Ӗнер Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ҫамрӑксен патшалӑх премине парасси ҫинчен калакан хушу кӑларнӑ.
2019 ҫулшӑн преми лауреачӗн ятне ӑслӑлӑх, техника тата производство енӗпе И.Н. Уляьнов ячӗллӗ ЧПУн органика тата фармаци химийӗн кафедрин ассистенчӗ Артур Григорьев тивӗҫнӗ; вӗренӳ, воспитани тата ҫамрӑксен политики енӗпе — «Power» чирлидинг командин пайташӗсем Екатерина Коршунова, Светлана Поясова, Станислав Пчелов, Наталья Брик, Иван Аргандеев; литература, культура тата ӳнер енӗпе — ЧПУн аслӑ шкулсем хушшинчи «Абрикос пахчи» театрӗн пайташӗсем Ксения Чайкова, Иван Тихонов, Андрей Почепа, Анна Микаелян; журналистика енӗпе — Чӑваш патшалӑх ял хҫуалӑх академийӗн «Агровыбор» пресс-центрӗн ӗҫченӗсем Светлана Филиппова, Александр Мареев, Анна Степанова, Анастасия Данилова, Анна Николаева; сывлӑх сыхлас енӗпе — ЧПУн ассистенчӗ, медицина наукисен кандидачӗ Сергей Кудряшов; ҫутҫанталӑка хӳтӗлессипе — «Хӗрлӗ хӗрес» обществӑн волонтерӗ Алена Ильгачева; физкультурӑпа спорт енӗпе — В.Н. Кочков ячӗллӗ 5-мӗш спорт шкулӗн спортсменки, киокусинкай енӗпе тӗнче чемпионачӗн бронза призерӗ Елена Зайковская; волонтер ӗҫӗ-хӗлӗ енӗпе — Шупашкарти нимеҫӗсен центрӗн пайташӗсем Анастасия Тарасова, Станислав Башмаков, Софья Павлова; патриот воспитанийӗ енӗпе — ЧПУн «Георгий ленти» шырав отрячӗн пайташӗсем Виктор Сорокин, Светлана Подилкина, Владимир Никифоров; ҫамрӑксен юхӑмне аталантарассипе — «Нимеҫӗсем-медиксем» организацин пайташӗсем Елена Антонова, Марина Смирнова, Мария Белова, Ангелина Николаева, Екатерина Иванова.
Чӑваш Енри аслӑ шкулсенчен пӗрин преподавателӗ сӗтев илнӗ тесе шухӑшланине эпир пӗлтернӗччӗ. Аса илтерер: пуҫиле ӗҫе Шупашкарта пурӑнакан 66 ҫулти арҫын тӗлӗшпе пуҫарнӑччӗ. Вӑл И.Н. Ульянов ячӗллӗ Чӑваш патшалӑх университетӗнчи «Фармакологи, клиника фармакологийӗ тата биохими» кафедрӑн доценчӗ пулса ӗҫлет.
Арҫын икӗ студенткӑран сӗтев илнӗ. Хӗрсем укҫана ҫын урлӑ тыттарнӑ. Преподавателе 250 пин тенкӗлӗх штрафланӑ. Кунсӑр пуҫне ӑна аслӑ тата ятарлӑ пӗлӳ паракан вӗренӳ заведенийӗсенче ӗҫлеме чарнӑ.
Сӗтев паракан студенткӑсем тата вӗсенчен укҫа илсе преподавателе сӗтев панӑ ҫын тӗлӗшпе те пуҫиле ӗҫсем пуҫарнӑ. Вӗсене халӗ суда ярса панӑ.
Укҫа тесен шапа та алӑ тӑсать теҫҫӗ. Чӑваш Енри аслӑ шкулсенчен пӗрин преподавателӗ сӗтев илнӗ тесе шухӑшлаҫҫӗ. Пуҫиле ӗҫе Шупашкарта пурӑнакан 66 ҫулти арҫын тӗлӗшпе пуҫарнӑ. Вӑл И.Н. Ульянов ячӗллӗ Чӑваш патшалӑх университетӗнчи «Фармакологи, клиника фармакологийӗ тата биохими» кафедрӑн доценчӗ пулса ӗҫлет.
Арҫын сӗтев илнӗ тесе РФ Пуҫиле кодексӗн 290-мӗш статйин 2-мӗш пайӗпе пуҫиле ӗҫ пуҫарнӑ. Тӗпчевҫӗсем шухӑшланӑ тӑрӑх, сӗтеве преподаватель 2018 ҫулхи ҫӗртме уйӑхӗн ҫуррисенче медфакультетра вӗренекен пӗр студенткӑран ҫын урлӑ илнӗ. 40 пин укҫалла вӑл хайхи хӗре «Фармакологи» дисциплинӑшӑн отметка лартса панӑ. 2019 ҫулхи ҫу уйӑхӗнче вара парӑмсене каҫарма тепӗр студенткӑран 30 пин ыйтнӑ теҫҫӗ.
И.Н. Ульянов ячӗллӗ Чӑваш патшалӑх университечӗ Уҫӑ алӑксен кунне онлайн мелпе унччен те ирттернӗ. Хальхинче ун пеккине машиностроени факультечӗ йӗркелӗ. Вӑл паян, ака уйӑхӗн 18-мӗшӗнче, 12 сехет те 30минутра пуҫланӗ.
Аслӑ шкулӑн машиностроени факультетӗнчи специальноҫсем, унта вӗренме кӗрес тесен мӗнле экзаменсем тытмалли ҫинчен каласа кӑтартӗҫ. Уҫӑ алӑксен кунне хутшӑнакансем ытти чылай ыйтӑва та уҫӑмлатайӗҫ. Вӗсене факультетӑн деканӗ Виктор Адольфович Гартфельдер профессор хуравлӗ. Унсӑр пуҫне студентсем, аслӑ шкултан вӗренсе тухнисем, партнер-компанин пайташӗсем калаҫӑва хутшӑнӗҫ.
Тӳрӗ эфира ЧПУ «Контактра» халӑх ушкӑнӗнче https://vk.com/chuvsu страницӑра ирттерӗ.
Ыйтусене ҫакӑнта https://forms.gle/2BrsvGQ2J5BVGK6Q7 йышӑнаҫҫӗ.
Мурманскри ҫынсем Чӑваш Енрен тухнӑ министр, Анна Головина, йӑнӑшсемпе ҫырнӑшӑн кӑмӑлсӑрланнине Чӑваш халӑх сайчӗ пӗлтернӗччӗ. Аса илтерер: асӑннӑ тӑрӑхра вӗренӳ министрӗнче тӑрӑшаканскер Инстаграмри страницӑра пост ҫырнӑ чух йӑнӑш ҫине йӑнӑш тунӑ.
«Тавах сире мана йӑнӑшсене кӑтартнӑшӑн! Эпӗ технарь, физик-математик, анчах ҫакӑ тӳрре тухмалли сӑлтав мар, паллах. Кашнинех йӑнӑшма ирӗк пур, анчах ку министрпа пулни лайӑх мар. Тимлӗрех пулӑп! Постсене малашне васкаса ҫырмӑп, тимлӗ пулӑп. Тавах тепӗр хут)», — тесе ҫырнӑ Головина.
Хӑйӗн йӑнӑшне асӑрхаттарнисене вӑл икӗ эрнерен хуравланӑ.
Анна Головина Чӑваш патшалӑх университетӗнче «Физика» тата «Преподаватель» специальноҫсене алла илнӗ.
Ӗнер «Раҫҫей лидерӗсем» конкурсӑн «Сывлӑх сыхлавӗ» специализацире палӑртнӑ 30 ҫӗнтерӳҫӗ ятне пӗлтернӗ. Ҫурма финала Чӑваш Енри тухтӑр, Республикӑн клиника офтальмологи пульницин тӗп тухтӑрӗ Дмитрий Арсютов тухнӑ. Вӑл тата Раҫҫейӗн 9 регионӗнчи тепӗр тӑхӑр ҫын суперфинала лекнӗ. Вӗсем «Раҫҫей лидерӗсем» конкурсӑн суперфиналне Сочи хулине пуҫтарӑнӗҫ. Ӑмӑрту пуш уйӑхӗн 27-31-мӗшӗсенче иртӗ.
Дмитрий Арсютов 1977 ҫулта Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнче «Сиплев ӗҫӗ» специальноҫа алла илнӗ, 2007 ҫулта аспирантурӑран вӗренсе тухнӑ, 2017 ҫулта — экономика енӗпе магистратурӑран. Медицина ӑслӑлӑхӗсен кандидачӗ. 2010 ҫултанпа Республикӑн клиника офтальмологи пульницинче тӗп тухтӑр пулса ӗҫлет. ЧПУра офтальмологипе отоларингологи кафедрин доценчӗ. Чӑваш Патшалӑх Канашӗн депутачӗ.
Чӑваш Енӗн промышленность тата энергетика министрӗн тивӗҫӗсене пурнӑҫлама ҫӗнӗ ҫынна шаннӑ. Ку тилхепене Александр Доманина тыттарнӑ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян, нарӑс уйӑхӗн 21-мӗшӗнче, алӑ пуснӑ.
Паянах Олег Николаев тепӗр хушу та кӑларнӑ. Унпа килӗшӳллӗн вӑл Игорь Воропаева тивӗҫрен хӑтарнӑ. Ӗҫлӗ хутра каланӑ тӑрӑх, Игорь Воропаев урӑх ӗҫе куҫнӑ.
Александр Доманин — 57 ҫулта. Вӑл Шупашкарта ҫуралнӑ. Чӑваш патшалӑх университечӗн экономика факультетӗнче вӗреннӗ. Тӗрлӗ ҫулта вӑл лавкка пуҫлӑхӗнче, Шупашкарти электроаппаратура савутӗнче финанс тата экономика енӗпе ӗҫлекен пуҫлӑхӗ, ЧР экономика аталанӑвӗн министрӗн ҫумӗ, пурлӑх тата ҫӗр хутшӑнӑвӗсен министрӗ, «Чувашкредитпромбанкӑн» президенчӗ пулнӑ.
И.Н. Ульянов ячӗллӗ Чӑваш патшалӑх университечӗн преподавателӗсемпе студенчӗсем ӗнер, нарӑс уйӑхӗн 19-мӗшӗнче, Тутарстанри Анат Камāри 34-мӗш гимнази-интерната кайнӑ. Кун пирки Елена Нарпи Фейсбукра хыпарлани тӑрӑх пӗлтӗмӗр. «Урӑхла чӑваш гимназийӗ. Тутарстан варринчи чӑваш утравӗ. Кунта ачисем те «Аван-и?» тесе сывлӑх сунаҫҫӗ», — тесе ҫырнӑ Елена Нарпи. Г.А. Ляхова директор Чӑваш Енри хӑнасене хапӑл туса кӗтсе илнӗ, хӑтлӑ пӳлӗмсене вырнаҫтарнӑ. Ачасем музейри экспонатсемпе паллаштарнӑ. Паян, нарӑсӑн 20-мӗшӗнче, Тутарстанри мероприяти малалла тãсӑлнӑ. Ӑна Пӗтӗм тӗнчери тӑван чӗлхе кунне халалланӑ.
«чӑваш утравне»
И.Н. Ульянов ячӗллӗ Чӑваш патшалӑх университетӗнче «#Разделяй» (чӑв. Уйӑр) экоологи проекчӗ пуҫарнӑ. Унта чи малтисенчен пӗрисен йышӗнче ют ҫӗршыври студентсем хутшӑнма тытӑннӑ.
Проекта пурнӑҫа кӗртсе Чӑваш патшалӑх университетӗнче хутпа пластик уйрӑм пухма картон бокссем вырнаҫтарнӑ. Аслӑ шкулта пӗлтернӗ тӑрӑх, корпуссенчи бокссем ҫине тӗплӗ инструкцисем ҫырса пичетленӗ. «Экологи питӗ пӗлтерӗшлӗ», — тесе каланӑ, тӗслӗхрен, Чӑваш патшалӑх университечӗн ют чӗлхесен факультетӗнче 2-мӗш курсра вӗренекен Мухаммедали Собиров.
Ҫывӑх вӑхӑтра нимеҫӗсем аслӑ шкулти кашни академи ушкӑнӗпе тӗл пулса йӑлари хытӑ каяша уйрӑм пуҫтармалли ҫинчен ӑнлантарса парасшӑн. Студентсене ҫеҫ мар, преподавательсене те.
Паян Мурманск облаҫӗн кӗпӗрнаттӑрӗ Андрей Чибис вӗренӳпе ӑслӑлӑх министрӗн тивӗҫӗсене пурнӑҫлама Анна Головинана шаннӑ. «Ҫыхӑнура» портал ҫак хыпара пӗлтернӗ май Шупашкарта ҫуралса ӳснине аса илнӗ.
Анна Германовна Головина 2009 ҫулта И.Н. Ульянов ячӗллӗ Чӑваш патшалӑх университетне вӗренсе пӗтернӗ. Унта вӑл «Физика» тата «Преподаватель» специальноҫӗсене алла илнӗ. «Финанс тата кредит» енӗпе те вӑл вӗреннӗ. «Пӗтӗмӗшле педагогика, педагогика тата вӗренӳ историйӗ» енӗпе аспирантурӑра ӑс пухнӑ. 2015 ҫулта вӑл педагогика наукисен кандидачӗ ята тивӗҫнӗ. Сӑмах май, 2014 ҫулта «Ҫулталӑк аспиранчӗ» республикӑри конкурсра «Педагогика ӑслӑлӑхӗсем» номинацире ҫӗнтернӗ.
Анна Головина Чӑваш Ен Вӗренӳ тата ҫамрӑксен политикин министерствинче тӗрлӗ должноҫра вунӑ ҫул ӗҫленӗ. Мурманска кайиччен Чӑваш патшалӑх университетӗнче проект ӗҫ-хӗлӗн управленийӗн пуҫлӑхӗ пулнӑ. Хӑй вӑл Хабаровскра ҫуралнӑ.
+12.3 °C