Урамсене ят паракан хула комиссийӗнче каллех Хветӗр Уяр пирки калаҫнӑ. Сӑмах май, 4 ҫул каялла комисси Шупашкарти пӗр урама унӑн ятне пама сӗннӗ. Сасӑлав та ирттернӗ. Анчах ЧР Писательсен союзӗ килӗшмен. Ҫапла ята резерва янӑ.
Пушӑн 14-мӗшӗнче иртнӗ ларура каллех ку ыйтӑва пӑхса тухнӑ. Ун чухне «Серебряные ключи» микрорайонти урама унӑн ятне пама сӗннӗ. 8 ҫынран 4-шӗ ырланӑ. 3-шӗ хирӗҫ пулнӑ, пӗр ҫын иккӗленнӗ. Ята каллех резерва янӑ.
Ыран, ака уйӑхӗн 2-мӗшӗнче, Шупашкара «Ылтӑн маска» пӗтӗм Раҫҫейри театр премийӗн жюри членӗсем килӗҫ. Вӗсем Чӑваш патшалӑх пукане театрӗн «Король Лир» спектакльне хаклӗҫ.
Ҫав ӗҫе «Ылтӑн маска» премие илме тӑватӑ номинаципе тӑратнӑ: «Чи лайӑх спектакль», «Чи лайӑх режиссёр ӗҫӗ», «Чи лайӑх художник ӗҫӗ», «Чи лайӑх актёр ӗҫӗ».
Мускавран килнӗ ӑстасем Чӑваш патшалӑх культура институчӗн студенчӗсене тата патшалӑх театрӗсенче литература енӗпе ӗҫлекен специалистсене ӑсталӑха вӗрентӗҫ.
Унччен спектакль-номинантсене Мускавра кӑтартнӑ пулсан кӑҫал вӗсене жюри членӗсем театрсене ҫитсе курса хаклаҫҫӗ.
Паян Шупашкарта Вӗренӳ институтӗнче Чӑваш ҫамрӑкӗсен форумӗ иртнӗ. Ӑна «Хавал» пуҫару ушкӑнӗпе «Ҫамрӑксен хаҫачӗ» йӗркеленӗ. Кӑҫалхипе вӑл иккӗмӗш хут иртнӗ. Пӗрремӗш форум 2019 ҫулта пулнӑ.
Паян форумра тӗрлӗ тытӑмра ҫитӗнӳсем тунӑ ҫамрӑксем хӑйсен ӗҫӗпе, проекчӗпе паллаштарнӑ. Элӗк тӑрӑхӗнчи Кирилл Степанов экзотикӑллӑ тӗрлӗ кайӑк-кӗшӗк ӗрчетет. Хӑйне вӑл ҫамрӑк фермер, ялти блогер тет. Кирилл халӑх тетелӗсенче страницӑсем тытса пырать. Унӑн видеовӗсене пин-пин ҫын пӑхать. Кирилл хӑйӗн роликӗсемпе те паллаштарнӑ, юлашки ҫур ҫулта блогер ӗҫӗ ӑна тупӑш кӳни пирки каласа кӑтартнӑ.
Матвей Блинов форума Мускавран ятарласа килнӗ, вӑл унта вӗренет. Каччӑ тӗрлӗ ҫулта халӑх йышӗ, демографи лару-тӑрӑвӗ мӗнле улшӑнни ҫинчен чӑвашла каласа кӑтартнӑ.
Красноармейски тӑрӑхӗнчи Артур Васильев хурт-хӑмӑр ӗрчетет. Вӑл та хӑйӗн ӗҫӗпе паллаштарнӑ.
Елчӗк округӗнче ҫуралнӑ, халӗ Мускаври М.В.Ломоносов ячӗллӗ патшалӑх университетӗнче вӗренекен Екатерина Нягина - пулас астроном. Эсир ҫӑлтӑр ӳкнине курнӑ-и? Чӑннипе, ҫӑлтӑр ӳкмест, вӗсем - метеорит пайӗсем. Ҫӑлтӑрсем вара вилеҫҫӗ: вӗсенчи газ сирпӗнет.
Нумаях пулмасть Шупашкарта виҫӗреш ҫуралнӑ. Вӗсене Калинин районӗн администрацийӗн ЗАГС пайӗнче регистрациленӗ.
Виҫӗреш хӗрачасем Анастасийӑпа Дмитрий ҫемйинче кун ҫути курнӑ. Вӗсем хӗр пӗрчисене Мария, Валерия тата Кира ят хунӑ.
ЗАГС ӗҫченӗсем ашшӗ-амӑшне саламланӑ, ачисене сывлӑхлӑ ӳсме суннӑ.
Кӗҫех Шупашкарта урӑлтаркӑч пулӗ. Ӑна тума тытӑннӑ ӗнтӗ. Подрядчикӗ - Чулхулара регистрациленнӗ организаци. Унпа 42,6 милион тенкӗлӗх килӗшӳ тунӑ.
Проектне хатӗрлеме вара 2,85 миллион тенкӗ тӑкакланӑ. Вӑл кӑҫал кӑрлач уйӑхӗнче экспертиза витӗр тухнӑ.
Строительство кӑҫал ҫулла вӗҫленмелле. Урӑлтаркӑча кӗркунне уҫма палӑртнӑ. Вӑл Васкавлӑ медпулӑшу пульници ҫывӑхӗнче пулӗ. Унта 4 койкӑллӑ 5 пӳлӗм, душ, туалет, ертӳлӗх пӳлӗмӗсем тума палӑртнӑ.
Шупашкарта та, Ҫӗнӗ Шупашкарта та общество транспортӗнче билет хакӗ ӳсӗ. Кун пирки ЧР транспорт министрӗн ҫумӗ Юрий Арлашкин «тӳрӗ линире» пӗлтернӗ. Спутник хулара хаксене акан 22-мӗшӗнчен хӑпартӗҫ. Шупашкарта вара акан 28-мӗшӗ хыҫҫӑн - кунӗ паллӑ мар-ха.
Шупашкарта билет хакӗ 7 процент ӳсмелле. Троллейбусра чӗрӗ укҫапа тӳлесен 32 тенкӗ пулӗ, карттӑпа - 29 тенкӗ. Автобусра 33 тенкӗ тата 30 тенкӗ.
Ҫӗнӗ Шупашкар - Шупашкар маршрут ҫинче вара билет хакӗ карттӑпа тӳлесен 8 тенкӗ ытларах пулӗ, чӗрӗ укҫапа тӑк - 6 тенкӗ ытларах.
Шупашкарти стоматолог патне мессенджерта пульницӑн тӗп тухтӑрӗ ҫырса янӑ. Аватаркӑра унӑн сӑнӳкерчӗкӗ пулнӑран хӗрарӑм чӑннипех те вӑл ҫырнине ӗненнӗ.
Хайхи ҫын ун патне часах йӗрке хуралҫисем шӑнкӑравлассине, унӑн счечӗпе усӑ курса такамсем Украинӑна укҫа куҫарма хӑтланнине пӗлтернӗ. Ҫак операцисене пӑрахӑҫлас тесен кредит историне нульпе танлаштармалла-мӗн. Хӗрарӑм кредитсем илсе виртуаллӑ счет ҫине 1 миллион та 70 пин тенкӗ куҫарнӑ. Ултавҫӑсем 1 миллион та 700 пин тенкӗлӗх кредит илме сӗнсен тин стоматолог хӑйне шӑнман пӑр ҫине лартса янине ӑнланнӑ.
Паян 14 сехетре Шупашкартан Шупашкар округӗнчи Ҫӗньяла ҫӳрекен 15-мӗш автобус водителӗ руле итлеттереймен – кювета чӑмнӑ. Ку аэропортран инҫех мар пулса иртнӗ.
Юрать-ха, салонра 2 пассажир кӑна пулнӑ. Вӗсем те, водитель те аманман.
Паян республикӑра юр ҫӑвӑть. Унччен вара асфальт тухнӑччӗ. Ахӑртнех, ҫул-йӗре тасатса тӑракансем пуш уйӑхӗн вӗҫӗнче кунашкаллине кӗтмен – авари пулнӑ ҫӗрте ҫул тасах курӑнмасть. Ҫынсем каланӑ тӑрӑх, унччен маларах унта ҫӑмӑл машина кювета чӑмнӑ.
Шупашкарти экспресс-кинемейсем ятарлӑ ҫар операцине хутшӑнакан ҫемьесене ача пӑхса пулӑшаҫҫӗ. Хӑйсен пепкисемпе вӑхӑтлӑх ларакан кирлине вӗсем Шупашкар хулинчи халӑхӑн комплекслӑ ыйтӑвӗсене тивӗҫтерекен социаллӑ центрти координаци центрне шӑнкӑравласа пӗлтереҫҫӗ. Унтисем вара ҫын ачине вӑхӑтлӑх пӑхма хатӗр кинемейсене вӑл е ку ҫемьене яраҫҫӗ.
Асӑннӑ центрта пӗлтернӗ тӑрӑх, ӳркенмен ватӑсем юлашки вӑхӑтра ытларах пӗр хут пулӑшу кӳреҫҫӗ. Сӑмахран, пӗчӗк ачасен амӑшӗн пульницӑна кайса килмелле, анчах пепкене никампа хӑварма май ҫук. Е тата алӑра кипкери икӗ ача, вӗсемпе больницӑна каймалла. Пӗрле пыракан пулсан амӑшне ҫӑмӑл. Шӑпах ҫавӑн пек тӗслӗхсенче пулӑшнӑ та Шупашкарти Мария Мурзаева тата Ольга Астапова экспресс-кинемейсем.
Ирина Нефёдова — нумай ачаллӑ амӑшӗ. Паян вӑл юратнӑ ӗҫӗпе хӑйӗн студийӗнче тӑрӑшать.
Ҫӗнӗ ӗҫе хӗрарӑм 2020-мӗш ҫулта пуҫӑннӑ. «Ҫӗнӗ ӗҫе пуҫӑнма хысна ӗҫченӗн шалӑвӗ хистерӗ. Пандеми пуҫлансан малалла мӗнле пурӑнмалли пирки те уҫӑмлӑх ҫукчӗ. Хам ӗҫленӗ ача пахчинче ертӳҫӗсем улшӑнса пӗтрӗҫ. Упӑшкан пушӑ пӳлӗмсем пурччӗ. Анчах юсама тата оборудовани туянма укҫа ҫукчӗ. Ҫавӑн чухне эпӗ социаллӑ контракт пирки пӗлтӗм», – каласа кӑтартнӑ Ирина.
Пулас предприниматель кирлӗ документсем пухнӑ, бизнес-план ҫырса ӑна тивӗҫлипе хӳтӗленӗ. Кайран патшалӑхран укҫа илсе обрудовани тата инструментсем туяннӑ. Паян унӑн логопед пӳлӗмне ачасене йышлӑн илсе пыраҫҫӗ.
+12.3 °C