Ҫӗнӗ ҫул ҫывхарать. 2021 ҫул – Вӑкӑр ҫулталӑкӗ. Йӑлана кӗнӗ тӑрӑх, Шупашкарти Ленин урамӗнчи Тӗп почта умӗнче ҫулталӑк паллине вырнаҫтараҫҫӗ. Пӗлтӗр Йӗкехӳрене лартнӑччӗ. Кӑҫал Вӑкӑр пулӗ.

Плчта умӗнче мӗнле Вӑкӑр пулассине сасӑлав ирттерсе палӑртнӑ. Вӑл «Уҫӑ хула» порталта иртнӗ.

Сасӑлава 1675 ҫын хутшӑннӑ. Вӗсем пилӗк макетран пӗрине суйланӑ. Чи нумай сасӑ пухаканни – 3-мӗш эскиз. Уншӑн 525 ҫын сасӑланӑ (31,34 процент). Эппин, кӗҫех, Ҫӗнӗ ҫулччен, ҫак эскизра ӳкернӗ Вӑкӑра вырнаҫтарӗҫ.

ҪҪХПИ тунӑ сӑн

Ӗнер 21 сехет те 40 минутра Шупашкарти Радонежский тата Калинин урамӗсем хӗресленнӗ вырӑнта ҪҪХПИ ӗҫченӗсем ҫул-йӗр правилисен пӑснӑ водителе тытса чарнӑ. Вӑл «Ауди» машинӑпа пулнӑ.

Тӗнче тетелӗнче ку хыпара вулакансем ҫав ҫын чӑваш эстрада юрӑҫи, шомен Данила Ленский тесе палласа илнӗ. Тытса чарнӑ ӳсер водитель чӑнах та республикӑра паллӑ ҫын пулни пирки темӗн пакӑлтатнӑ имӗш.

Ӗҫ-пуҫ ҫапла пула иртнӗ: «Ауди» хирӗҫ ҫул ҫине тухса бордюр патӗнче ҪҪХПИ инспекторӗсен машини патӗнче чарӑннӑ. Ҫеккунт та иртмен – машина тапранса кайнӑ. Инспекторсем – ун хыҫҫӑн.

Тытса чарнӑ водитель ӳсӗр пек курӑннӑ. Машинӑн номерӗ темшӗн салонра пулнӑ, водитель ӑна документсемпе пӗрле кӑтартнӑ. Инспекторсем ун тӗлӗшпе икӗ протокол ҫырнӑ: руль умне ӳсӗр ларнӑшӑн тата патшалӑх номерӗсӗр ҫӳренӗшӗн.

Ҫӗнӗ ҫул ҫывхарнине туятӑр-и? Ҫук-и? Апла Шупашкарти Республика тӳремне ҫитсе курӑр. Унта Ҫӗнӗ ҫул чӑрӑшне лартма тытӑннӑ.

Шупашкар хула администрацийӗ пӗлтернӗ тӑрӑх, чӑрӑш раштав уйӑхӗн 1-мӗшӗнче тӗрлӗ тӗслӗ тӗспе ҫуталса кайӗ. Вӑл пилӗк ҫул каялла туяннӑскер. 25 метр ҫӳллӗшскер тӑхӑр ярусран тӑрать, турачӗсем – 3 пин ытла. Чӑрӑш пӗтӗмпе ултӑ тонна таять.

Шупашкарти тӗп чӑрӑша иртнӗ эрне вӗҫӗнчех лартма пуҫланӑ.

Чӳк уйӑхӗн 9-мӗшӗнче Шупашкарта Ярославль урамӗнче тин ҫуралнӑ ача виллине тупни пирки унччен хыпарланӑччӗ. Кун тӗлӗшпе пуҫиле ӗҫ пуҫарнӑ, ҫак тискер ӗҫе тунӑ ҫынна ҫийӗнчех шырама пуҫланӑ.

Хальлӗхе йӗрке хуралҫисем тин ҫуратнӑ ачине вӗлернӗ хӗрарӑма тупайман-ха, ӑна шыраҫҫӗ. Следстви органӗсем ку ӗҫре пулӑшма ыйтаҫҫӗ. Ача кӗтнӗ, пепкене ҫуратсан унран хӑтӑлма пултарнӑ хӗрарӑма пӗлетӗр-и? Кун пирки йӗрке хуралне пӗлтерме ыйтаҫҫӗ. Анонимлӑ пулӗ ку, сирӗн ят-шывӑра никама та каламӗҫ.

Аса илтерер: следстви версийӗ тӑрӑх, амӑшӗ тин ҫуралнӑ ачине наушникпе пӑвса вӗлернӗ, унтан полиэтилен хутаҫпа чӗркенӗ те йывӑҫлӑ вырӑнта пӑрахса хӑварнӑ.

Мускаври виҫӗ троллейбуса Шупашкара илсе килӗҫ. Кун пирки Шупашкарти троллейбус управленийӗн директорӗ Андрей Васильев Инстаграмри страницинче пӗлтернӗ.

Паян троллейбуссене платформа ҫине тиенӗ, пирӗн республикӑна илсе килме хатӗрленӗ. Вӗсене илсе килмешкӗн 1,52 миллион тенкӗ тӑкаклама палӑртнӑ. Анчах хака 539,5 пин тенкӗ таран чакарма май килнӗ.

Мускавран илсе килекен троллейбуссем автономлӑ мелпе ӗҫлеҫҫӗ.

Шупашкар хулинче троллейбус маршручӗсене ҫӗнӗрен пӑхса тухас шухӑшлӑ. Анчах ҫав утӑма хула ҫыннисене шухӑшне тӗпе хурса тӑвӗҫ. Ҫакӑн пек ӗнентернӗ хула администрацийӗн пуҫлӑхӗ Алексей Ладыков Инстаграмра.

Сӗнӳсенчен пӗри — хулари 5-мӗш тата 11-мӗш номерлӗ троллейбус маршручӗсене пӗрлештересси. Унӑн тӑршшӗне тӑсма пулать.

14-мӗш троллейбуса Хӗвеллӗ микрорайона ҫитерме сӗннӗ. Асӑннӑ микрорайонта троллейбус линийӗ ҫук, анчах ҫутӑ пӑралукӗсӗр ҫӳреме пултаракан троллейбуссене ҫула кӑларма пулать.

20-мӗш троллейбуса Чапаев савучӗ патне ҫитересшӗн, Ҫӗнӗ хулара ӑна сехет йӗппине хирӗҫ ҫӳретесшӗн.

6-мӗш тата 8-мӗш маршуртсене пӗрлештерме юрать тесе шухӑшлаҫҫӗ.

3-мӗш троллейбуса Мичман Павлов урамӗпе ҫӳретмесен те тесе сӗннӗ.

⠀

zelenograd24.ru сайтри сӑн

Чӑваш Енре пурӑнакан арҫын кӑшӑлвирус пуррипе ҫуккине тӗрӗслемешкӗн тест паманшӑн штраф тӳлӗ. Вӑл Турцирен канса килнӗ хыҫҫӑн йӗркене пӑснӑ: ют ҫӗршыва вӗҫиччен Патшалӑх пулӑшӑвӗсен порталӗнче анкета ҫырман.

Раҫҫее ют ҫӗршывран килсен виҫӗ кунра ПЦР мелӗпе тест памалла: кӑшӑлвирус пур-и е ҫук-и? Анчах ҫак арҫын ку йӗркене пӑснӑ, тест туман.

Куншӑн Шурашкарти Мускав районӗн сучӗ арҫынна 15 пин тенкӗ штраф тӳлеттерме йышӑннӑ. Вӑл ҫӗршыври санитари-эпидемиологи саккунне пӑснӑшӑн явап тытнӑ.

gcheb.cap.ru сӑнӳкерчӗкӗ

Ҫӗнӗ ҫул хыҫҫӑн Шупашкарти общество транспортӗнче хаксене ӳстерме пултараҫҫӗ. Ку ыйтӑва паян хула администрацийӗнче иртнӗ канашлура сӳтсе явнӑ.

Хаксене юлашки хут пӗлтӗрхи авӑн уйӑхн 1-мӗшӗнче хӑпартнӑ. Аллӑн тӳлемесен троллейбусри хак халӗ 20 тенкӗ тӑрать, автобусри — 21 тенкӗ. Аллӑн укҫа кӑларса тыттарсан хак 22 тата 25 тенке ларать.

Троллейбуссем те, автобуссем те тӑкак тӳсеҫҫӗ-мӗн. Шупашкарти троллейбус управленийӗн пуҫлӑхӗ Андрей Васильев троллейбус хакне 20 тенкӗрен 22 тенке (аллӑн укҫа тӳлемесен) тата 22 тенкӗрен 26 тенке (аллӑн укҫа тыттарсан) ҫитерме сӗннӗ.

Шупашкар хулинче Ҫӗнӗ ҫула хатӗрленме тытӑннӑ. Тӳрех аса илтерер: хулари кафе-ресторансенче корпоративсемпе уявсем ирттерме чарчӗҫ. Ку ыйтӑва кӑшӑлвирус сарӑлнипе кӗрешекен оперштабӑн ларӑвӗнче пӑхса тухнӑччӗ. Апла пулин те Ҫӗнӗ ҫул ҫывхарать, хулана пӗрех илемлетӗҫ.

Хула администрацийӗн пуҫлӑхӗ Алексей Ладыков Фейсбукри хӑйӗн страницинче ӗнер пӗлтернӗ тӑрӑх, Шупашкара капӑрлатма тытӑннӑ. Хулара чӗрӗ тата искусствӑлла елкӑсене вырнаҫтарма тытӑннӑ. Вӗсенчен пӗри, чӗрӗ елка, чукун ҫул вокзалӗ умӗнче пулӗ. Унӑн ҫӳллӗшӗ – 15 метр.

Уява хатӗрленсе хулари парксемпе микрорайонсене те хитрелетӗҫ.

cap.ru сӑнӳкерчӗкӗ

«Дорэкс» акционерсен обществи кунсерен Шупашкарти ҫӗр айӗн каҫмалли вырӑнсене дезинфекци тӑвать. Ҫакна, паллах, кӑшӑлвируса сарӑлма парас мар тесе пурнӑҫлаҫҫӗ.

Шупашкар хула администрацийӗн пресс-служби пӗлтернӗ тӑрӑх, хулари ҫӗр айӗн каҫмалли вырӑнсене ятарлӑ хутӑшпа кашни кунах дезинфекци тӑваҫҫӗ. Ку ӗҫе тӑватӑ бригада тӑвать. Кашни бригадӑра – икшер ҫын.

Рабочисен ӗҫ кунӗ ирхи 6 сехетре пуҫланать. Вӗсем ҫул урлӑ каҫмалли вырӑнсене натри гидрохлоричӗн 1 процентлӑ растворӗпе дезинфекци тӑваҫҫӗ.