/videos/535716750385255/

Ленинград облаҫӗнче ҫӑмӑллӑхҫӑсен ҫӗнӗ категорийӗ пулӗ. Вӗсем — вӑрҫӑ ачисем. Ку йыша Тӑван ҫӗршывӑн аслӑ вӑрҫи вӑхӑтӗнче ача пулнисем лекӗҫ.

Саккун проектне регионти парламент нарӑс уйӑхӗн 26-мӗшӗнче иккӗмӗш вулавра йышӑннӑ.

«Вӑрҫӑ ачисем» категорие 1927 ҫулхи авӑн уйӑхӗн 3-мӗшӗнчен пуҫласа 1945 ҫулхи авӑн уйӑхӗн 2-мӗшӗччен ҫуралнисем кӗрӗҫ. Ҫав вӑхӑтрах пӗр саманта та шута илмелле: «вӑрҫӑ ачисен» йышне Ленинград облаҫӗнче пилӗк ҫултан кая мар пурӑннисене ҫеҫ илӗҫ. Ун пеккисем паян — 4656-ӑн иккен.

Вӑрҫӑ ачисене социаллӑ пулӑшупа тӳлевсӗр тивӗҫтерӗҫ, тухтӑрсен вӗсем патне киле пырса тӗрӗслеме тивӗ.

Халӗ облаҫри вӑрҫӑ ачисене пенси ҫумне уйӑхсерен 624-шар тенкӗ хушса тӳленипех ҫырлахнӑ.

Паянхи планерка. Cap.ru cӑнӳкерчӗкӗ

Тӑван ҫӗршывӑн аслӑ вӑрҫинче ҫӗнтернӗренпе кӑҫал 75 ҫӳл ҫитет. Ҫавна май вӑрҫӑ ветеранӗсене федераци бюджечӗ шучӗпе 75-шер пин тенкӗ парӗҫ. Кунсӑр пуҫне республика хыснинчен те укҫа уйӑрма шухӑшлаҫҫӗ. Ҫакӑн пирки Чӑваш Республикин Правительствинче паян ирпе ирттернӗ канашлура сӑмах хускатнӑ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев вӑрҫа хутшӑннисене 25-шер пин тенкӗ хушма укҫа уйӑрассине ырланӑ. Ун валли хыснара укҫа тупма май пур иккен. Ҫапла вара Чӑваш Енри вӑрҫӑ ветеранӗсем 100-шер пин тенкӗ илӗҫ.

Олег Николаев Чӑваш Республикин ӗҫ тата социаллӑ хӳтлӗхӗн министрӗн тивӗҫӗсене пурнӑҫлакан Алена Елизаровӑна тивӗҫлӗ саккун проектне вӑраха хӑвармасӑр хатӗрлеме хушнӑ.

Анна Головинан Инстаграмри сӑнӳкерчӗкӗ

Паян Мурманск облаҫӗн кӗпӗрнаттӑрӗ Андрей Чибис вӗренӳпе ӑслӑлӑх министрӗн тивӗҫӗсене пурнӑҫлама Анна Головинана шаннӑ. «Ҫыхӑнура» портал ҫак хыпара пӗлтернӗ май Шупашкарта ҫуралса ӳснине аса илнӗ.

Анна Германовна Головина 2009 ҫулта И.Н. Ульянов ячӗллӗ Чӑваш патшалӑх университетне вӗренсе пӗтернӗ. Унта вӑл «Физика» тата «Преподаватель» специальноҫӗсене алла илнӗ. «Финанс тата кредит» енӗпе те вӑл вӗреннӗ. «Пӗтӗмӗшле педагогика, педагогика тата вӗренӳ историйӗ» енӗпе аспирантурӑра ӑс пухнӑ. 2015 ҫулта вӑл педагогика наукисен кандидачӗ ята тивӗҫнӗ. Сӑмах май, 2014 ҫулта «Ҫулталӑк аспиранчӗ» республикӑри конкурсра «Педагогика ӑслӑлӑхӗсем» номинацире ҫӗнтернӗ.

Анна Головина Чӑваш Ен Вӗренӳ тата ҫамрӑксен политикин министерствинче тӗрлӗ должноҫра вунӑ ҫул ӗҫленӗ. Мурманска кайиччен Чӑваш патшалӑх университетӗнче проект ӗҫ-хӗлӗн управленийӗн пуҫлӑхӗ пулнӑ. Хӑй вӑл Хабаровскра ҫуралнӑ.

https://www.les-clips.com сӑнӳкерчӗкӗ

Журналиста тапӑннӑшӑн пуҫиле ӗҫ пуҫарнӑ. Пӑтӑрмах Ханты-Манси автономи округӗнче пулса иртнӗ. Унти бизнес-центрта Нижневартовскри «Мегаполис» каналӑн телеоператорӗ туризм фирмин вывескине ӳкерес тенӗ. Ҫавна асӑрхасан офисран турфирмӑн пуҫлӑхӗ чупса тухнӑ. Илья ятлӑ оператор тата унпа пӗрле ӗҫлекенсем каланӑ тӑрӑх, хайхискер камерӑна туртса илме пуҫланӑ. «Пӑвас патнех ҫитрӗ», — тенӗ ҫамрӑк ҫын мӑйӗнчи хӗрлӗ вырӑнсене кӑтартса. Усламҫӑ камерӑри флешкӑна туртса кӑларнӑ.

Пӑтӑрмах вырӑнне ҫийӗнчех полицейскисене чӗнсе илнӗ.

Турфирмӑн пуҫлӑхӗ тӗлӗшпе йӗрке хуралҫисем пуҫиле ӗҫ пуҫарнӑ. Ӑна журналиста ӗҫлеме кансӗрленӗшӗн явап тыттарма пултараҫҫӗ.

Ӑнланмалла мар ӗҫ-пуҫ ҫинчен кӗпӗрнаттӑра пӗлтернӗ.

Экпозицире вырнаҫтарнӑ йӗрӗх. Википедирен илнӗ сӑн

Кӗтернепурта (Екатеринбургра) Шӗкӗр йӗрӗхне тупнӑранпа 130 ҫул ҫитнине паллӑ тӑвӗҫ. Ҫакӑн пирки паллӑ объект упранакан вырӑнта, Свердловск облаҫӗн таврапӗлӳ музейӗнче пӗлтернӗ.

Уява палӑртнӑ май музей ӗҫченӗсем «Шӗкӗр пуянлӑхӗ» экспозицинче тӳлевсӗр экскурсисемпе ирттерме шутлаҫҫӗ, сӑмах май унта йӗрӗхсӗр пуҫне ытти археологи япалисем те вырнаҫнӑ. Экскурсисем 2020 ҫулхи нарӑсӑн 5-мӗшпе 8-мӗшсенче иртӗҫ.

Ҫак паллӑ йӗрӗхе Шӗкӗр торфлӑ шурлӑхӗнче 1890 ҫулта тупнӑ. 2014 ҫулта тӗнче шайӗнчи тӗпчевсем йӗрӗхӗн ӳсӗмне — вӑл 11 пин ҫулта пулнине — ҫирӗплетсе панӑ. Йӗрӗхе пирӗн эрӑчченхи IX пинҫуллӑхра, мезолит тапхӑрӗнче, лиҫван йывҫҫинчен тунӑ. Ӑна антропоморф кӗлеткине евӗрлесе хатӗрленӗ, вӑл темиҫе пайран тӑрать. Йӗрӗх кӳлепин кашни енне те геометри эрешӗсемпе илемлетнӗ. Эрешленисӗр пуҫне сарлака лаптӑксенче сӑнсем касса кӑларнӑ.

Шӗкӗр йӗрӗхӗ чи авалхи йывӑҫ скульптури шутланать.