Канаш муниципаллӑ округӗнчи хресчен фермер хуҫалӑхӗн ертӳҫине улталанӑшӑн тата суя документсем хатӗрленӗшӗн суд тунӑ.
Ҫакӑ паллӑ: 2017 ҫулта вӑл ЧР Ял хуҫалӑх министерствине суя документсем тӑратса 2,9 миллион тенкӗлӗх грант илнӗ. Ҫапла ҫамрӑк фермер республика хыснине уйрӑмах пысӑк тӑкак кӳнӗ.
Шупашкарти Ленин районӗн сучӗ фермера тӗрмене хупмасӑр 4 ҫуллӑха айӑплама йышӑннӑ. Арбитраж сучӗ ЧР Ял хуҫалӑхӗ валли фермертан 2,9 миллион тенкӗ шыраса илнӗ.
Хусан хулинчи 20 ҫулти каччӑ тӑватӑ ватӑ ҫыннӑн 4 миллион ытла тенкине вӑрланӑ. Ӑна 3 ҫул ҫурӑлӑха тӗрмене хупмасӑр ирӗкрен хӑтарма йышӑннӑ. Хӑй шар кӑтартнӑ ватӑсене вӑл укҫана тавӑрса панӑ.
Асӑннӑ каччӑ «Сирӗн тӑван ҫул ҫинчи инкеке лекнӗ» мелпе улталаканнсен схеминче курьер евӗр пулнӑ.
Шупашкарти пӗр хӗрарӑм 3,7 миллион тенкӗ таран тыттарса янӑ. Тӑванӗсене пулӑшас, инкекрен ҫӑлса хӑварас текенсем татах тупӑннӑ. Шӑпах ҫавӑн йышшисен укҫине илме пынӑ та Хусан каччи.
Раштав уйӑхӗн пуҫламӑшӗнче Канаш муниципаллӑ округӗнчи Кивӗ Шелттем ялӗнче пурӑнакан 29 ҫулти арҫынна Канаш вокзалӗнче ҫаратнӑ. Вӑл, сусӑрскер, унта ашшӗ-амӑшӗпе пулнӑ. Кӗтмен ҫӗртен ун патне палламан ӳсӗр арҫын пынӑ та хӑйне тахҫанхи тусӗ пек тыткаланӑ, ыталаса илнӗ. Ҫав вӑхӑтра вӑл сусӑрӑн енчӗкне кӑларса илнӗ. Унта вара 4 пин тенке яхӑн пулнӑ.
Йӗрке хуралҫисем ҫакна ҫав округрах пурӑнакан, унччен судпа айӑпланнӑ 39 ҫулти арҫын тунине палӑртнӑ. Ӑна тытса чарнӑ, ун тӗлӗшпе пуҫарнӑ пуҫиле ӗҫе кӗҫех суд пӑхса тухӗ.
Йӗпреҫ муниципаллӑ округӗнчи 61 ҫулти арҫын пӗлӗш хӗрарӑмӗнчен 1 миллиона яхӑн тенкӗ кивҫен илнӗ. Унпа вӑл кӳлӗ хӗрринче кану ҫурчӗ тума палӑртнӑ-мӗн.
Анчах арҫын парӑма татма васкаман. Хӗрарӑмӑн ӑна суда пама тивнӗ. Суд ун майлӑ пулнӑ. Арҫыннӑн счечӗсенчи укҫапа парӑма татма йышӑннӑ. Ӑна пурлӑх регистрацилеме, ют тӑрӑха тухса ҫӳреме те чарнӑ. Сочири 500 тӑваткал метр ҫӗр лаптӑкӗ пирки калаҫу пуҫлансанах арҫын парӑма татнӑ
Йӗпреҫ районӗнче кӑҫалхи утӑ уйӑхӗнче пульница ӗҫченӗ пациент патне килне пынӑ. Вӑл ун патне сывлӑхне тӗрӗслеме ҫитнӗ.
Анчах 72 ҫулти тухтӑрпа инкек пулса иртнӗ. Вӑл картишне кӗнӗ кӑна – ӑна йытӑ уринчен ҫыртнӑ.
Кун хыҫҫӑн район прокуратури тӗрӗслев ирттернӗ. Ҫакӑ палӑрнӑ: кил хуҫи йытӑ ытти ҫынна сиен ан кӳтӗр тесе тӑрӑшман. Прокуратура суда тавӑҫ тӑратнӑ. Йытӑ хуҫинчен 20 пин тенкӗ шыраса илнӗ. Ку – тухтӑра кӑмӑл-сипет тӗлӗшӗнчен сиен кӳнӗшӗн.
Комсомольски муниципаллӑ округӗн администрацийӗнчен ҫӗре вараланӑшӑн 600 пин тенкӗ шыраса илнӗ.
Пӑтӑрмах пирки Ҫутҫанталӑк надзорӗн управленине вырӑнтисем пӗлтернӗ.
Ведомство Комсомольскинчи ҫӗр лаптӑкӗсене тӗрӗсленӗ те канализаципе насус станцийӗнчен шыв юхса выртнине палӑртнӑ.
Асӑннӑ станци вырӑнти администраци балансӗ ҫинче пулнӑ.
Тимсӗрлӗхе пула ҫӗре 600 пин тенкӗ ытлалӑх шар кӑтартнӑ. Администраци штрафа хӑй кӑмӑлӗпе тӳлеме килӗшменрен Чӑваш Енӗн Арбитраж суднех ҫитнӗ. Халӗ штрафа тӳлесе татнӑ.
Шупашкарта пурӑнакан 33 ҫулти арҫын пӗлтӗр раштав уйӑхӗнчен пуҫласа кӑҫалхи кӑрлаччен халӑх тетелӗнче страница уҫнӑ та унта арӑмӗн ҫарамасланса ӳкерӗннӗ сӑнӳкерчӗкӗсене вырнаҫтарнӑ. Хӗрарӑм ҫав вӑхӑт тӗлне унран уйрӑлма хут ҫырнӑ пулнӑ.
Арҫын ҫак сӑнӳкерчӗксене арӑмӗн пиччӗшӗ патне те ярса панӑ. Ҫакна вӑл, ахӑртнех, кӗвӗҫнипе, куҫман пурлӑх пайланӑ чухне кӳреннипе тунӑ. Сӑнӳкерчӗксене ӑҫтан илнӗ-ха вӑл? Арӑмӗпе иккӗшӗ ҫырӑннӑ чухне ярса панисем пулнӑ.
Тӗнче тетелӗнче порнографи материалӗсене сарнӑшӑн 2-6 ҫул таран тӗрмене лартма пултараҫҫӗ.
Ҫак кунсенче Чӑваш Енри темиҫе юриста сумлӑ ят панӑ.
«Чӑваш Республикин тава тивӗҫлӗ юрисчӗ» ята Етӗрнери «Бизнес тата Право» адвокатсен коллегийӗн адвокачӗ Галина Аникина, Шупашкарти «Иванов, Ильин тата партнёрсем» адвокатсен коллегийӗн председателӗ Сергей Ильин, Чӑваш Енӗн Патшалӑх Канашӗн патшалӑхпа право управленийӗн юридици пайӗн секторӗн заведующийӗ Надежда Ингилизова, Чӑваш Республикин Арбитраж сучӗн судйисем Наталия Кисапова тата Ольга Павлова, Чӑваш Енӗн Сывлӑх сыхлав министерствин право пайӗн пуҫлӑхӗ Ольга Петрова, Чӑваш Енӗн Верховнӑй сучӗн председателӗн заместителӗ Галина Савелькина тата судйи Владимир Селиванов тивӗҫнӗ.
Хӗрлӗ Чутай тӑрӑхӗнче пурӑнакан пӗр хӗрарӑм хӑйӗн ачи умӗнче 1,5 миллион тенкӗ парӑма кӗрсе кайнӑ. 38 ҫулти амӑшне ҫавӑншӑн ывӑх вӑхӑтрасуд енелӗ ҫине лартӗҫ. Ун тӗлӗшпе РФ Пуҫиле кодексӗн 157-мӗш стайин 1-мӗ айӗпе килӗшӳллӗн пуҫиле ӗҫ пуҫарнӑ.
Вырӑнти прокуратурӑра пӗлтернӗ тӑрӑх, алимент тӳлеменшӗн хӗрарӑма административлӑ майпа унччен темиҫе хут та явап тыттарнӑ. Анчах вӑл ывӑлне пӗрех пулӑшма васкаман — хӗрарӑм ӗҫе вырнаҫма шухӑшламан та.
Парӑмӑн пӗтӗмӗшле виҫи 1,5 миллион тенкӗрен иртсе кайнӑ.
Ывӑлне пулӑшма килӗшмен хӗрарӑм тӗлӗшпе пуҫарнӑ пуҫиле ӗҫе Етӗрне районӗнчи суда ярса панӑ.
Шупашкар хулинче пурӑнакан 50 ҫулти хӗрарӑма 8 ҫуллӑха тӗрмене ӑсатнӑ. Ӑна РФ Пуҫиле кодексӗн 105-мӗш стайин 1-мӗш пайӗпе килӗшӳллӗн явап тыттарнӑ.
Кӑҫалхи пуш уйӑхӗнче вӑл хӑйӗн пӗлӗшӗпе патӗнче хӑналаннӑ. Унта тусӗн пӗлӗшӗ те, 52 ҫулти арҫын, пулнӑ. Пӗрле эрех ӗҫнӗ чухне хӑна ҫавӑнпа хирӗҫсе кайнӑ. Ӑна вӑл пуҫӗнчен мӑлатукпа хӗнеме тапранса кайнӑ. Суранланса пӗтнӗ арҫын тепӗр кунне пульницӑра вилсе кайнӑ.
Суд хӗрарӑма пӗтӗмӗшле режимлӑ колоние 8 ҫуллӑха ӑсатнӑ.
+12.5 °C