Ку шӑматкун Пӑрачкав районӗнчи Анастасово ялӗнчи сутуҫӑ лавккана ҫитнӗ те - алӑкӗ уҫӑ. Шалта никам та пулман, анчах икӗ ещӗк эрех ҫухалнӑ.
Ҫакна кам тунӑ? Кӳршӗ ялта та такам лавккана кӗме хӑтланнӑ-мӗн. Ялти ҫынсем ун умӗнче шавланине илтнӗ. Полицейскисем пӗр ҫын килӗнче шӑпах вӑрланӑ эрех кӗленчисене тупнӑ. Кил хуҫи ӑнлантарнӑ тӑрӑх, ӑна пӗлӗшӗ илсе килнӗ. Йӗрке хуралҫисем унӑн 49 ҫулти пӗлӗшне тытса чарнӑ. Вӑл судпа унччен те айӑпланнӑ. Лавкка алӑкне ҫӗмӗрнӗ лума та ҫавӑнтах тупнӑ.
Шупашкар районӗнчи 31 ҫулти арҫын нумаях пулмасть тӗрмерен тухнӑ. Вӑл каллех тӗрмене ларнӑ.
Судра палӑртнӑ тӑрӑх, ҫак арҫын утӑ уйӑхӗнче кафе умӗнче ҫывӑракан арҫынна курнӑ. Хайхискер ун патне пырса телефонне, банк карттине вӑрланӑ та лавккана кайнӑ. Унта эрех-сӑра, пирус, апат-ҫимӗҫ туяннӑ, таксишӗн тӳленӗ. Ҫапла вӑл 6 пин ытла тенкӗ тӑкакланӑ.
Судра арҫын айӑпне йышӑннӑ. Судья ӑна йӗплӗ пралук леш енне 2 ҫуллӑха ӑсатма йышӑннӑ. Палӑртмалла: унччен вӑл тӗрмере харпӑрлӑхпа ҫыхӑннӑ преступленишӗн ларнӑ.
Шупашкар хулинче 24 ҫулти хӗр каҫхи клуба кайсан телефонсӑр тӑрса юлнӑ. Пӑтӑрмах ҫу уйӑхӗн 25-мӗшӗнче пулса иртнӗ. Ун пирки тӳрех йӗрке хуралҫисене пӗлтернӗ. Хыпарлаканӗсем — хулари Трактор тӑвакансен проспектӗнчи каҫхи клуба ӗҫлекен хуралҫӑсем. Вӗсенчен вара пӗр хӗр пулӑшу ыйтнӑ.
Пике 100 пин ытла тенкӗ тӑракан айфонпа ҫӳренӗ. Хаклӑ япала ҫухаланине хӗр ир енне асӑрханӑ, ҫавӑн пирки хуралҫӑсене пӗлтернӗ. Хуралҫӑсем видеокамерӑсене пӑхнӑ та, пӗр каччӑ хайхи хӗре бар стойки патӗнче юри кӑштах тӗкнине, унтан пикен джинс шӑлаварӗн кӗсйинчи телефона кӑларса илнине асӑрханӑ. Каччӑна тӳрех тытса чарнӑ.
21 ҫулти ҫамрӑк тӗлӗшпе пуҫиле ӗҫ пуҫарнӑ. Судпа унччен айӑпланманскере тӳре пӗр уйӑхри шалу виҫилӗх штраф хурса пама йышӑннӑ.
Вӑрмар районӗнчи хӗрарӑма ҫын укҫине вӑрланӑшӑн ӗҫлеттерсе юсантарма йышӑннӑ.
Кӑҫалхи утӑ уйӑхӗн 9-мӗшӗнче кӑнтӑрла вӑл Вӑрмар районӗнчи Урнарти кӗтӳҫӗн курткин кӗсйинчен 6 пин те 300 тенкӗ укҫана кӑларса илнӗ. Арҫын ӳсӗр пулнӑ, кӗтӳҫсен ҫуртӗнче хуп турттарнӑ.
Тепӗр кунхине хӗрарӑм Саруй ялӗнчи хӑйӗн пӗлӗшӗн укҫине вӑрланӑ. 45 ҫулти хӗрарӑм ӳсӗр арҫын ҫывӑрса кайсан шӑлавар кӗсйинчен 2 пин тенкӗ кӑларса илнӗ. Хӗрарӑм хӑй те ӳсӗр пулнӑ. Вӑрланӑ укҫана вӑл пӗтерме ӗлкӗрнӗ.
Район сучӗ хӗрарӑма 400 сехет ӗҫлеттерме йышӑннӑ. Приговор хальлӗхе вӑя кӗреймен-ха.
Ҫурла уйӑхӗн 9-мӗшӗнче ирхине Шупашкарта патрульпе пост службин нарячӗ пысӑк михӗ йӑтса утакан арҫынна чарнӑ. Михӗре мороженӑй пулнӑ. Ӑҫтан тупнӑ вӑл ӑна?
Михӗре 70 мороженӑй пулнӑ. Ҫак ӳсӗр арҫын каланӑ тӑрӑх, вӑл вӗсене Президент бульварӗнчи морозильник контейнерӗнчен вӑрланӑ. Пӗтӗмпе 90 мороженӑй йӑкӑртнӑ. Ыттине урампа утнӑ чухне ҫынсене валеҫсе пӗтернӗ.
Ҫак арҫын кунти мар, вӑл - Киров облаҫӗнчен. Ун тӗлӗшпе пуҫиле ӗҫ пуҫарнӑ.
Ҫурла уйӑхӗн 9-мӗшӗнче Красноармейски салинче кӑнтӑр кунӗнчех 1-мӗш ушкӑнри сусӑра палламан хӗрарӑм тапӑннӑ. Ку Степанов урамӗнчи пӗр ҫурт подъездӗнче пулса иртнӗ.
Хайхи палламан хӗрарӑм сусӑрӑн ылтӑн сӑнчӑрӗпе хӗресне татса вӑрласа тарнӑ. Шӑв-шава илтсе инҫех мар ӗҫлекен хӗрарӑм чупса пынӑ. Мӗн пулса иртнине пӗлсен ҫав ҫын хыҫҫӑн чупнӑ, полицие шӑнкӑравласа пӗлтернӗ.
Йерке хуралҫисем ҫак хӗрарӑм вӑхӑтра пулӑшнипе палламан ҫынна часах тытса чарнӑ. Вӑл – 32 ҫулти хӗрарӑм, унччен судпа темиҫе хутчен айӑпланнӑскер. Хальхинче те унӑн явап тытма тивӗ.
Ҫӗртме уйӑхӗн 2-мӗшӗнче Шупашкарта пурӑнакан 25 ҫулти арҫын полицие пырса 390 пин тенкӗ ҫухални пирки пӗлтернӗ. Ӗҫ-пуҫ акӑ мӗнле пулса иртнӗ.
Вӑл каҫхине ҫӳп-ҫап тӑкма тухнӑ. Каялла таврӑннӑ та - хваттер алӑкӗ хӑйех питӗрӗнсе ларнӑ. Хӑйӗнпе пӗрле вара уҫҫи пулман. Кӳршисене сасӑпа вӑратас мар тесе вӑл тусӗ патне ҫӗр каҫма кайнӑ.
Ирхине таврӑнсан хваттере кӗрейнӗ. Анчах сӗтел ҫинчи 390 пин тенкӗ пулман. Полици укҫана 49 ҫулти кӳршӗ хӗрарӑмӗ вӑрланине палӑртнӑ. Хайхискер алӑк уҫӑ пулнине курсан шала кӗнӗ, сӗтел ҫинчи укҫана илнӗ те тухса кайнӑ.
Хӗрарӑм тӗлӗшпе пуҫиле ӗҫ пуҫарнӑ.
Ҫӗнӗ Шупашкар хулинче пурӑнакан 36 ҫулти арҫын пӗлӗшне асӑрханмасӑр вӗлернӗ. Пӑтӑрмах сӑлтавӗ — кӗвӗҫӳ.
Арҫын асӑннӑ хулари общежитисенчен пӗринче тусӗ патӗнче пулнӑ. Пӑтӑрмах кӑҫалхи ҫу уйӑхӗн 2-мӗшӗнче пулса иртнӗ. Пӗлӗшне вӑл хӑйӗн хӗрӗ ҫумне кӗвӗҫнӗ. Арҫынна хайхи питӗнчен икӗ хутран кая мар ҫапса янӑ, унтан аллипе ҫипуҫӗнчен ярса илнӗ те тӗксе янӑ. Кил хуҫи пуҫӗпе урайне ҫапӑннӑ. Пуҫ мимине чӗтретнӗскер кӑштахран вилсе кайнӑ.
Кӗвӗҫ арҫын тепӗр усал ӗҫ те тунӑ. Унччен маларах вӑл хӑйӗн хӗрӗн тусӗн сумкинчен карас телефонне вӑрланӑ.
Арҫынна суд ҫирӗп режимлӑ колоние 3 ҫуллӑха ӑсатма йышӑннӑ.
Шупашкар районӗнче пурӑнакан пӗр арҫын командировкӑран килсен аванах хыпса лартнӑ. Вӑл ҫул хӗрринчи кафене кӗрсе кайнӑ та ларнӑ ҫӗртех ҫывӑрса кайичченех ӗҫнӗ.
Ҫурҫӗр иртсен вӑранса кайнӑ та карас телефонӗ ҫуккине асӑрханӑ. Телефон чехолӗнче темиҫе банк картти пулнӑ. Ҫухатнӑ пуль тесе арҫын карттӑсенчен укҫа илмелле мар туса хунӑ, ҫӗнӗ телефонпа сим-карта туяннӑ.
Кӑштахран ун патне банк карттисенчен укҫа касса кайни ҫинчен хыпарсем килсе тулнӑ. Ҫавӑн хыҫҫӑн арҫын йӗрке хуралҫисенчен пулӑшу ыйтнӑ.
Пакунлисем банк карттисемпе Шупашкарти Ҫӗнӗ Кӑнтӑр районӗнчи лавккасемпе пӗчӗк кафесенче такам татӑлнине палӑртнӑ. Видеокамерӑсене пӑхнӑ та — вӗсемпе пӗр ҫын тӳленине ӑнланса илнӗ. Ҫухалнӑ телефона хулари ломбардсенчен пӗринче тупнӑ.
Кӗҫех вӑрра тупса палӑртнӑ. Судпа унччен те айӑпланнӑ 32 ҫулти арҫын телефона ҫул хӗрринчи кафери пукан ҫинчен (телефон хуи ҫав вӑхӑтра ҫывӑрнӑ) илнӗ. Халӗ унӑн каллех суд тенкелӗ ҫине ларма тивӗ.
Канаш хулинче пурӑнакан 24 ҫулти каччӑ ҫумӑр шывне юхтармалли решеткесене вӑрланӑ.
Пӑтӑрмах утӑ уйӑхӗн 10-мӗшӗпе 11-мӗшӗсенчи ҫӗрле пулнӑ. Йӗрке хуралҫисем пӗр ҫын урапа ҫинче тимӗр решеткесем турттарса пынине курнӑ. Пакунлисем хӑйне асӑрхасан хайхи этем пурлӑха пӑрахса хӑварнӑ та тарма тӑнӑ. Анчах нумаях каяйман – ӑна хӑваласа ҫитнӗ.
Каччӑ решеткесене кӗпер айӗнче тупрӑм та вӗсем хуҫасӑр тенӗрен илсе каяс терӗм тесе тыттарма хӑтланнӑ-ха. Кайран вӑл решеткесене кӗпер ҫинчен вӑрланине йышӑннӑ.
+12.5 °C