Шупашкарта пурӑнакан тивӗҫлӗ канури хӗрарӑм Пӗтӗм Раҫҫей шайӗнче иртнӗ интернет-турнирта ҫӗнтернӗ.
Ӑмӑртӑва онлайн-мелпе йӗркеленӗ. Унта ҫӗршывӑн 46 регионӗнчи 133 шахматҫӑ хутшӑннӑ. Чӑваш Енри ӑстасен команди виҫҫӗмӗш вырӑна тухнӑ. Хӗрарӑмсем хушшинче Валентина Давыдовӑна ҫитекен пулман.
Кашни регионтан виҫӗ ҫынран тӑракан пӗр команда хутшӑннӑ. Чӑваш Ен чысне Александр Петров, Павел Игумнов тата Валентина Давыдова хӳтӗленӗ. Вӑйӑ 4 сехете тӑсӑлнӑ. Команда бронза медале тивӗҫнӗ, Валентина Давыдова — пӗрремӗшне.
Иртне эрнере Якутск хулинче кикбоксинг енӗпе Раҫҫей чемпионачӗ иртнӗ. Тӗнче класлӑ спорт мастерӗ Полина Петухова унтан ҫӗнтерӳпе таврӑннӑ.
Ринга 380 яхӑн спортсмен тухнӑ. Вӗсем 40 ытла регионтан килсе ҫитнӗ. Полина ҫурмафиналта Питӗрти спортсменпа вӑй виҫнӗ. Финалта вара Тулӑри спортсменкӑпа тупӑшнӑ. Сергей Шабердин тренер патӗнче ӑсталӑхне туптакан Полина 52 килограмм тайман виҫе категорийӗнче мала тухнӑ. Ҫапла вӑл 2022 ҫулта АПШра иртекен Пӗтӗм тӗнчери ҫапӑҫу искусствин вӑййисене кайма путевка ҫӗнсе илнӗ.
Палӑртмалла: Полина Петухова Раҫҫей шайӗнчи ӑмӑртусенче тӑваттӑмӗш хут ҫӗнтернӗ.
Чӑваш Енри икӗ спортсмен Фристайл енӗпе тӗнче чемпионатне хутшӑнассине Чӑваш халӑх сайчӗ пӗлтернӗччӗ. Аса илтерер: вӗсем — олимп резервӗн 2-мӗш спорт шкулӗнчи фристайл уйрӑмӗн воспитанникӗсем Лана Прусакова тата Дмитрий Мулендеев.
Виза илес енӗпе йывӑрлӑх пулнӑран спортсменсем АПШна кая юлса тухса кайнӑ. Ҫавӑнпа вӗсем «слоуп-стайл» ӑмӑртӑвне хутшӑнайман.
Фристайлӑн «биг-эйр» дисциплининчи ӑмӑртура Раҫҫейри икӗ спорстмен малти икӗ вырӑна йышӑннӑ. Мускаври Анастасия Таталина ылтӑн медаль ҫӗнсе илнӗ, Лана Прусакова – кӗмӗл. Тӗнче чемпионатӗнче Раҫҫей спортсменӗсем «биг-эйр» дисциплинӑра малти вырӑна тухни пулман.
«Ҫӗнтернине халӗ те ӗненес килмест! Мана шаннӑшӑн тата ӗненнӗшӗн пурне те пысӑк тав! Йывӑр ӗҫ хакне кӑларчӗ! Эпӗ питех те телейлӗ! Хам пултарнине йӑлтах турӑм», – тесе ҫырнӑ ентешӗмӗр Инстаграмра.
Дмитрий Мулендеев тата Раҫҫейри тепӗр спортсмен Дмитрий Макаров ӑмӑртӑвӑн финалне лекеймен.
Ҫак кунсенче Чӑваш Енри икӗ спорстмен пысӑк ҫитӗнӳпе палӑрнӑ.
Вӗсенчен пӗри – Владислав Поляшов гимнаст. Раҫҫейӗн спорт гимнастики енӗпе иртекен чемпионатӗнче мӑшӑр кашта ҫинче хусканусем туса вӑл ылтӑн ылтӑн медале тивӗҫнӗ. Ӑмӑрту Пенза хулинче иртнӗ. Чӑваш Енри спортсмен маларах Федерацин Атӑлҫи округӗнчи тупӑшура нумай енлӗ ӑмӑтура кӗмӗл медале ҫӗнсе илнӗ.
Сергей Козырёв ирӗклӗ мелпе кӗрешсе Раҫҫей чемпионатӗнче ҫӗнтернӗ. Вӑл 125 килограмчченхи виҫере ӑмӑртнӑ. Спорт тупӑшӑвӗ Улан-Удэре иртнӗ. Сергей Козырёва Чӑваш Ен Элтеперӗ Олег Николаев саламланӑ.
Республикӑн Спорт министерствинче пӗлтернӗ тӑрӑх, ку вӑл – историлле ҫитӗнӳ. Спортӑн ку енӗпе пирӗн республика спортсменӗсем юлашки хут 1984 ҫулта ҫӗнтернӗ. Ун чухне Иван Григорьев палӑрнӑ.
Темиҫе минут каялла Чехире биатлон енӗпе Тӗнче кубокӗн черетлӗ тӑххӑрмӗш тапхӑрӗ вӗҫленчӗ. Хӗрарӑм-спортсменкӑсем спринтра 7,5 километра чупрӗҫ. Вӗсен пӗрре выртса, пӗрре тӑрса пеме тиврӗ.
Пирӗн ҫӗршыв командинче 6 спортсменка пулчӗ, ҫав шутра – Чӑваш Ен хӗрӗ, Тӗменшӗн ӑмӑртакан Татьяна Акимова та.
Тӳрех палӑртар: Раҫҫей командин членӗсем япӑх печӗҫ, начар чупрӗҫ. Ҫав вӑхӑтрах эпир ентешӗмӗрпе мӑнаҫланма пултаратпӑр. Вӑл 100 ытла спортсмен хушшинче 25-мӗш вырӑн йышӑнчӗ. Татьяна Акимова выртса пенӗ чух ҫеҫ пӗрре лектереймерӗ. Пирӗн ҫӗршыври ытти спортсменкӑн кӑтартӑвӗ ҫапларах:
Лариса Куклина — 42-мӗш, Светлана Миронова — 52-мӗш, Ульяна Кайшева — 58-мӗш, Евгения Павлова — 65-мӗш, Ирина Казакевич — 81-мӗш.
Чӑваш Енри икӗ спортсмен Фристайл енӗпе тӗнче чемпионатне хутшӑнӗ. Вӗсем – олимп резервӗн 2-мӗш спорт шкулӗнчи фристайл уйрӑмӗн воспитанникӗсем Лана Прусакова тата Дмитрий Мулендеев. Раҫҫей командине ҫавӑн пекех Анастасия Таталина (Мускав) тата Дмитрий Макаров (Красноярск тӑрӑхӗ) кӗнӗ.
Фристайлӑн «слоуп-стайл» тата «биг-эйр» дисциплинисенчи ӑмӑртӑвӗ Америкӑри Пӗрлешӳллӗ Штатсенче пуш уйӑхӗн 7-16-мӗшӗсенче иртӗ. «Слоуп-стайл» квалификацийӗ пуш уйӑхӗн 11-мӗшӗнче иртӗ, 13-мӗшӗнче финал пулӗ. «Биг-эйр» дисциплинипе квалификаци пуш уйӑхӗн 15-мӗшӗнче иртӗ, финал – 16-мӗшӗнче.
Виза илес енӗпе йывӑрлӑх пулнӑран спортсменсем АПШна ыран ҫеҫ тухса кайӗҫ. Ҫавӑнпа вӗсем «слоуп-стайл» ӑмӑртӑвне хутшӑнаймӗҫ.
Чӑваш ҫӗрӗн хальхи вӑхӑтри маттур хӗрӗ, халӗ Тӗмен облаҫӗшӗн ӑмӑртакан Татьяна Акимова биатлон енӗпе иртекен Тӗнче чемпионатне хутшӑнӗ. Спортсменсем нарӑс уйӑхӗн 10-21-мӗшӗсенче Словенири Поклюкӑра ӑмӑртӗҫ.
Раҫҫейӗн пӗрлештернӗ командине 6 хӗрарӑмпа 6 арҫын кӗнӗ: Светлана Миронова, Евгения Павлова, Ульяна Кайшева, Татьяна Акимова, Ирина Казакевич, Лариса Куклина, Александр Логинов, Матвей Елисеев, Эдуард Латыпов, Антон Бабиков, Евгений Гараничев, Карим Халили.
Италири Антхольцра биатлон енӗпе иртнӗ Тӗнче кубокӗн тапхӑрӗнче Раҫҫейӗн пӗрлештернӗ команди эстафетӑра пӗрремӗш вырӑна тухнине эпир пӗлтернӗччӗ. Аса илтерер: ылтӑн медале тивӗҫнӗ тӑватӑ биатлонисткӑран пӗри Чӑваш Енре ҫуралса ӳснӗ Татьяна Акимова пулнӑччӗ.
Кӑшӑлвирус сарӑлнине пӑхмасӑр кӑҫал «Раҫҫей йӗлтӗр йӗрне» ирттерӗҫ. Анчах унта 65 ҫултан аслӑраххисене хутшӑнтармӗҫ. Старта тухакансен медтӗрӗслев витӗр тухса справка илсе килмелле.
Ӑмӑрту кӑҫал та Олимп резервӗсен 2-мӗш спорт шкулӗн трасси ҫинче иртӗ. Старт нарӑсӑн 13-мӗшӗнче 12 сехетре пулӗ. Малтан «Шупашкар-Аренӑна» ҫитмелле. Унта мандатлӑ комисси ӗҫлӗ, документсен оригиналӗсене йышӑнӗҫ, ӳт температурине виҫӗҫ. Кун хыҫҫӑн ӑмарту вырӑнне автобуспа илсе ҫитерӗҫ.
Заявкӑна тата сканерланӑ справкӑна sdusshor2-21@mail.ru электронлӑ почтӑпа нарӑсӑн 12-мӗшӗччен ярса памалла.
Чӑваш Енри йывӑр атлетсем икӗ кӗмӗл медаль тата виҫӗ пӑхӑр медаль ҫӗнсе илнӗ. Вӗсем Белгород облаҫӗнчи Кивӗ Оскол хулинчи Раҫҫей Кубокӗнче пулнӑ.
Раҫҫей тӗнче класлӑ спорт мастерӗсем Александра Козлова, Наталия Шайманова, Ирина Баймулкина, Яна Мохина, Раҫҫей спорт мастерӗ Любовь Мышов, Полина Андреева, Анастасия Безлюдная, Александр Мышов, Юрий Тимофеев Чаваш Ен чысне хӳтӗленӗ.
Етӗрне районӗн хӗрӗ Ирина Баймулкина кӑрлачӑн 26-мӗшӗнче медальсен пухмачне пӗрремӗш пуянлатнӑ.
Италири Антхольцра биатлон енӗпе иртнӗ Тӗнче кубокӗн тапхӑрӗнче Раҫҫейӗн пӗрлештернӗ команди эстафетӑра паян пӗрремӗш вырӑна тухрӗ.
Ылтӑн медале тивӗҫнӗ тӑватӑ биатлонисткӑран пӗри — Чӑваш Енре ҫуралса ӳснӗ Татьяна Акимова. Спортсменка хальхи вӑхӑтра Тӗмен облаҫӗшӗн ӑмӑртать. Вӑл Европа шайӗнчи ӑмӑртура ҫитӗнӳ хыҫҫӑн ҫитӗнӳ турӗ. Ӑна тӗнче кубокӗн черетлӗ тапхӑрне кӗтмен ҫӗртен чӗнсе илнине тӗрлӗрен йышӑнакан пулчӗ. Анчах пултаруллӑ ентешӗмӗр хӑйне унталла та кунталла турткаланишӗн аптӑраса тӑмарӗ.
Палӑртар: эстафетӑра Раҫҫей командишӗн Евгения Павлова, Татьяна Акимова, Светлана Миронова тата Ульяна Кайшева ӑмӑртрӗҫ. Иккӗмӗш вырӑнта — нимӗҫсем, виҫҫӗмӗшӗнче — хрантсуссем.
+12.5 °C