Кӑҫал Чӑваш Енре Раҫҫей спорт мастерӗн ятне тивӗҫнисен шучӗ унчченхинчен палӑрмаллах нумайланнӑ. Пурӗ 55 спортсмен ҫак ята илме пултарнӑ. Иртнӗ ҫулпа танлаштарсан ҫакӑ 26 ҫын ытларах тенине пӗлтерет.
Кӑҫалхи раштав уйӑхӗн 28-мӗшӗнчи ҫӗршывӑн спорт министрӗн Павел Колобковӑн хушӑвӗпе тата тепӗр ҫынна Раҫҫей спорт мастерӗн ятне панӑ. Ҫак йышра: Екатерина Львова (ҫӑмӑл атлетика), Алевтина Иванова (пауэрлифтинг), Сергей Бирюков тата Антон Иванов (сусӑрсем), Александр Зайцев, Анна Павлова тата Мария Степанова (ухӑҫӑсем), Александр Васильев тата Денис Комиссаров (триатлон).
Сӑмах май, кӑсал 5 атлет тӗнче класлӑ спорт мастерӗ пулса тӑнӑ.
Чӑваш Енӗн Спорт министерстви вӗсене пурне те ҫав ятпа саламланине пӗлтернӗ.
Чӑваш Енре пама йышӑннӑ «Амӑшӗн мухтавӗ» хисеп паллин эскизне конкурсра ҫирӗплетӗҫ. Паян иртнӗ Чӑваш Енӗн Министрсен Кабинечӗ ларӑвӗнче ҫакӑн пирки йышӑну проектне сӳтсе явнӑ.
Чӳк уйӑхӗн 24-мӗшӗнче Чӑваш Ен Элтеперӗ Михаил Игнатьев «Амӑшӗн мухтавӗ» хисеп паллине парасси ҫинчен хушу кӑларнӑччӗ. Ку указа алӑ пуснине вӑл районсемпе хула администрацийӗсен пуҫлӑхӗсемпе ирттернӗ канашлура пӗлтернӗччӗ. Ӑна пама Амӑшӗн кунӗ умӗн (ку уява чӳк уйӑхӗн юлашки вырсарникунӗнче палӑртаҫҫӗ) йышӑннӑччӗ.
«Амӑшӗн мухтавӗ» хисеп паллин эскизне уйрӑм ҫын та, организаци те сӗнме пултарать. Ӗҫсене конкурсра пӑхса тухса ҫирӗплетӗҫ.
Ҫӗнтерӳҫӗне 10 пин тенкӗпе хавхалантарӗҫ тата унпа усӑ курма ирӗк панишӗн тепӗр 5 пин тенкӗ тӳлӗҫ.
Раштав уйӑхӗн 22-мӗшӗнче Правительство ҫуртӗнче ӗҫре ҫитӗнӳсем тунӑ ҫынсене чысланӑ. Вӗсен йышӗнче культура, ӑслӑлӑх, ӳнер, ял хуҫалӑх, промышленноҫ, медицина, вӗрентӳ тата ытти тытӑм ӗҫченӗсем пулнӑ.
Наградӑна тивӗҫнисене йышӗнче ЧР Элтеперӗ Михаил Игнатьев та пулнӑ. Награда тинех хуҫине тупнӑ. Аса илтерер: кӑҫал ҫӗртме уйӑхӗнче Михаил Игнатьева «Чӑваш Республики умӗнчи тава тивӗҫлӗ ӗҫсемшӗн» ордена парас ыйтӑва сӳтсе явнӑ. Ку пуҫару – Елчӗк район администрацийӗн пуҫлӑхӗн тата депутатсен.
Ордена Михаил Игнатьева ҫур ҫултан ҫеҫ савӑнӑҫлӑ лару-тӑрура панӑ. Элтепере ЧР Патшалӑх Канашӗн председателӗ Валерий Филимонов чысланӑ.
Сӑмах май, ку орден – республикӑри патшалӑх наградисенчен чи пысӑккисенчен пӗри. Ӑна 2005 ҫулта йышӑннӑ, ку таранччен ордена Варнава митрополит тата Андрей Эшпай композитор тивӗҫнӗ.
Тӗмен тӑрӑхӗнчи чӑвашсен «Тӑван» ассоциацине ертсе пыракан Ираида Маслова Фейсбукра ӗнер вӑл тӑрӑхри ентешӗмӗрсешӗн ырӑ хыпара пӗлтернӗ.
Тӗменти патшалӑхӑн нефтьпе газ университечӗн преподавателӗнче ӗҫлекен Евгений Максимова В.И. Муравленко премийӗпе чысланӑ. Асӑнмалӑх пулӑм Тӗменти область думинче пулса иртнӗ. Аякри ентешӗмӗрсен «Тӑван» юлташлӑх хӑйӗн хастар пайташне ҫав ятпа саламланине пӗлтерет.
Виктор Муравленко премийӗпе нефтьпе газ енӗпе ҫӗнӗ технологи пурнӑҫа кӗртекенсене чыслаҫҫӗ.
Чӑваш Енре этем правине хӳтӗлекен уполномоченнӑй пулса ӗҫленӗ, каярах «Правозащитный бастион» (чӑв. Правӑна хӳтӗлекен бастион) ятлӑ коммерцилле мар организаци йӗркеленӗ Юрий Кручинина Раҫҫейӗн Юстици министерстви «За содействие» (чӑв. Пулӑшнӑшӑн) ылтӑн медальпе наградӑлама йышӑннӑ. Кун пирки республикӑри паллӑ юрист Фейсбукра ӗнер пӗлтернӗ.
«Раҫҫей юстицийӗшӗн ӗҫлетӗп! Правӑна сыхлакан ҫак орган адвокат ӗҫне ыттисенчен ытларах пӗлет тата хисеплет», — тесе ҫырнӑ Юрий Кручинин.
Ыран, раштав уйӑхӗн 8-мӗшӗнче, Шупашкарти Трактор тӑвакансен культура керменӗнче Чӑваш Енре кӑҫал палӑртнӑ Амӑшӗпе Ашшӗн ҫулталӑкне пӗтӗмлетӗҫ. Унтах «Ҫулталӑк ҫемйи» республика конкурсӗн ҫӗнтерӳҫисем паллӑ пулӗҫ.
Ҫулсерен ирттерекен ӑмӑртӑва Чӑваш Енӗн Ӗҫлев тата социаллӑ аталану министерстви ирттерет. Йӗркелӳҫӗсем конкурс тӗллевӗсенчен пӗри культурӑна упраса хӑварассине ҫемье витӗм кӳнине ӳстересси тесе палӑртаҫҫӗ. «Ҫулталӑк ҫемйи» конкурса ирттерме вырӑнти хӑй тытӑмлӑх органӗсем те тӳпе хывнине палӑртмалла. Ыран ҫӗнтерӳҫӗ-ҫемьене чысланипе пӗрлех тӗрлӗ номинацире: «Социаллӑ яваплӑ ҫемье»; «Спортпа туслӑ ҫемье»; «Туслӑ ҫемье»; «Пултаруллӑ ҫемье»; «Ӗҫчен ҫемье» — палӑрнисене те чыслӗҫ.
Паян, раштав уйӑхӗн 5-мӗшӗнче, Раҫҫей Федерацийӗн Президенчӗн Атӑлҫи федераци округӗнчи полномочиллӗ элчи Михаил Бабич Атӑлҫи тӑрӑхӗнче пурӑнакан хисепе тивӗҫнисене патшалӑх наградисемпе чыслӗ.
Савӑнӑҫлӑ мероприятие пирӗн республикӑра пурӑнакансем те хутшӑнӗҫ.
Ҫӗршыв шайӗнчи йышӑнупа орден-медале тивӗҫекен 17 ҫын хушшинче Чӑваш Енрен те пур.
Шупашкарта пурӑнакан Николай тата Дарья Пороскунсем виҫӗ ывӑлпа тӑватӑ хӗр ӳстереҫҫӗ. Пӗрисем йышлӑ ача хисепе тивӗҫеҫҫӗ пулсан Хӗрлӗ Чутай районӗнчи Тихӑнушкӑнь ялӗнче пурӑнакан, 7-мӗш класс пӗтернӗ Кирилл Блинов путакан ачана шывран туртса кӑларса паттӑрлӑх кӑтартнӑ. Хӗрачана ҫӑлма малтанласа ашшӗ чупса пынӑ-ха, анчах вӑл шыва путнӑ. «Эп ишме пӗлетӗп. Нимрен те хӑрамарӑм», — мӑн ҫынла хӑюллӑн каланӑ кайран паттӑр йӗкӗт.
Шупашкарта ҫамрӑксен наци театрӗсен фестивалӗ вӗҫленчӗ. Аса илтерер, ӑна Ҫеҫпӗл Мишши ячӗллӗ Чӑваш патшалӑх ҫамрӑксен театрӗ республикӑн Культура министерстви тата Театр ӗҫченӗсен Раҫҫейри пӗрлешӗвӗ пулӑшнипе йӗркеленӗ.
Кӑҫал иккӗмӗш хут театр форумӗнче тӗрлӗ номинаципе ҫӗнтерӳҫӗсене палӑртнӑ. Унта хамӑр театрӑн тӗп режиссерӗ Иосиф Дмитриев та палӑрнӑ. «Виҫ кӗтеслӗ юрату» спектакле режиссер пулса лартнӑ. Иосиф Дмитриев «Ҫамрӑксем валли лартнӑ чи лайӑх спектакль (режиссура)» палӑрнӑ. Ҫак спектаклӗн авторне Геннадий Тимофеева (Челпир) «Чи лайӑх пьеса» номинацире палӑртнӑ. Ку спектакльте Аниҫҫе сӑнарне калӑпланӑ Наталья Ахмед «Хӗрарӑмӑн чи лайӑх сӑнарӗ» номинацире ҫӗнтернӗ.
Хӗрлӗ Чутай районӗнчи Хусанушкӑнь ячи арҫын ачана РФ Президенчӗ Владимир Путин чыслӗ. Кирилл Блинов ҫыннӑ ҫалнӑшӑн «Ҫынна вилӗмрен ҫӑлнӑшӑн» медале тивӗҫӗ.
Пӗлтӗрхи утӑ уйӑхӗн 19-мӗшӗнче Кирилл, кил умӗнче пулнӑскер, пулӑшу ыйтса кӑшкӑрнине илтнӗ. Арҫын ача тӳрех амӑшне чӗннӗ. Вӗсем пӗве еннелле чупнӑ.
Ҫыранран инҫех мар катамаран ларнӑ, ун ҫинче – 7 ҫулти хӗрача. Кирилл ӑна ҫӑлма ыткӑннӑ, ҫыран хӗррине илсе тухнӑ. Хӗрача 12 ҫулти аппӑшӗ путни пирки каланӑ. Вӗсен ашшӗ аслине ҫӑлас тесе шыва чӑмнӑ, анчах каялла тухайман.
Кирилл катамаран ҫине ларса путакан ачана ҫӑлма васканӑ. Вӑл хӗрачана ҫыран хӗррине илсе тухнӑ. Шел те, ашшӗне ҫӑлайман. Кирилпа амӑшӗ васкавлӑ медпулӑшу чӗннӗ. Арҫын хӗрӗсемпе яла тӑванӗ патне канма килнӗ пулнӑ-мӗн.
Авӑнӑн 16-мӗшӗнче Владимир Путин Кирила медальпе чысласси пирки хушу алӑ пуснӑ. Ӑна хӑҫан чыслассине каярахпа пӗлтерӗҫ.
Паян Чӑваш Ен Элтеперӗ Михаил Игнатьев шкул ачисене Правительство ҫуртӗнче йышӑннӑ. Сакӑр арҫын ача пуҫтарӑннӑ унта. Пурте вӗсем — шкулта вӗренекенскерсем. Пӗвӗпе пӗчӗк ҫеҫ пулсан та вӗсем паттӑрла ӗҫ тума ӗлкӗрнӗ. Тӑвас тесе те туман ҫак утӑма ачасем. Инкеке лекнине асӑрханӑ та часрах пулӑшма ӑнтӑлнӑ. Кайран ҫеҫ хӑйсем мӗн тунине тӗшмӗртнӗ вӗсем.
Акӑ, Тӑвай районӗнчи Тӗмер шкулӗнче 6-мӗш класра вӗренекен Сергей Юзуков кӑҫалхи утӑ уйӑхӗнче хӑйӗнчен пӑр ҫул кӗҫӗнрех ачана шывра путасран ҫӑлнӑ. Хӑраса ӳкнӗ ача асли ҫӑлма ишсе пырсан ун ҫине сиксе ларнӑ, иккӗшӗ те путас хӑрушлӑх сиксе тухнӑ. Анчах пӗр ҫул аслӑраххи ҫухалса кайман — кӗҫӗннине лӑплантарнӑ, алӑран тытма сӗннӗ. Ҫапла вӗсем ҫыран хӗрне ишсе тухнӑ.
Паян Михаил Игнатьев хӑюлӑхпа паттӑрлӑх кӑтартнӑ ачасене сехет парнеленӗ.
Сӑмах май каласан, ачасене паян, ҫӗршывӑн гражданла оборона тытӑмне йӗркеленӗренпе 85 ҫул ҫитнӗ кун, йыхравланӑ.
+12.3 °C