Иртнӗ уйӑхӑн юлашки кунӗнче Г.Н. Волков академик ҫуралнӑранпа 95 ҫул ҫитнине эпир пӗлтернӗччӗ-ха. Ҫав ятпа Шупашкарти 12-мӗш шкулта педагогсен «Халӑх вӗрентӗвӗн йӑла-йӗркийӗ – вӗрентекенӗн чун-чӗре культурин тӗп шӑнӑрӗ» ятпа наукӑпа меслетлӗх конференцийӗ иртнӗ.
Елизавета Долгован тӗнче тетелӗнчи халӑх ушкӑнӗсенчен пӗринчи страницинче пӗлтернӗ тӑрӑх, конференцие хулари чӑваш чӗлхи вӗрентекенӗсем ҫеҫ мар, пӗтӗм республикӑри учительсем хутшӑннӑ. Тутар, Пушкӑрт республикисенчен, Мускав облаҫӗнчен педагогсем те хутшӑннӑ.
«Конференци ӗҫне ӳнерпе ӑслӑлӑх академин пайташӗсем: В.А. Иванов, Н.И. Димитриева, В.А. Федотов, Ю.М. Виноградов, Е.К. Иванова хутшӑнса сӑмах каларӗҫ. Ку конференци этнопедагогика ыйтӑвӗпе ирттерекен пулӑмсенчен 10-мӗш пулчӗ. Вӗсене пурне те чӑваш чӗлхи учителӗ, Чӑваш Республикин тава тивӗҫлӗ учителӗ Анисия Павловна Игнатьева йӗркелесе ертсе пычӗ», — тесе пӗлтернӗ хыпарта.
Чӑваш Енре анимаципе анимаци киновӗ анлӑ сарӑлса пырать. Шупашкарти ӳнер училищинче (техникумӗнче), акӑ, ҫамрӑксене «анимаци» специальноҫа вӗрентеҫҫӗ.
Пӗр-пӗринпе килӗштерсе ӗҫлес тата пӗр-пӗрин опычӗпе паллашас тӗллевпе Шупашкарти ӳнер училищин преподавателӗсем С.А. Герасимов ячӗллӗ Пӗтӗм Раҫҫейри кинематографи институтне ҫитсе курнӑ. Чӑваш Ен делегацине директорӗн наукӑпа методика ӗҫӗ енӗпе тӑрӑшакан заместителӗ Ксения Егорова, Виталий Павлов тата Александра Емельянова преподавательсемпе ӑшшӑн кӗтсе илнӗ, анимаципе мультимедиа факультечӗпе паллаштарнӑ тата ытти кӑсӑклӑ япаласем ҫинчен каласа кӑтартнӑ.
Мускаври чӑвашсен ентешлӗхӗн хастарӗсем — «Тӑван ҫершывӑн ывӑлӗсем» офицерсен юлташлӑхен хастарӗсем Кремльте Президент полкӗнче хӗсметре тӑракан Чӑваш Енри каччӑсемпе тӗл пулнӑ.
Раҫҫейӗн Президент полкӗ Патшалӑха сыхлакан федераци службин тытӑмне кӗрет.
Юлташлӑхӑн правленийӗн председателӗн пӗрремӗш заместителӗ Иван Николаев тата организацин офицерсен тӗп тытӑмӗ маттур каччӑсен ячӗпе нумай ӑшӑ сӑмах каланӑ, Хисеп грамотисемпе хавхалантарнӑ.
Тӗлпулӑва хутшӑннӑ Чӑваш Республикин тава тивӗҫлӗ артисчӗ Ирина Шоркина, Ольга Оболенская музыкант тата чӑваш эсрадин артисчӗ Алена Силпи концерт лартса панӑ.
К.В. Иванов ячӗллӗ Чӑваш патшалӑх академи драма театрӗн сасӑ операторӗ Ирина Корнеева Мускавра пӗлӗвне ӳстернӗ.
Квалификацие ӳстермелли курса Раҫҫейӗн театр ӳнерӗн институчӗ ҫумӗнчи «Театрти сасӑ режиссури» курсра вӗреннӗ специалист тӗрлӗ дисциплинӑна ӑша илнине пӗлтернӗ.
Сӑмах май каласан, Чӑваш патшалӑх академи драма театрӗнче ӗҫлекенсенчен тӑххӑрӑшӗ кӑҫал тӗрлӗ курсра хӑйсен квалификацине ӳстернӗ.
Вӑрнар районӗнче 49 ҫулти арҫын Мускава кайсан ҫухалнӑ. Вӑл килтен авӑн уйӑхӗн 15-мӗшӗнче кайнӑ.
Юпа уйӑхӗн 19-мӗшӗнче ирхи 5 сехетре Сергей Геннадиевич Васильев тӑванӗсем патне шӑнкӑравланӑ та Чӑваш Ене килме тухнӑ. Кун хыҫҫӑн вӑл телефонне метрора хӑварнӑ. Арҫын киле таврӑнманнине кура тӑванӗсем полицирен пулӑшу ыйтнӑ. Арҫын хура куртка, хура шӑлавар, хура кроссовка тӑхӑннӑ пулнӑ.
Хӑй шакла, 175 сантиметр ҫӳллӗш. Мӗн те пулин пӗлсен полицие пӗлтерме ыйтаҫҫӗ.
Юлашки вӑхӑтра Мускавра хваттер хакӗ кӑштах чакнӑ. Ҫакна ҫынсен пӗр пайӗ чикӗ леш енне тухса кайнипе е кайма пуҫтарӑннипе ҫыхӑннӑ. Ун пеккисем хӑйсен пурлӑхне васкавлӑн сутса яма тӑрӑшаҫҫӗ.
Авӑн уйӑхӗн Мускавра хваттерӗн 1 тӑваткал метрӗн хакӗ вӑтамран 266 пин те 498 тенкӗпе танлашнӑ. Пӗр пӳлӗмлӗ хваттерсемшӗн хак ҫурла уйӑхӗнчинчен 2,1 процент чакнӑ, икӗ пӳлӗмлисемшӗн — 1,96 процент, виҫӗ пӳлӗмлисемшӗн — 0,9 процент. Пӗтӗмӗшле илсен, кивӗ (тӗрӗсрех каласан, унччен пурӑннӑ) хваттерсене сутакан хак 1,96 процент йӳнелнӗ.
Нумаях пулмасть Чӑваш Ен делегацийӗ Мускавра пулнӑ. Унти ВДНХра «Ылтӑн кӗркунне» ял хуҫалӑх куравӗ иртессине эпир унччен пӗлтернӗччӗ-ха.
Республика Элтеперӗ Олег Николаев Телеграмра хыпарланӑ тӑрӑх, Мускава пирӗн тӑрӑхисем 200 кг шӑрттан тата 300 кг сыр илсе кайнӑ. Апат-ҫимӗҫпе вӗсем «Ылтӑн кӗркунне» гастрономи фестивальне хутшӑннӑ.
Куравран пирӗннисем 51 медальпе, ҫав шутран 41-шӗ ылтӑн, таврӑннӑ.
Кунсӑр пуҫне аммиак, карбамид тата азот удобренийӗ туса кӑларакан «Уралхим» предприятипе тата ытти хӑш-пӗр организаципе килӗштерсе ӗҫлеме калаҫса татӑлнӑ.
Мускавра иртекен «Ылтӑн курав» гастрофестивале чӑвашсем те хутшӑнӗҫ. Пӗтӗмпе курава ҫӗршывӑн 58 регионӗнчи 300 ытла производитель пуҫтарӑнӗ. Гастрофестиваль ВДНХра юпа уйӑхӗн 5-9-мӗшӗсенче иртӗ.
Чӑваш Енрен унта Ольга Кошелева сыр ӑсти те хутшӑнӗ. Пӗр-ик уйӑх каялла вӑл «Раҫҫейри чи лайӑх сыр – 2022» конкурса ҫӗнтернӗ.
Регионӑн сентри ҫинче качака тата ӗне сӗтӗнчен ӑсталанӑ 20 тӗрлӗ ытла сыр вырӑн тупӗ. Унсӑр пуҫне — Етӗрнери аш-какай комбиначӗн шӑрттанӗ; «Сырьёзная компания» ҫемье производствинче туса кӑларакан улма-ҫырла чипсӗ тата ытти пылак апат-ҫимӗҫ.
ЧР Элтеперӗн автобази иномаркӑсемпе пуянланнӑ. Ӗнер каҫхине Энгельс урамӗнче вырнаҫнӑ базӑна сахалтан та икӗ Kia K5 машина илсе килнӗ.
Унччен машинӑсем туянмашкӑн аукцион ирттерни пирки пӗлтернӗ. Элтепер автобази валли Kia K5 машина – 8, Kia Rio – 4 машина кирли пирки пӗлтернӗ. Аукционра малтанхи хак 34 миллион та 400 пин тенкӗ пулнӑ.
Аукционра Шупашкарти «Альянс-Моторс» тата Мускави «Автомир-Тендер» ҫӗнтернӗ.
Атӑлҫи тӑрӑхӗнчи маньяка 30 ытла ҫынна вӗлернӗ тесе шухӑшлаҫҫӗ. Хусанта пурӑнакан 40 ҫулти Радик Тагиров тӗлӗшпе пуҫарнӑ пуҫиле ӗҫе РФ Следстви комитечӗн ӗҫченӗсем тӗпчесе пӗтернӗ.
Вӑйпитти 30 ытла ҫынна вӗлернӗ, 3 хутчен вӗлерме тӑнӑ, ватӑ ҫынсене хурахла тапӑнса 30 хут ытла ҫаратнӑ.
Пуҫтаха чылай вӑхӑт тытса чарайман. 10 пин ытла ҫынна тӗрӗсленӗ, 5 пин ытла эксперт тӗрӗслевӗ ирттернӗ.
Преступление ҫав арҫын 2011 ҫулхи пуш уйӑхӗнчен тытӑнса 2012 ҫулхи юпа уйӑхӗччен тунӑ. Арҫын Хусан, Нижнекамск, Волжск, Ижевск, Чулхула, Шупашкар, Ӗпхӳ, Перӗм, Екатеринбург, Сарӑту, Иваново, Киров, Самар, Челепи, Мускав хулисенче пурӑнакан кинемейсене шар кӑтартнӑ. Вӑл ватӑсене коммуналлӑ служба ӗҫченӗ тесе ӗнентерсе вӗсен килне кӗнӗ. Кайран кинемейсене тапӑнса пӑвса вӗлернӗ, карчӑксен укҫине илсе тухса кайнӑ. Хусан арҫынни Шупашкарти икӗ кинемее вӗлернӗ.
Ҫывӑх вӑхӑтра арҫынна суд тӑвӗҫ.
+9.3 °C