«Раҫҫей мисӗ» конкурса Чӑваш Енрен кӑҫал икӗ пике хутшӑнассине Чӑваш халӑх сайчӗ унччен пӗлтернӗччӗ. Аса илтерер: илем конкурсӗнче Анна Будаева тата Яна Галанина ӑмӑртнӑ. Конкурс утӑ уйӑхӗн 25-мӗшӗнче иртнӗ.
Ӑмӑртӑва хутшӑннӑ 25 пикерен чи хитре хӗр яне Ӗрӗнпурти Анна Линникова тивӗҫнӗ. Чӑваш Енри Анна Будаева пӗрремӗш вице-мисс ята ҫӗнсе илнӗ.
Анна Будаева Шупашкарти электромеханика колледжӗнче программиста, веб- тата мультимеди приложенийӗсен разработчикне вӗренет. Модель пулса ӗҫлет, пушӑ вӑхӑтра веб-сайтсем хатӗрлет, баскетболла вылять. Чӑваш Енри волонтёр центрӗпе ҫыхӑну тытнӑ май хуҫасӑр чӗрчунсене пулӑшать.
Етӗрнере ют ҫын машинипе хула тӑрӑх ярӑнса ҫӳренӗ ҫамрӑксене суд тунӑ. Ушкӑнпа пухӑнса автомобиль вӑрланӑ тесе вӗсене РФ Пуҫиле кодексӗн 166-мӗш статйин 2-мӗш пайӗн «а» пункчӗпе килӗшӳллӗн айӑпласа 7-шер пин тенкӗ штраф хурса панӑ.
Суд тенкелӗ ҫине 17, 16 тата 14 ҫулсенчи виҫӗ ҫамрӑк ларнӑ. Кӑҫалхи пуш уйӑхӗн 8-мӗшӗнчи ҫӗрле вӗсем Етӗрнери суту-илӳ цеентрӗсенчен пӗрин умӗнче «ВАЗ-2107-4» машина ларнине асӑрханӑ. Автомобиле питӗрменнипе, машинӑна хускатмалли уҫӑ вырӑнтах пулнипе усӑ курса ют ҫыннӑн транспорчӗпе ҫула тухнӑ. Машинӑпа пӗрре кӗрт ҫине пырса кӗнӗ-ха, унтан ӑна ҫул ҫине тӗксе кӑларнӑ та каллех ярӑнма кайнӑ. Кӗҫех кӗрт ҫине тепре кӗрсе ланӑ. Унтан машинӑна тек кӑларайман, автомобиле пӑрахса хӑварнӑ.
Машина ҫухални ҫинчен тепӗр кунне хуҫи йӗрке хуралҫисене пӗлтернӗ...
Шупашкар хулинче пурӑнакан икӗ ҫамрӑк ватӑ ҫынсене улталаса укҫаллӑ пулнӑ. Йӗрке хуралҫисене хӑйсем ӗнентернӗ тӑрӑх, вӗсем мессенджерсенчен пӗринче пӗлтерӳ асӑрханӑ имӗш. Унта ҫынсем патне кайса укҫа илсе тухма, ӑна ятарлӑ счёт ҫине хума сӗннӗ-мӗн. Укҫан 10 проценчӗ хӑйсене юлать тесе шантарнӑ.
Пенсионерсене вара теприсем стационар номерӗ ҫине шӑнкӑравласа вӗсен ҫывӑх ҫыннисем инкеке лекнӗ, кирлӗ ҫынсене укҫа парсан пӑтӑрмахран ҫӑлӑнса юлма пулать тесе ӗнентернӗ.
69 ҫулти хӗрарӑм мӑнукӗшӗн «тӑрӑшса» 240 пин тенкӗ тыттарса янӑ, 85 ҫулти кинемей тӑванӗн хӗрне «пулӑшма» –180 пин тенкӗ; 81 ҫулти хӗрарӑм «аварие лекнӗ» ывӑлӗшӗн хӑраса ӳкнӗ – 500 пин тенкӗ кӑларса тыттарнӑ.
Утӑ уйӑхӗн 10-мӗшӗнче
️Тутарстанри Элкел районӗнчи Сиктӗрмере Уяв иртнине Чӑваш халӑх сайчӗ пӗлтернӗччӗ. Чӑвашлӑх уявӗн мероприятийӗ пуян пулнӑ. Сӑмахран, «Уяв пики» пултарулӑх конкурсӗ иртнӗ.
Ӑмӑртӑва 16 пике хутшӑннӑ. Вӗсенчен виҫҫӗшӗ — Чӑваш Республикинчен, ыттисем – Тутарстанӑн тӗрлӗ районӗнчен.
Конкурса хутшӑнма кӑмӑл тунӑ хӗрсем хӑйсемпе паллаштарнӑ, тӳресене чӑваш апат-ҫимӗҫӗпе сӑйланӑ, юрласа та ташласа кӑтартнӑ.
Пултарулӑх ӑмӑртӑвӗнче ҫӗнтерӳҫӗ ятне Вӑрмар районӗнчи Мӑнҫырмари Кристина Данилова тивӗҫнӗ.
Чӑваш Енри айтишниксем ҫар ретне тӑмӗҫ. Хӗсмете каяссинчен 67 яша хӑтарӗҫ.
ИТ-специалистсене ҫара илессинчен хӑтарма ҫӗршыв Президенчӗ Владимир Путин сӗннипе йышӑннӑччӗ.
Ҫар ретне тӑратасран отсрочка пама ыйтса пирӗн ҫӗршыври 8,7 пин ытла ҫамрӑк заявка панӑ. Вӗсенчен 7695 ҫамрӑк саккун ыйтнине тивӗҫтернӗ, ҫав шутра – пирӗн республикӑри 67 IT-специалист. Отсрочка списокне лекнӗ ҫамрӑксен тӗлӗшпе тивӗҫлӗ йышӑнӑва призыв комиссийӗ тӑвать.
Сӗнтӗрвӑрри районӗнчи пӗр ялта пурӑнакан 36 ҫулти арҫын пӗлтӗрхи юпа уйӑхӗнче хӗр-тусӗпе вӑрҫӑнса кайнӑ. Вӑрах шухӑшласа тӑман вӑл – тӗнче тетелӗнче хӗрпе паллашнӑ.
Ҫӗнӗ тус хӑйӗнпе Оля тесе паллаштарнӑ. Хайхискер виҫҫӗмӗш кунхине арҫынтан 2,5 пин тенкӗ укҫа кивҫен ыйтнӑ. Сӗнтӗрвӑрри ҫынни куҫарса панӑ. Тепӗр кун иртсен хӗрарӑм тата укҫа ыйтнӑ. Хальхинче ӑна «кӗмӗл» хӗрӗ валли хаклӑ эмел туянма кирлӗ пулса тухнине ӗнентернӗ. 50 пине яхӑн тенке арҫын киви-енчӗке куҫарса панӑ. Кӑштах вӑхӑт иртсен «Оля» Шупашкарта тара илсе пурӑнакан хваттершӗн тӳлеме укҫа кирлине пӗлтернӗ. Арҫын каллех итленӗ.
Хӗрарӑм вара ҫӗнӗ тусӗпе тӗл пулма килӗшмен. Арҫын хӑй улталаннине ӑнланса илсен йӗрке хуралҫисенчен пулӑшу ыйтнӑ. Вӗсем «Оля» текенни Кабарда-Балкар Республикинчи 29 ҫулти арҫын пулнине тупса палӑртнӑ. Вӑл укҫан пӗр пайне саплаштарнӑ. Тӗпчев малалла пырать.
Шупашкар хулинче пӗр водитель курнӑҫланма шухӑш тытнӑ. Водитель ҫеҫ мар-ха. Салонта ларса пыракан пассажирсем те. Пӑтӑрмаха йӗрке хуралҫисем утӑ уйӑхӗн 5-мӗшӗнче тӗнче тӗтелӗнче вырнаҫтарнӑ видео тӑрӑх асӑрханӑ, кӗҫех водителе те тупса палӑртнӑ.
Шупашкар хулинче пурӑнакан 33 ҫулти арҫын тытса пыракан «Линкольн» автомобиль тӑрри ҫине виҫҫӗн улӑхса ларнӑ. Видеоран илнӗ скриншот тӑрӑх хакласан, вӗсенчен пӗри кабина ҫивиттийӗнчен пуҫне кӑларса пынӑ, пӗри тӑрри ҫине тӑсӑлса выртнӑ, тепри — ларса пынӑ.
Водителе ҫул-йӗр инспекторӗсем чӗнсе илнӗ. Арҫын тӗлӗшпе протокол ҫырса ӑна административлӑ майпа явап тыттарнӑ. Пассажирсене кабинӑра лартса ҫӳремелли йӗркене пӑснӑшӑн водителӗн 1000 тенкӗ штраф тӳлеме тивет.
Ҫулла кашниех канма кайма ӗмӗтленет. Хӗлле ҫул ҫӳресех кайманнисем те халӗ ӑҫта та пулин ҫитсе килме ӗмӗтленеҫҫӗ. Киров облаҫӗнчи 25 ҫулти ҫамрӑк та ҫаплах тӑвас тенӗ. Вӑл Краснодар крайӗнчи Сочие ҫитме ӗмӗтленнӗ.
Каччӑ самолёт-пуйӑспа мар, ҫула май машинӑпа кайма ӗмӗтленнӗ. Киров тӑрӑхӗнчен Шупашкара ҫитсен вӑл ҫула май машина шырама тытӑннӑ. Кӗҫех лартса кайма килӗшекен те тупӑннӑ. Анчах хайхи этем ҫул укҫин пӗр пайне куҫарса пама ыйтнӑ, ятарлӑ каҫӑ ярса панӑ.
Киров каччи каланине итленӗ. Кӗҫех вӑл 18 пин тенкӗсӗр тӑрса юлнӑ. Улталаннине ӑнланса илнӗ хыҫҫӑн каччӑ Шупашкартан тӑван килне кайнӑ.
Ҫӗрпӳ хулинче тиев турттармалли «Валдай» автомобиле чӗртсе янӑ. Вырӑнти пасар территорийӗнче ларакан машина ҫуннине ҫӗртме уйӑхӗн 30-мӗшӗнче 3 сехет те 40 минутра таксист асӑрханӑ. Ҫавӑн пирки вӑл йӗрке хуралҫисене пӗлтернӗ. Вут-ҫулӑма пушарпӑ кӗрешекенсем сӳнтернӗ.
Йӗрке хуралҫисем ҫав каҫ урамра ҫамрӑксен ушкӑнне асӑрханӑ. Вӗсене полицейскисем ШӖМӗн вырӑнти пайне лартса кайнӑ. Машинӑна шӑпах ҫав виҫӗ ҫамрӑк чӗртсе яни ҫиеле тухнӑ. Малтан бензин сапнӑ, унтан чӗртсе янӑ. Усал шухӑш тытнӑскерсем ҫипуҫа ылмаштарса тӑхӑннӑ.
Каччӑсем тӗлӗшпе пуҫиле ӗҫ пуҫарнӑ. Малтанласа палӑртнӑ тӑрӑх, ҫамрӑксенчен пӗри автомобиль хуҫине кӳреннӗ, ҫавӑнпа тавӑрас тенӗ.
Ҫӗртме уйӑхӗн 27-мӗшӗнче — Ҫамрӑксен кунӗнче — яш-кӗрӗмпе хӗр-упраҫа Чӑваш Республикин ҫамрӑксен патшалӑх премийӗпе чысланӑ. Хисепе республикӑра пурӑнакан 26 ҫамрӑк тивӗҫнӗ.
«Сирӗн ӗҫӗрсемпе эпӗ хам паллашма тӑрӑшрӑм. Сирӗн кӑтартӑвӑрсем, ҫитӗнӗвӗрсем пире мӑнаҫланмаллипех мӑнаҫланма хистеҫҫӗ. Пирӗн пуласлӑх сирӗн ҫирӗп аллӑрта пулассине ӗненетӗп. Пирӗн ҫамрӑксем хастар, пултаруллӑ, ӑс-хакӑл енчен те пуян тавракурӑмлӑ, ҫав тери пысӑк тӗллевсем палӑртса вӗсене пурнӑҫа кӗртессишӗн ырми-канми тӑрӑшаҫҫӗ», – мухтанӑ ҫамрӑксене республика Элтеперӗ Олег Николаев.
2021 ҫулшӑн Ҫамрӑксен патшалӑх премине илме пӗтӗмпе 37 проект тӑратнӑ. Проектсенчен ытларах пайӗ спортпа ҫыхӑннӑ. Литературӑпа, культурӑпа, журналистикӑпа ҫыхӑннисем те пулнӑ.
+12.5 °C