Дача чӗртсе янӑ ҫамрӑка икӗ ҫуллӑха колони-поселение ӑсатӗҫ. Ҫакӑн пек йышӑннӑ суд. Приговор хальлӗхе саккунлӑ вӑя кӗреймен-ха.
Усал ӗҫе 26 ҫулти каччӑ кӑҫалхи ҫулла, утӑ уйӑхӗн 21-мӗшӗнче, тунӑ. Ҫав кунхине вӑл хӑй паллакан хӗр патне «Ивушка» пахча юлташлӑхне ҫул тытнӑ. Хӗр кӑмӑлӗ пирки пӗлместпӗр те, пикен амӑшӗ каччӑна кӑмӑлсӑр кӗтсе илнӗ. Вӑл ӑна хӑваласа ярас тенӗ. Каччӑ ҫавӑншӑн ҫурӑлса каясла тарӑхнӑ курӑнать. Хӗрӗн ҫемйине вӑл усал тӑвас шухӑш тытнӑ. Тавӑрас шухӑшпа дачӑри верандӑна тата мунчана чӗртсе янӑ. Ҫемье 112 пин ытла тенкӗлӗх тӑкак тӳснӗ.
Куславкка районӗнчи Тӗрлемес ялӗнчи 30 ҫулти арҫын хӑйӗнчен самай кӗҫӗн хӗрарӑмпа пурӑннӑ. Иккӗш тем пайлайман – пӗрмай хирӗҫнӗ. Сӑмахпа ҫеҫ мар. Арҫын хӑйӗнпе пурӑнакан 17 ҫулти хӗр ҫине алӑ ҫӗклеме юратнӑ. Пӗррехинче ҫамрӑк хӗрарӑм тӳсеймен – пакунлисене евитленӗ.
Тӗпчевҫӗсем палӑртнӑ тӑрӑх, 2021 ҫулхи утӑ уйӑхӗн 18-мӗшӗнчен тытӑнса ҫурла уйӑхӗн 12-мӗшӗччен арҫын хӗрарӑма пӗрре ҫеҫ мар хӗненӗ. Арҫын ҫавӑн чухне ӳсӗр пулнӑ.
Арҫынна ҫул ҫитмен ҫынна хӗненӗшӗн явап тыттарма пултарӗҫ. Ӑна халӗ тытса чарнӑ. Ун тӗлӗшпе РФ Пуҫиле кодексӗн 117-мӗш статйин 2-мӗш пайӗн «г» пункчӗпе килӗшӳллӗн ӗҫ пуҫарнӑ.
Телевизорпа кӑтартнӑ хыҫҫӑн тӗпчевҫӗсем тӗрӗслев пуҫарнӑ.
Аса илтерер: Пӗрремӗш каналпа кӑтартакан «Мужское / Женское» телекӑларӑмра ӗнер Чӑваш Енри ҫемьене кӑтартрӗҫ.
Йӗпреҫри Наталья Чикушинӑн 21 ҫулти ывӑлӗ Роман Камышан ӑнлантарнӑ тӑрӑх, вӗсем кукамӑшӗпе иккӗшӗ хӗрарӑма амӑшӗн прависӗр хӑварасшӑн. Хӗрарӑм ӗҫке ернӗ, унӑн кӗҫӗн хӗрӗ кукамӑшӗ патӗнче ӳсет.
Телекӑларӑм эфира тухнӑ хыҫҫӑн РФ Следстви комитечӗн Чӑваш Енри управленийӗн ӗҫченӗсем Йӗпреҫ район администрацийӗн ҫул ҫитменнисемпе ӗҫлекен комисси тата опекӑпа попечительство органӗ тӗлӗшпе тӗрӗслев пуҫарнӑ. Асӑннӑ органсенче тӑрӑшакансем хӑйсен тивӗҫне епле пурнӑҫланине хак парӗҫ. Ӗҫе тивӗҫлипе пурнӑҫламанни ҫиеле тухсан вырӑнти специалистсене РФ Пуҫиле кодексӗн 293-мӗш статйин 1-мӗш пайӗпе явап тыттарӗҫ.
Паян Шупашкарти хӗрарӑм Пӗрремӗш каналпа кӑтартакан «Модный приговор» кӑларӑма хутшӑнчӗ.
Галина Фёдорова – 44 ҫулта, тахҫанах Мускав облаҫне тухса кайнӑ. Унта вӑл суту-илӳ енӗпе тӑрӑшать. Ача чухне вӑл чирленӗ, утайман та. Анчах, хӑй калашле, хӑйне хӑй ура ҫине тӑратнӑ.
Хӗрарӑм 4 хутчен качча кайнӑ, анчах пурнӑҫӗ ӑнман. Арҫынӗсем ырӑ ҫынсемех лекмен, вӗсен хушшинче тӗрмере ларни те пулнӑ. Турра шӗкӗр, хӗрарамӑн икӗ ача пур, икӗ ывӑл. Юлашки 8 ҫулта хӗрарӑм авланнӑ арҫыннӑн савнийӗ пулса пурӑнать.
Телекӑларӑма хӗрарӑм тусӗ, Татьяна Ли, илсе пынӑ.
Галина спорт тумӗпе ҫӳреме юратать. Тусӗ унӑн стильне улӑштарасшӑн, кайран хӗрарӑмӑн пурнӑҫӗ те ылмашасса шанать.
«Питӗ хитре, питӗ кӑмӑллӑ. Мана килӗшет», – терӗ Галина кӑларӑм вӗҫӗнче чӑвашла Александр Васильев телеертӳҫӗ ӑна тӑван чӗлхепе калама ыйтсан.
Куславкка районӗнчи Шӑнчас ялӗнче кӑҫалхи ҫӗртме уйӑхӗн 22-мӗшнче ашшӗпе ывӑлӗ хушшинче пысӑк пӑтӑрмах сиксе тухнӑ. Харкашу вилӗмпе вӗҫленнӗ.
22 ҫулти каччӑ ашшӗне пуҫӗнчен, кӗлеткинчен 32 хутран кая мар тапса-ҫапса пӗтернӗ. Вӑйпитти хытах хӗненӗ хыҫҫӑн арҫын самай шар курнӑ. Йывӑр суранланнӑскер тепӗр кунхине вилсе кайнӑ.
Кайран каччӑна тытса чарнӑ, вӑхӑтлӑха хупса хунӑ. Вӑл хӑйӗн айӑпне йышӑннӑ. Тӗрлӗ экспертиза та каччӑ айӑплине ҫирӗплетсе панӑ.
РФ Следстви комитечӗн Чӑваш Енрен тӗпчевҫисем пуҫиле ӗҫе тӗпчесе пӗтернӗ, суда ярса панӑ.
Ҫурла уйӑхӗн 21-мӗшӗнче каҫхи 9-10 сехетре Йӗпреҫ районӗнчи Хирти Выҫли ялӗнче ҫурт ҫунма тытӑннӑ. Унта пурӑнакан ҫемье – арӑмӗпе упӑшки тата 12 ҫулти ывалӗ – урама ҫарранах чупса тухнӑ.
Вӗсем каҫхине тӗтӗм шӑршипе вӑраннӑ. Ҫав вӑхӑтра пӳртре ҫулӑм алхаснӑ ӗнтӗ. Ҫемье урама ҫара уранах чупса тухнӑ, нимӗн те илсе ӗлкӗреймен, докуменчӗсем те ҫунса кайнӑ.
Малтанлӑха палӑртнӑ тӑрӑх, пушар электропралук юсавсӑр пулнӑран тухнӑ. Ҫемье ҫуртсӑр юлнӑ, вӗсене пулӑшу кирлӗ. Ыйтса пӗлмелли телефон – 89279988242, Галина Андреевна Хамидулина.
Елчӗк районӗнче пурӑнакан нумай ачаллӑ Исаковсем патшалӑхран ҫурт тивӗҫӗс тесе 2014 ҫултанпа черетре тӑнӑ. Вӗсен ӗмӗчӗ тинех пурнӑҫланнӑ.
Нумаях пулмасть вӗсем икӗ хутлӑ ҫурт уҫҫине илнӗ, ҫӗнӗ пӳрт уявне паллӑ тунӑ. Ҫурт лаптӑкӗ 123,5 тӑваткал метрпа танлашать. Ӑна тумашкӑн 3 миллион та 261 пин тенкӗ уйӑрнӑ. Подрядчик ӗҫе кӗске вӑхӑтра хӑвӑрт туса пӗтернӗ.
Павелпа Тамара 7 ача ҫуратнӑ. Асли качча кайнӑ, хӑйӗн те ача пур. Тӑватӑ ывӑлӗ шкулта вӗренет. Кӑҫал хӗрӗ Ангелина парта хушшине ларма хатӑрленет. Семен килте амӑшӗпе-ха.
Унччен Исаковсем 40 тӑваткал метрлӑ ҫуртра пурӑннӑ. Туалет тулта пулнӑ. Халӗ ҫӗнӗ ҫуртра пӗтӗм хӑтлӑх пур.
Шупашкар хулинчи К. Маркс урамӗнче пурӑнакан пӗр мӑшӑр эрех ӗҫме, сыпса лартсан шавлама юратнӑ. Кӳрши тарӑхса ҫитнӗ курӑнать — йӗрке хуралҫисене евитленӗ. Ҫакӑншӑн лешсем хытах кӳренсе лартнӑ, тавӑрма шухӑшланӑ.
46 тата 40 ҫулти упӑшкипе арӑмӗ полицие пӗлтерекене нумай хваттерлӗ ҫурт домофонӗ витӗр тата кил хуҫин хваттер алӑкӗ патне пырса усал сӑмах каласа вӑрҫнӑ. Кил хуҫи арҫынни ҫухалса кайман — диктофон ҫине ҫырса илнӗ.
Кайран арҫын прокуратурӑран пулӑшу ыйтнӑ. Прокуратура тӗрӗслевӗ тӑрӑх арӑмӗпе упӑшки тӗлӗшпе административлӑ ӗҫ пуҫарнӑ, суд вӗсене 3-шер пин тенкӗшер штраф хурса панӑ.
Чӑваш Ен Элтеперӗ Олег Николаев ӗнер, утӑ уйӑхӗн 16-мӗшӗнче, республикӑри икӗ ҫемьене тата тӑхӑр амӑшне патшалӑх наградисемпе чысласси ҫинчен калакан хушӑва алӑ пуснӑ.
Ҫемье институтне ҫирӗплетессине пысӑк тӳпе хывнӑшӑн «Юратупа шанчӑклӑхшӑн» орденпа Ҫӗрпӳ районӗнчи Владимир Михайловичпа Галина Михайловна Ижедеровсене тата Елчӗк районӗнчи Петр Николаевичпа Марфа Михайловна Падуевсене чыслама йышӑннӑ.
Ачасене тивӗҫлӗ воспитани панӑшӑн «Анне» амӑш мухтавӗн паллипе Красноармейски районӗнчи пилӗк ача амӑшне Елена Леонидовна Владимировӑна, Куславкка районӗнчи пилӗк ача амӑшне Нина Павловна Кирилловӑна, Тӑвай районӗнчи пилӗк ача амӑшне Светлана Анатольевна Константиновӑна, Вӑрнар районӗнчи пилӗк ача амӑшне Людмила Геннадьевна Ксенофонтовӑна, Ҫӗнӗ Шупашкарти сакӑр ача амӑшне Ольга Викторовна Матлаша, асӑннӑ хулари пилӗк ача амӑшне Валентина Михайловна Мешковӑна, Ҫӗмӗрлери пилӗк ача амӑшне Татьяна Юрьевна Мотовӑна, Канаш районӗнчи пилӗк ача амӑшне Елена Николаевна Наумовӑна, Хӗрлӗ Чутай районӗнчи пилӗк ача амӑшне Валентина Николаевна Плисовӑна чыслӗҫ.
Йӗпреҫ районӗнчи Пучинке ялӗнче пурӑнакан ҫамрӑк ҫемье нимсӗр-мӗнсӗр тӑрса юлнӑ. Йӑлтах – пушара пула.
Ҫурла уйӑхӗн 10-мӗшӗнче 15 сехет те 45 минутра Сергеевсен ҫуртӗнче ҫулӑм тухнӑ. Малтан пӳрт шалтан ҫуннӑ. Ҫав вахӑтра Сергеевсем картишӗнче пулнӑ.
Ҫулӑм питӗ хӑвӑрт сарӑлнӑ. Ҫемье ҫунакан ҫуртран нимӗн те илсе тухайман. Документсем те ҫунса кайнӑ. Ҫамрӑк мӑшӑр урамра тумтирсӗр, нимсӗр-мӗнсӗр тӑрса юлнӑ. Сергеевсен ҫулталӑкри ача пур.
Вӗсене пулӑшас тесен ҫак номерпе ҫыхӑнма, укҫа куҫарма пулать: 89196641701.
+17.3 °C