«Магнит» гипермаркет. Google.Map-ран илнӗ сӑн

Строительсен урамӗ, 21 адреспа вырнаҫнӑ «Магнит» пысӑк гипермаркетра QR-код тӗрӗслене чухне вӑхӑтӗнче пӑтӑрмах пулса иртнӗ. «Про город» кӑларӑм ҫырнӑ тӑрӑх, 10:30 тӗлнелле, 60 ҫулти арҫынна япӑх пулса кайнӑ. Вӑл медиксем киличчен вилнӗ. Хыпарта пӗлтернӗ тӑрӑх арҫын QR-код кӑтартнӑ, хӑйне япӑх пулнине вӑл лавккана кӗрсен туйнӑ.

Пӑтӑрмах пулса иртнӗ хыҫҫӑн вырӑна медиксем, ҫавӑн пекех полици ӗҫченӗсемпе следовательсем пырса ҫитнӗ. Кӗмелли алӑка карталаса хуплама тивнӗ, ҫавна пула туянакансене тепӗр алӑкран кӗртме тытӑннӑ.

Чӑваш Енри СКР следстви управленийӗ асӑннӑ пӑтӑрмах тӗлӗшпе тӗрӗслев ирттерни пирки, мӗнпур фактсене палӑртас енӗпе ӗҫлени ҫинчен пӗлтернӗ.

Паян каҫхине Шупашкарти Ленин Комсомолӗн урамӗнчи 23-мӗш ҫуртӑн 1-мӗн корпусӗнче 15-мӗш хутри хваттерте газ баллонӗ сирпӗннӗ. Унашкал баллонсене потративлӑ плиткӑсем валли усӑ кураҫҫӗ.

Хваттерти балкон ҫинчи чӳрече тухса ӳкнӗ. Юрать-ха, ҫынсенчен никам та шар курман, халӗ хӑрушлӑх та ҫук.

Калинин районӗн прокурорӗ Евгений Ортиков вырӑна ҫитнӗ. Газ баллонӗ мӗншӗн сирпӗннӗ? Ҫакна ҫӑлавҫасем уҫамлатӗҫ.

Александр Андреевӑн Фейсбукри страницинчен илнӗ сӑнӳкерчӗк

Шупашкартан Кӳкеҫе тата Кӳкеҫрен Шупашкара пассажирсене турттаракан 162-мӗш маршурта Софронов хушаматлӑ ҫынпа килӗшӳ тунӑ водительсем туттаратчӗҫ. Юлашки вӑхӑтра асӑннӑ маршрутпа ҫӳрекенсем йӗркеллех ӗҫлеме тытӑннӑччӗ-ха. Тепӗр тесен, пӗрмай тӗрӗслесе тӑни вӗсене ҫапла тума хистерӗ пулинех. Унччен вара маршрут водителӗсем йӗркеллӗ ҫӳременни пулкалатчӗ-ха.

Пассажирсене хӳтӗлесе Чӑваш Ен Патшалӑх Канашӗн депутачӗ Александр Андреев республикӑн Транспорт тата ҫул-йӗр хуҫалӑхӗн ӗҫченӗсемпе унчечн тӗл пулнӑччӗ-ха.

Асӑннӑ хастар халӗ Фейсбукра пӗлтернӗ тӑрӑх, Софронова пассажирсене турттарма пӑрахтарӗҫ. Ҫапла тума суд урлӑ йышӑннӑ.

stolica-s.su сӑнӳкерчӗкӗ

Мускав облаҫӗнче пурӑнакан арҫын Чӑваш Енри кинемее машинӑпа ҫапса хӑварнӑ. Вӑл ӑна вилмеллех амантнӑ. Инкек хыҫҫӑн водитель вырӑнтан тапса сикнӗ. Хӑйне тупаймаҫҫӗ тенӗ пулинех. Анчах вӑл хытах йӑнӑшнӑ.

45 ҫулти арҫын ватӑ хӗрарӑма 2020 ҫулхи авӑн уйӑхӗн 23-мӗшӗнче каҫхи 19 сехет тӗлӗнче ҫапса хӑварнӑ. Инкек «Никольски — Етӗрне — Нурӑс» ҫул ҫинче, Элӗк районӗнчи Крымсарайккӑ ялӗ тӗлӗнче пулса иртнӗ.

Ҫынна вилмеллех амантнӑ, ҫитменнине тата инкек вырӑнӗнчен тапса сикнӗ водителе суд 7 ҫул ҫурӑлӑха тӗрмене ӑсатма йышӑннӑ.

Ӗнер, кӑрлач уйӑхӗн 22-мӗшӗнче, 19 сехет ҫурӑра М-7 автоҫулӑн 601-мӗш ҫухрӑмӗнче авари пулнӑ. Шел те, унта ҫынсен пурнӑҫӗ татӑлнӑ. Кун пирки ҪҪХПИ пӗлтерет.

Авари Етӗрне районӗнчи Урпаш ялӗ ҫывӑхӗнче пулнӑ. Малтанлӑха пӗлтернӗ тӑрӑх, «Гранта» транспорт хирӗҫ килекен ҫул ҫине тухса кайнӑ та йывӑр тиевлӗ икӗ машинӑпа ҫапӑннӑ. Аварире виҫӗ ҫыннӑн пурнӑҫӗ татӑлнӑ: ҫӑмӑл машина водителӗ тата унти икӗ пассажир. Пӗри ача пулнӑ.

Следстви комитечӗ пӗлтернӗ тӑрӑх, Шупашкарта пӗр хваттерте 41 ҫулти арҫыннӑн виллине тупнӑ. Ӑна вӗлерме пултарнӑ ҫынна тытса чарнӑ.

Вӑл – Шупашкарта пурӑнакан 50 ҫулти арҫын. Следстви версийӗ тӑрӑх, кӑрлач уйӑхӗн 19-мӗшӗнче 23 сехет ҫурӑра пулнӑ ку. Ҫак 50 ҫулти арҫын, ӳсӗрскер, 41 ҫулти пӗлӗшӗн хваттерӗнче пулнӑ.

Вӗсем хирӗҫсе кайнӑ. Аслӑраххи кӗҫӗнреххине кӑкӑрӗ тӗлӗнчен икӗ хутчен ҫӗҫӗпе чикнӗ. Пӗлӗшӗ ҫавӑнтах вилнӗ.

Пуҫиле ӗҫе малалла тишкереҫҫӗ.

stihi.ru сӑнӳкерчӗкӗ

Красноармейски районӗнче пурӑнакан арҫын хӑйӗн ҫуралнӑ кунне Шупашкарта паллӑ тӑвас тенӗ. Тусӗпе пӗрле вӗсем хваттер тара илнӗ. Унта икӗ хӗрарӑма йыхравланӑ. Хайхисене вӗсен пӗлӗшӗсем сӗннӗ иккен.

Икӗ арҫынпа икӗ хӗрарӑм ҫуралнӑ куна аванах тунӑ. Ӗҫнӗ, ҫинӗ, савӑннӑ. Кайран арҫынсем тӳнсе кайнӑ.

Ирпе ыйхӑран вӑрансан арҫын хӑйӗн банк картти ҫинчи 7 пин тенкӗ укҫана темиҫе ӑстрӑмпа паллӑ мар ҫынна куҫарса панине асӑрханӑ. Арҫын йӗрке хуралҫисенчен пулӑшу ыйтнӑ. Вӑл вӗсене никама та хӑй аллипе укҫа куҫарса паманнине пӗлтернӗ.

Пакунлисем укҫа кам патне ҫитнине хӑвӑрт тупса палӑртнӑ. Ӑна арҫынсем патӗнче хӑнара пулнӑ хӗрарӑмсенчен пӗри, 33 ҫултискер, лешсем хуп турттарнӑ самантпа усӑ курса куҫарса панӑ иккен. Ҫын укҫине вӑрланӑшӑн халӗ ун тӗлӗшпе пуҫиле ӗҫ пуҫарнӑ.

Инкеклӗ лару-тӑру министерстви тунӑ сӑн

Паян ҫӗрле Патӑрьел районӗнчи Турхан ялӗнче лавкка ҫунса кайнӑ. Кун пирки Инкеклӗ лару-тӑру министерстви пӗлтерет.

Ҫур ҫӗр иртни 1 сехет ҫурӑра Турханта хутӑш тавар сутакан лавкка ҫунма тытӑннӑ. Пушарнӑйсем вырӑна ҫитсен ҫулӑма пӗр сехетрен сӳнтернӗ.

Ҫулӑм йывӑҫ пӳртӗн хушма ҫуртне, тӑррине тӗп тунӑ. Сӑмах май, Инкеклӗ лару-тӑру министерстви иртнӗ талӑкра Чӑваш Енре виҫӗ пушар пулнӑ.

Следстви комитечӗн сайтӗнчи сӑн

Кӑрлач уйӑхӗн 12-мӗшӗнче 12 сехетре нумай хваттерлӗ ҫурт тунӑ ҫӗрте, Шупашкарти Афанасьев урамӗнче, стропальщик 15-мӗш хутран ӳкнӗ. Вӑл ҫавӑнтах вилнӗ.

Ҫав вӑхӑтра ҫӳлти хутра кран ҫинчен строительство материалӗсене пушатнӑ. 42 ҫулти стропальщик ӑнсӑртран аялалла ӳкнӗ. Следстви комитечӗ пӗлтернӗ тӑрӑх, следовательсем тӗрӗслев пуҫарнӑ. Халӗ лару-тӑрӑва уҫӑмлатаҫҫӗ, судпа медицина экспертизи ирттереҫҫӗ.

Аса илтерер: нумаях пулмасть Шупашкарта 18 ҫулти хӗр ҫӳлти хутран ӳкни пирки пӗлтернӗччӗ.

chuvashia.sledcom.ru сӑнӳкерчӗкӗ

Куславкка хулинчи 31 ҫулти арҫын хӑйӗн ӗмӗрӗнчи 13 ҫула яхӑн тӗрмере ирттернӗ. Юлашки хутчен вӑл ирӗке 2021 ҫулхи раштав уйӑхӗнче тухнӑ. Анчах уҫӑ сывлӑшпа кӑкӑр тулли сывласа, ирӗклӗ тӗнчепе савӑнса та ҫунатланса пурӑнас вырӑнне вӑл каллех пӑтӑрмаха ҫакланнӑ.

Кӑрлач уйӑхӗн 9-мӗшӗнче вӑл хула урамӗнче 45 ҫулти арҫынпа паллашнӑ. Ӑна вӑл эрех туянма тата пӗрле ӗҫме ыйтнӑ. Лешӗ килӗшнӗ. Анчах шӑкӑл-шӑкӑл калаҫса ларман икӗ арҫын — харкашма тытӑннӑ. Ҫамрӑкки аслӑраххине темиҫе хутчен ҫапнӑ, унтан ӑна хваттер подъездне илсе тухнӑ, унта каллех хӗненӗ — тапса-ҫапса пӗтернӗ. Шар курни тепӗр кунне реанимацире вилсе кайнӑ.

Хӗнекене тытса чарнӑ. Ҫынна ятарласа вӗлермен пулин те ӑна никам та уншӑн саккун пуҫран шӑлас ҫук.