Маргарита Мельникова сӑнӳкерчӗкӗ

Юпа уйӑхӗн 6-мӗшӗнче Ҫӗрпӳре кӗмӗл волонтёрсен «Кӗмӗл Чун» республикӑри иккӗмӗш форумӗ иртнӗ.

Унта «2023 ҫулхи чи лайӑх кӗмӗл волонтёр» конкурс ҫӗнтерӳҫисене чысланӑ. Маттуррисене 4 номинаципе палӑртнӑ.

«Эко-волонтер» номинацире Красноармейски муниципаллӑ округӗнчи Валерий Геннадьевичпа Светлана Матвеевна Мефодьевсене чысланӑ, «Социаллӑ экспресс» номинацире — Ҫӗмӗрле муниципаллӑ округӗнчи Галина Милинӑна; «Ҫӗнтерӳ волонтёрӗ» номинацире — Ҫӗрпӳ муниципаллӑ округӗнчи Валентина Михайловӑна; «Волонтёр-наставник» номинацире — Шӑмӑршӑ муниципаллӑ округӗнчи Константин Емельянова.

culture.cap.ru сӑнӳкерчӗкӗ

Пӗтӗм тӗнчери педагог-художниксен союзне йӗркеленӗренпе 10 ҫу ҫитнине халаласа Чӑваш Енӗн Наци вулавӑшӗнче педагог-художниксен форумӗ иртнӗ. Ӑна маларах асӑннӑ союзӑн республикӑри пӗрлешӗвӗ тата Шупашкарти ӳнер училищи (техникумӗ) йӗркеленӗ.

Мероприятие тӗрлӗ шайри 60 ытла педагог хушӑннӑ. Вӗсен йышӗнче — вӑтам шкулсенче ӗҫлекенсем, хушма пӗлӳ паракан учрежденисенче тӑрӑшакансем, вӑтам тата аслӑ пӗлӳ паракан заведенийӗсен преподавателӗсем.

Форума пуҫтарӑннисене Шупашкарти ӳнер училищин директорӗ Владимир Ануфриев тата Чӑваш Енӗн Наци вулавӑшӗн директорӗ Роза Лизакова саламланӑ.

culture.cap.ru сӑнӳкерчӗкӗ

Чӑваш Енӗн Наци вулавӑшӗнче юпа уйӑхӗн 3-мӗшӗнче «Театр – мой мир. Театр – манӑн тӗнче. Художник Станислав Кошкин» кӗнеке-альбома хӑтланӑ. Кӑларӑма Н. М. Кириллова пухса хатӗрленӗ. Ҫав кунах унта Станислав Кошкинӑн «Театр – мой мир» (чӑв. Театр — манӑн тӗнче) куравӗ уҫӑлнӑ.

Станислав Константинович — Чӑваш Республикин тава тивӗҫлӗ художникӗ, Раҫҫейри художниксен союзӗн пайташӗ. Авӑн уйӑхӗн 25-мӗшӗнче художник 75 ҫул тултарнӑ.

Станислав Кошкин Вӑрнар районӗнчи (халӗ — муниципаллӑ округ) Вӑрман Кипек ялӗнче ҫуралнӑ. Хальхи вӑхӑтра вӑл Питӗр хулинче пурӑнать. Шупашкарти ӳнер училищинче тата Ленинградри патшалӑхӑн театр, музыка тата кинематографи институтӗнчен вӗренсе тухнӑ. Ленинградри ҫамрӑксен театрӗнче художник-постановщикра тата ытти хулара ӗҫленӗ.

cheb-centr.soc.cap.ru/press-centr сӑнӳкерчӗкӗ

Шупашкар хулинче пурӑнакан Любовь Куралева ӗмӗрне учительте ӗҫлесе ирттернӗ. Ачасене вӑл историе вӗрентнӗ. Раҫҫей Федерацийӗн вӗрентӳ отличникӗ пулас мӑшӑрӗпе 18 ҫулта чухне паллашнӑ. Куралевсем 60 ҫул ӗнтӗ пӗрне-пӗри юратса та хисеплесе пурӑнаҫҫӗ.

Виталий Владимирович шкул директорӗ пулнӑ, ачасене вырӑс литературине вӗрентнӗ. Пулас мӑшӑрне вӑл Есенинпа Блок сӑввисемпе тыткӑнланӑ. Куралевсен килӗнче поэзи паян та янӑрать. Анчах вӑл халӗ унчченхинчен те тарӑнрах пӗлтерӗшлӗ.

Кил хуҫи хӗрарӑмне, Любовь Андреевнӑна, паян Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Ольга Нарушевич пулӑшса тӑрать.

cap.ru сайтри сӑн

Юпа уйӑхӗн 4-мӗшӗнче Сӗнтӗрвӑрри лесничествинче участок ҫунма пуҫлани пирки пӗлтернӗ. Ҫӑлавҫӑсем вырӑна ҫийӗнчех ҫитнӗ. Пушара 12 ҫын, пӗр автоцистерна тата пӗр вӑрман патрулӗн комплексӗ сӳнтернӗ.

Пушар 0,4 гектар лаптӑк ҫинче алхаснӑ. Юрать-ха, вӑрман фондне тӑкак кӳмен. Ҫулӑма 3 сехетрен сӳнтернӗ. Халӗ вӑл мӗнрен тухнине тӗпчеҫҫӗ.

ЧР Ҫутҫанталӑк министерстви вӑрманта пушар тухнине асӑрхасан ҫак номерпе шӑнкӑравлама ыйтать: 8 /800/100-94-00 е 8 /8352/ 402-400.

cap.ru сайтри сӑн

Улатӑрта пурӑнакан Татьяна Сидищевӑна «Амӑшӗ Героиня» ята панӑ. РФ Президенчӗ Владимир Путин хушӑва юпа уйӑхӗн 3-мӗшӗнче алӑ пуснӑ.

Татьянӑпа Василий 13 ачана воспитани параҫҫӗ: 7 ывӑл та 6 хӗр. Нумай ача амӑшӗ хушупа килӗшӳллӗн ордена тата 1 миллион тенке тивӗҫӗ.

Ҫавӑн пекех Дмитрий тата Наталья Тихоновсене – «Амӑшӗн мухтавӗ» орденпа /500 пин тенкӗ параҫҫӗ/, Алексейпа Алина Матросовсене «Амӑшӗн мухтавӗ» орден медалӗпе /200 пин тенкӗ параҫҫӗ/ чыслама йышӑннӑ.

Сӑмах май, Чӑваш Енре «Амӑшӗ Героиня» ята чи малтан Ҫӗмӗрлери 11 ача амӑшӗ Мария Кудрявцева тивӗҫнӗ.

t.me/mintrud_21 сӑнӳкерчӗкӗ

Шупашкарта пӗчӗк ача япалисене проката илме пулать. Вӗсемпе Шупашкар хулинчи ҫул ҫитменнисен социаллӑ реабилитаци центрӗ тивӗҫтерет.

Япаласемпе вӑхӑтлӑх усӑ курас тесен паспорт тата ача ҫурални ҫинчен калакан свидетельство кирлӗ. Вӑхӑт иртсен япалана центрӑн прокат пунктне кайса памалла.

Ача япалисемпе вӑхӑтлӑх усӑ курас тесен Шупашкар хулинчи ҫул ҫитменнисен социаллӑ реабилитаци центрӗпе ҫыхӑнмалла. Вӑл Гузовский урамӗнчи 26-мӗш ҫуртра вырнаҫнӑ. Ыйтса пӗлмелли телефон номерӗ 23-41-57.

t.me/mintrud_21 сӑнӳкерчӗкӗ

Ыран, юпа уйӑхӗн 6-мӗшӗнче, Ҫӗрпӳре «кӗмӗл» волонтёрсен форумӗ иртӗ. «Кӗмӗл Чун» ят панӑ мероприятие Чӑваш Енре кӑҫалхипе иккӗмӗш хут йӗркелеҫҫӗ. Республикӑри хастар ватӑсем пӗлтӗр Шупашкарта пухӑннӑччӗ, кӑҫал Ҫӗрпӳре пуҫтарӑнӗҫ.

Ӳркенмен ватӑсем ыттисене темле те пулӑшма май тупаҫҫӗ: нумай ачаллӑ ҫемьесене тата ачисене пӗччен ӳстерекен хӗрарӑмсене ача пӑхса пулӑшаҫҫӗ, салтаксем валли тӗрлӗ япала ӑсталаҫҫӗ. Тӑвайӗнчи ватӑсем, сӑмахран, кӑҫал тӗрлӗ сиплӗ курӑк пухса типӗтнӗ те ӑна салтаксем патне ӑсатнӑ.

Ыранхи форумра тӗнче тетелӗнче ултавҫӑсенчен сыхланасси, ватӑсене хӑйсен ӗҫне пуҫарма пулӑшасси тата гериатри науки ҫинчен сӑмах хускатӗҫ.

ЧР Элтеперӗ Олег Николаев Вырӑс географи обществин Чӑваш Енри уйрӑмӗн попечительлӗх канашне ертсе пыма тытӑннӑ. Ку уншӑн пысӑк чыс пулнине вӑл Телеграм-каналӗнче пӗлтернӗ.

Элтепер каланӑ тӑрӑх, попечительӗх канашне йӗркелени обществӑн ӗҫне ҫӗнӗ варкӑш кӗртӗ, тата нумайрах хастар ҫынсене пӗр тӗвве пухма май парӗ. Чӑваш Енри уйрӑм, сӑмах май, Атӑлҫи тӑрӑхӗнче чи лайӑххисен йышӗнче, 5-мӗш вырӑнта. Раҫҫейре вара – 21-мӗш вырӑнта.

Чӑваш Енри уйрӑма 2006 ҫулта И.Я.Яковлев ячӗллӗ ЧПУ ҫумӗнче йӗркеленӗ. Филиалӗсем Сӗнтӗрвӑрринче тата Тӑвайра пур. Кӑҫал тата Ҫӗмӗрлере уҫӑлмалла.

novokuznetsk.su сайтри сӑн

Елчӗк районӗнчи тӳре-шара сусӑра найм мелӗпе тара илсе пурӑннӑ пӳлӗмӗнчен кӑларса янӑ. Лешӗ сӑлтавсене пула унта нумай вӑхӑт пурӑнман, хӑйне кӑларса янине те пӗлмен. Киле таврӑннӑ та – унта урӑх ҫын.

Ҫак ӗҫе вырӑнти администраци тунӑ. Кӑларса ярасси пирки сусӑра пӗлтермен, найм килӗшӗвне те пӑрахӑҫламан. Пӳлӗмри планировкӑна урӑхлатнӑ: юнашаррипе пӗрлештернӗ те тепӗр сусӑра пурӑнма вырнаҫтарнӑ.

Прокуратура Елчӗк районӗн администрацийӗн пуҫлӑхӗ тӗлӗшпе представлени ҫырнӑ, сусӑра урӑх хӑтлӑ пӳлӗм уйӑрса пама ыйтнӑ. Суд ҫакна тивӗҫтернӗ.