Шупашкарти 10-мӗш шкулта вӗрентекен 46 ҫулти хӗрарӑм икӗ класа ҫунтарса яма тӑнӑ. Анчах ӗҫне вӗҫлемелле хуралҫӑ чӑрмантарнӑ. Ку хыпар паян тӗрлӗ телеграм-каналта сарӑлнӑ.
Ҫак хӗрарӑмах ашшӗ-амӑшӗн чатне Раҫҫей Хӗҫ-пӑшаллӑ вӑйӗсене дескридитаци тӑвакан видео янӑ. Видеона пӑхсан ҫакӑ паллӑ: хӗрарӑм ҫыхӑнуллӑ калаҫмасть, усал сӑмахсемпе пӗркелешет, ӑнланмалла мар сӑвӑсем вулать. Юлашкинчен Украинӑна мухтакан сӑмахсем калать.
Вӗрентекен тытса чарнӑ.
Шупашкар хулинче пурӑнакан 18 ҫулти ҫамрӑксене ҫын машинине хускатса кайнӑшӑн тытса чарнӑ.
Кӑрлач уйӑхӗн 23-мӗшӗнче пакунлисенчен 23 ҫулти ҫамрӑк пулӑшу ыйтнӑ. Вӑл хӑйӗн «Лада Приора» автомобильне такамсем вӑрланине пӗлтернӗ. Машинӑна вӑл Хӗвеллӗ микрорайонта лартса хӑварнӑ иккен. Кайран машинӑна тепӗр урамра асӑрханӑ.
Асӑннӑ машинӑна 18 ҫулти икӗ ҫамрӑк хускатса кайнӑ. Алӑкне питӗрмен машинӑра вӗсем малтан музыка итленӗ, кайран автомобиле хускатса район тӑрӑх ярӑнса ҫӳренӗ. Унтан автомобиле Лаврентий Таллеров урамӗнче лартса хӑварнӑ.
Каччӑсен тӗлӗшпе пуҫиле ӗҫ пуҫарнӑ.
Улатӑр хулинче пурӑнакан хӗрарӑм каллех улталаннӑ. Малтанхинче вӑл газ уҫлакан предприятие инвестици хывас тесе ултавҫӑсен капкӑнне ҫакланнӑ, хальхинче хӑйӗн патне банк ӗҫченӗ тесе шӑнкӑравланӑ этеме ӗненнӗ.
53-ри хӗрарӑм пакунлисене каласа кӑтартнӑ тӑрӑх, ун патне палламан ҫын шӑнкӑравланӑ, хӑйӗнпе банк ӗҫченӗ тесе паллаштарнӑ. Вӑл ӑна такамсем ун ячӗпе 199 пин тенкӗ кредит илесшӗн тесе тыттарнӑ. Укҫана «хӑрушсӑр» счет ҫине куҫарма ыйтнӑ. Каланине итленӗ хӗрарӑм. Тепӗр кунне вӑл тата тепӗр 78 пин тенкӗ куҫарса панӑ. Ҫапла майпа вӑл икӗ кунта 277 пин тенкӗсӗр тӑрса та юлнӑ.
Чӗмпӗр хулинче пурӑнакан, Шупашкарти аслӑ шкулсенчен пӗринче вӗренекен пике килне каникула кайма билет илес тесе укҫасӑр тӑрса юлнӑ.
Пӗрремӗш курсра вӗренекенсер билет туянса хурас тенӗ. Ҫула май лартса каякансен сервисӗнчи пӗр каҫӑпа иртсе унта банк реквизичӗсене кӑтартнӑ. Кӗҫех хӗрӗн картти ҫинчен 10 пин тенкӗ ытла укҫа ҫухалнӑ та.
Хӑй улталаннине ӑнланса илнӗ хыҫҫӑн хӗр йӗрке хуралҫисенчен пулӑшу ыйтнӑ.
Ҫак самантра Шупашкарти Ленин Комсомолӗн урамӗнчи 40-мӗш ҫуртра, 1-мӗш корпусра, пушар тухнӑ. Ҫӑлавҫӑсем вырӑна ҫитнӗ.
Ҫурт - 9 хутлӑ, панельтен тунӑскер. Халӑх корреспонденчӗ «Про Город» хаҫата пӗлтернӗ тӑрӑх, ҫӑра тӗтӗм подъезд чӳречисенчен тухать.
Кӑрлачӑн 23-мӗшӗнче Мускав ҫывӑхӗнчи Королев хулинче Чӑваш Енри икӗ арҫын сарӑмсӑр вилнӗ. Вӗсем стройкӑра ӗҫленӗ.
Ун чухне ӗҫ кунӗ вӗҫленес умӗн виҫӗ арҫын 15 метр ҫӳллӗшӗнчен ӳкнӗ. Шел те, иккӗшӗ вилнӗ. Вӗсем - Елчӗк округӗнчи пӗртӑвансем. Тепри чӗрӗ юлнӑ, аманнӑ.
Малтанлӑха пӗлтернӗ тӑрӑх, леса ҫинче 6 ҫын пулнӑ. Леса йывӑр пулнипе шатӑртатма пуҫланӑ. Виҫҫӗшӗ тытӑнса юлнӑ. Теприсем ӳкнӗ, вӗсем ҫине йывӑр япаласем персе аннӑ. Ҫывӑх ҫыннисем пӗлтернӗ тӑрӑх, арҫынсем унта официаллӑ мар майпа ӗҫленӗ.
Раҫҫейӗн Шалти ӗҫсен министерстви ют ҫӗршыв ҫыннисем пирӗн патра 2022 ҫулта преступлени тунин статистикине тишкернӗ.
Йӗрке хуралҫисен капкӑнне ҫакланнисен пӗтӗмӗшле йышне илсен, Узбекистанран килнисен тӳпи мигрантсем тунӑ преступленисенчен 40 процентпа танлашнӑ, Таджикистанран килнисен — 25 процентпа, Кӑркӑстанран килнисен — 13 процентпа.
2020 ҫулхипе танлаштарсан мигрантсем 2022 ҫулта виҫӗ хут ытларах преступлени тунӑ. 2022 ҫулта вӗсем 11664 йывӑр тата уйрӑмах йывӑр преступлени тунӑ.
Ют ҫӗршывран килнисенчен ытларахӑшӗ наркотикпа ҫакланнӑ. Ку енӗпе Узбекистан, Таджикистан тата Кӑркӑстан ҫыннисем уйрӑмах «палӑрнӑ».
Ҫын вӗлересси 2022 ҫулта 2021 ҫултинчен 52 процент нумайланнӑ. Ун пек фигурантсен йышӗнче — Узбекистан, Таджикистан тата Азербайджан ҫыннисем ытларах.
Паян 12 сехет те 40 минутра Йӗпреҫ муниципаллӑ округӗнчи Пучинке ялӗнче пушар пулнӑ. Ҫулӑм 9 тӑваткал метр ҫинче кӑна алхаснӑ пулин те ку инкекпе вӗҫленнӗ - икӗ ҫыннӑн пурнӑҫӗ татӑлнӑ.
Пушара сӳнтерсен 1939 ҫулта ҫуралнӑ хӗрарӑмӑн тата 1966 ҫулта кун ҫути курнӑ арҫыннӑн виллисене тупнӑ.
Халӗ пушар мӗнрен тухнине тӗпчеҫҫӗ.
Кӑрлач уйӑхӗн 18-мӗшӗнче Тӑвай муниципаллӑ округӗнчи Тӗмер ялӗнче пӗр кил хуҫалӑхӗнче пушар пулнӑ. 51 ҫулти арҫын хуҫалӑхӗнче хуралтӑ таврашӗ ҫуннӑ.
Пушар кирпӗчрен купаланӑ вите урайне сиенлетнӗ. Инкекре чӑхсем ҫунса вилнӗ. Кил хуҫи 30 чӑхсӑр тӑрса юлнӑ.
Ҫав кунах Ҫӗмӗрле муниципаллӑ округӗнчи Ҫӗмӗрле ялӗнчи шкулта пушар пулнӑ. Унта хуралҫӑ пӳлӗмӗнчи матрас ҫуннӑ. Никам та шар курман.
Паян 9 сехет ҫурӑра Ҫӗрпӳ муниципалитет округӗнче «Тойота» «Канаш – Шупашкар» маршрутпа ҫӳрекен автобуспа ҫапӑннӑ. Шел те, ҫӑмӑл машина рулӗ умӗнче ларнӑ 58 ҫулти хӗрарӑм, Ҫӗнӗ Шупашкарта пурӑннӑскер, вилнӗ.
Авари вӑхӑтӗнче автобус салонӗнче 7 пассажир пулнӑ. Вӗсем аманман.
Малтанлӑха пӗлтернӗ тӑрӑх, «Тойота» рулӗ умӗнче ларнӑ хӗрарӑм транспорта итлеттереймен – хирӗҫ ҫул ҫине тухса кайнӑ та «Грантӑна» кӑштах лектернӗ, унтан микроавтобус ҫине пырса кӗнӗ.
+15.3 °C